1 Peturo 5:1-14

  • Liskani mskambu waku Chiuta (1-4)

  • Jani akujiyuyuwa kweniso jani masu (5-11)

    • Ponyani paku Chiuta vosi vo vitikufipiskani mtima (7)

    • Dyaboli we nge nkharamu yakukoloma (8)

  • Mazu ngakumaliya (12-14)

5  Mwaviyo, nge mura munyinu, kaboni wa masuzgu ngaku Khristu ndipuso wakulondiyaku unkhankhu wo wazamuvumbulika, ndipempha* ŵara wo ŵe pakati pinu kuti:  Liskani mskambu waku Chiuta wo we mu manja mwinu, teŵetiyani nge akuwonere,* mwakuchichizgika cha, kweni mwakukhumbisiska pa masu paku Chiuta; mwakusaniriyapu phindu lachinyengu cha, kweni ndi mtima wosi;  mwakuchita ufumu cha pa ŵanthu wo ntchihara chaku Chiuta, kweni jani chakuwoniyapu ku mskambu.  Ndipu asani mliska mura waziwoneke, mwazamulonde chisoti chaunkhankhu chambula kutchujuka.  Mwakuyanana waka, yimwi anyamata, jithereskeni kwa anthulumi arara. Muchitiyanengi vinthu mwakujiyuyuwa,* chifukwa Chiuta wasuska akujikuzga, kweni wapereka wezi ukulu ku ŵanthu akujiyuyuwa.  Mwaviyo, jiyuyuweni pasi pa janja lanthazi laku Chiuta kuti wazikukwezeni pa nyengu yaki,  muchiponya paku iyu vosi vo vitikufipiskani mtima, chifukwa iyu watikuphweriyani.  Lutirizgani kuja akuŵanaŵana umampha, jani masu! Murwani winu Dyaboli wayingayinga nge nkharamu yakukoroma, wapenja kumeza munthu munyaki.  Kweni yimwi limbanani nayu, jani akukho mu chivwanu pakuziŵa kuti gulu losi la abali ŵinu mucharu likumana ndi masuzgu ngakuyanana ndi ngenanga. 10  Kweni pavuli pakusuzgika kwa kanyengu kamanavi, Chiuta wa wezi ukulu wosi, yo wakukudaniyani ku unkhankhu waki wamuyaya mwakukoliyana ndi Khristu, wamalizengi kukusambizani. Iyu wakuwovyeningi kuti muje akukho, muje anthazi ndipuso kuti muleki kusukunyika. 11  Kwaku iyu kuŵi nthazi kwamuyaya. Ame. 12  Kuporote mwaku Silivano,* yo nditimuwona kuti ndi mubali wakugomezgeka, ndakulembiyani mazu ngamanavi kuti ndikuchiskeni ndi kukupaskani ukaboni wanthazi kuti uwu ndi wezi ukulu nadi waku Chiuta. Jani akukho mwaku yiwu. 13  Munthukazi yo we mu Babiloni, wakusankhika nge yimwi, watikutawuzgani, mwana wangu Mariko nayu watikutawuzgani. 14  Tawuzganani mwakufyofyonthana mwachanju. Chimangu chiŵi namwi mosi yimwi mukoliyana ndi Khristu.

Mazu Ngam'mphata

Pamwenga kuti, “ndichiska.”
Pamwenga kuti, “muwuwoneriyengi mwakuphwere.”
Pamwenga kuti, “Vwalani kujiyuyuwa.”
Wadanika so kuti Sila.