1 Atesalonika 5:1-28

  • Kuza kwa zuŵa laku Yehova (1-5)

    • “Chimangu ndi kuvikilirika!” (3)

  • Jani masu, lutirizgani kuŵanaŵana umampha (6-11)

  • Kupempha (12-24)

  • Moni wakumaliya (25-28)

5  Kweni abali, vakukwaskana ndi nyengu ndipuso mazu­ŵa ngakuŵikika mukhumbika kuti tichiti kukulembiyani cha.  Pakuti yimwi mwaŵeni muziŵa umampha kuti zuŵa laku Yehova lizengi ndendende nge munkhungu ndi usiku.  Nyengu yeyosi yo azamukamba kuti, “Chimangu ndi kuvikilirika!” penipo, pharanyiku lamabuchibuchi lazakuŵawiya nge mo uchitiya urwirwi wa pakubala wa munthukazi wanthumbu, ndipu azamuthaŵa cha.  Kweni yimwi abali, mwe mu mdima cha kuti zuŵa lo likubuchizgeni nge mo lingachitiya kwa ankhungu.  Pakuti mosi mwe ŵana a ukweru, kweniso ŵana a msana. Te a usiku pamwenga a mdima cha.  Mwaviyo, tingalutirizganga cha kugona nge mo anyaki wosi achitiya, kweni tije masu ndipu tilutirizgi kuŵanaŵana umampha.  Pakuti wo agona, agona ndi usiku, ndipu wo aloŵe, aloŵe ndi usiku.  Kweni kwaku isi te a ukweru, tilutirizgi kuŵanaŵana umampha, tivwali chivwanu ndi chanju nge chakuvikiliya pachifuŵa, ndipuso chilindizga cha utaski nge chisoti.  Pakuti Chiuta wakutisankha kuti tikumani ndi ukali waki cha, kweni kuti tisaniyi utaski kuziya mwaku Yesu Khristu, Ambuyafwi. 10  Iyu wakutifwiya kuti kwali tilutirizgi kuja masu, kwali tigoni,* tijengi ndi iyu. 11  Mwaviyo, lutirizgani kuchiskana* ndi kuzengana, nge mo muchitiya kali. 12  Abali, sonu titikupemphani kuti muŵatumbikengi ukongwa wo agwira ntchitu mwaphamphu pakati pinu ndipuso wo atikulongozgani mwa Ambuya ndi kukulunguchizgani. 13  Ndipuso muŵatumbikengi ndi kuŵayanja ukongwa ­chifukwa cha ntchitu yawu. ­Mujengi mwachimangu ndi anyinu. 14  Kweniso, titikupemphani abali kuti ­mutcheŵeskengi* wo achita vinthu mwambula kwenere, mupembuzgengi wo asuzgika maŵanaŵanu,* muwovyengi akulopwa, ndipu mujengi akuzika kwaku wosi. 15  Muwonesesi kuti paŵevi wakuweze chiheni pa chiheni ku munthu weyosi, kweni nyengu zosi muchitiyanengi vinthu vamampha ndipu muchitengi so venivi ku ŵanthu anyaki wosi. 16  Nyengu zosi mukondwengi. 17  Mupempherengi nyengu zosi. 18  Muwongengi pa chinthu chechosi. Venivi ndivu Chiuta wakhumba kuti muchitengi mwaku Khristu Yesu. 19  Mungazimwanga cha motu wa mzimu. 20  Mungayuyuwanga mauchimi cha. 21  Musimikiziyengi vinthu vosi, mukoleskengi cho ntchamampha. 22  Mungachitanga cha chiheni chamtundu wewosi. 23  Chiuta wa chimangu wakutoweseni mwakufikapu. Ndipu abali, mzimu wo mulongo, umoyu winu kweniso liŵavu linu, vije vamampha mu kanthu kekosi, vilutirizgi kuja vambula kalema mu zuŵa la kuŵapu kwaku Yesu Khristu, Ambuyafwi. 24  Yo watikudanani ngwakugomezgeka ndipu wazamuchita nadi venivi. 25  Abali, lutirizgani kutipemphere. 26  Tawuzgani abali wosi ndi kufyofyonthana mwakupaturika. 27  Nditikulamulani mwa A­mbuya kuti kalata iyi yiŵerengeki kwa abali wosi. 28  Wezi ukulu waku Yesu Khristu, Ambuyafwi, uŵi namwi.

Mazu Ngam'mphata

Pamwenga kuti, “tigoni tulu ta nyifwa.”
Pamwenga kuti, “kupembuzgana.”
Pamwenga kuti, “mulunguchizgengi.”
Pamwenga kuti, “wo aguŵa.” Mazu ngaki chayingu, “wo ŵe ndi umoyu umana.”