1 Atesalonika 3:1-13

  • Paulo wafipa mtima wachilindizga ku Atene (1-5)

  • Timote watuza ndi nkhani yamampha (6-10)

  • Kupemphere Atesalonika (11-13)

3  Sonu tati tatondeka kukunthiyapu, tinguwona kuti nkhwakwenere kulutirizga kuja tija ku Atene.  Ndipu tingutumiza mubali widu Timote mweniyo ndi mteŵeti waku Chiuta* mu uthenga wamampha wakukwaskana ndi Khristu, kuti wazikuchiskeni* ndi kukupembuzgani pa chivwanu chinu,  kuti paŵevi wakusukunyika* ndi masuzgu ngenanga. Chifukwa yimwi muziŵa kuti tingavikhwecha cha venivi.*  Pakuti po tenga namwi limoza, takukambiyaningi limu kuti tikumanengi ndi masuzgu, ndipu nge mo muziŵiya, venivi ndivu vachitika.  Ndichu chifukwa chaki ndati ndatondeka kukunthiyapu, ndingukutumizgiyani Timote kuti ndiziŵi vakukwaskana ndi kugomezgeka kwinu, kuti panyaki Wakwesa yo, wangaŵa kuti wakuyesani ndipuso kuti panyaki ntchitu yidu, yingaŵa kuti yaluta paŵaka.  Kweni Timote wafika ŵaka sonu kunu kutuliya kwaku yimwi, ndipu watikambiya nkhani yamampha yakukwaskana ndi kugomezgeka kwinu ndipuso chanju chinu, kuti nyengu zosi mutitikumbuka mwachanju, ndipuso kuti mukhumbisiska kuzitiwona nge mo nasi so tikhumbisiskiya kuzikuwonani.  Ndichu chifukwa chaki abali, chinanga kuti titimbanyizgika maŵanaŵanu* ndipuso te ndi masuzgu, tapembuzgika chifukwa chaku yimwi ndipuso kugomezgeka kwinu.  Chifukwa tija so ndi nthazi* asani yimwi muleka kusukunyika mwa Ambuya.  Kumbi isi tingalongo wuli kuti tiwonga Chiuta pa nkhani yakukwaskana ndi yimwi, kuti tiwezi likondwa lo te nalu pa masu paku Chiuta widu chifukwa chaku yimwi? 10  Usiku ndi msana tiŵeyere Chiuta ndi mtima wosi kuti tizikuwoneni pa masu ndi pa masu* ndi kukupaskani vo musoŵa pa chivwanu chinu. 11  Yiwu ŵeneku Awusefwi kweniso Chiuta widu limoza ndi Yesu, Ambuyafwi, atijuliyi nthowa, kuti tizi kwaku yimwi. 12  Ndipuso Ambuya akuwovyeni kuti mukuwi kweniso kuti muyanjanengi ukongwa ndipuso muyanjengi ŵanthu anyaki wosi nge mo tichitiya ndi yimwi, 13  ndi chilatu chakuti akhwimisi mitima yinu, kuti yije yambula kalema ndipuso yakupaturika pa masu paku Chiuta widu Awusefwi, pa nyengu ya kuŵapu kwaku Yesu, Ambuyafwi, limoza ndi akupaturika ŵaki wosi.

Mazu Ngam'mphata

Panyaki kuti, “mweniyo wagwiriya limoza ntchitu ndi Chiuta.”
Pamwenga kuti, “wazikukhwimiseni.”
Mazu ngaki chayingu, “wakupingika.”
Pamwenga kuti, “kuti venivi vitenere kutichitikiya.”
Mazu ngaki chayingu, “kuti tisoŵa vinthu vakukhumbika.”
Mazu ngaki chayingu, “tija ndi umoyu.”
Mazu ngaki chayingu, “tiziwoni chisku chinu.”