1 Peturo 4:1-19

  • Kuja mwakukoliyana ndi khumbu laku Chiuta nge mo Khristu wanguchitiya (1-6)

  • Umaliru wa vinthu vosi we pafupi (7-11)

  • Kusuzgika chifukwa cha kuja Mkhristu (12-19)

4  Pakuti Khristu wangusuzgika we mu liŵavu, yimwi namwi jinozgekereseni ndi maŵanaŵanu ngakuyanana ndi ngaki; chifukwa munthu yo wasuzgika we mu liŵavu walekana nawu ubudi,  kuti kwa nyengu yo yamujaliyaku we mu liŵavu, waleki kuja ndi umoyu wakuchita makhumbiru nga ŵanthu kweni wakuchita khumbu laku Chiuta.  Pakuti nyengu yo yajumpha yenga yakukwana kwaku yimwi kuti muchiti khumbu la ŵanthu amitundu, penipo mwachitanga mijalidu yiheni mwambula soni,* mwenga ambula kujiko pa vinthu viheni, mwamwanga mwakujumpha mwesu, mwachitanga maphwandu nga viwawa, mwamwanga mwamaphara ndipuso mwasopanga angoza lo ndi jalidu laukazuzi kwaku Chiuta.  Yiwu azizwa kuti mulutirizga cha kutchimbiya nawu limoza mu nkharu zabwekabweka, ndipu venivi vichitiska kuti akunyozeningi.  Kweni ŵanthu yaŵa azamumuka kwaku yo ngwakunozgeka kweruzga amoyu ndi akufwa.  Ndipu ndichu chifukwa chaki uthenga wamampha ungupharazgika so ku ŵanthu akufwa, kuti chinanga kuti mu liŵavu ŵanthu awona kuti ayeruzgika, kweni mwakukoliyana ndi kuwona kwaku Chiuta aje ndi umoyu mwa mzimu.  Kweni umaliru wa vinthu vosi we pafupi. Mwaviyo, muŵanaŵanengi umampha ndipuso muje masu pa nkhani ya kupemphera.  Chakukhumbika ukongwa ntchakuti muyanjanengi ukongwa, chifukwa chanju chiwundiya maubudi nganandi.  Mulondiyanengi kwambula kudinginyika. 10  Mwakukoliyana ndi mphasu yo weyosi wakulonde, yigwiriskiyeni ntchitu pakuteŵetiyana nge ateŵeti akuwonere nyumba amampha a wezi ukulu waku Chiuta wo ulongoleka mu nthowa zakupambanapambana. 11  Asani munyaki walongoro, walongoro mazu ngakutuliya kwaku Chiuta; asani munyaki wateŵete, wateŵete mwakuthemba nthazi yo Chiuta wapereka; kuti kuporote mwaku Yesu Khristu, Chiuta wakankhuskiki mu vinthu vosi. Unkhankhu ndi nthazi, vaki muyaya mpaka muyaya. Ame. 12  Akwanjiwa, asani mukumana ndi mayeseru ngakulilima, mungazizwanga cha nge kuti chitikuchitikiyani chinthu chachilendu. 13  Kweni lutirizgani kukondwa muchisuzgika nge mo Khristu wangusuzgikiya, kuti mukondwi ndipuso muzije ndi likondwa likulu ukongwa mu nyengu ya kuvumbulika kwa unkhankhu waki. 14  Ndimwi akutumbikika asani munyozeka* chifukwa cha zina laku Khristu, chifukwa mzimu wa unkhankhu wo ndi mzimu waku Chiuta, we paku yimwi. 15  Kweni pakati pinu paŵevi wakusuzgika chifukwa chakuti ngwakubaya ŵanthu, ndi munkhungu, ngwakuchita viheni, ndipuso ngwakuselere mu nkhani zaŵeni. 16  Asani munyaki wasuzgika chifukwa chakuti ndi Mkhristu, wangachitanga soni cha, kweni walutirizgi kukankhuska Chiuta wachipinga zina lenili. 17  Pakuti sonu yakwana nyengu yakuŵikika yakuti cheruzgu chiyambi panyumba yaku Chiuta. Sonu asani chitambiya paku isi, nanga wo aleka kuvwiya uthenga wamampha waku Chiuta, vazakuŵaŵiya wuli? 18  “Ndipu asani munthu murunji wataskika mwakusuzgikiya viyo, nanga munthu wambula kopa Chiuta ndi munthu wakubuda, vazakuŵaŵiya wuli?” 19  Mwaviyo, ŵanthu wo asuzgika mwakukoliyana ndi khumbu laku Chiuta, alutirizgi kujipereka kwa Mlengi wakugomezgeka achichita vinthu vamampha.

Mazu Ngam'mphata

Kuchita mijalidu yiheni mwambula soni. Mu Chigiriki, a·selʹgei·a. Wonani Mazu ngo Ngakonkhoskeka.
Pamwenga kuti, “mutondowoleka.”