1 Atesalonika 2:1-20

  • Uteŵeti waku Paulo ku Tesalonika (1-12)

  • Atesalonika alonde mazu ngaku Chiuta (13-16)

  • Paulo wakhumbisiska kuwona Atesalonika (17-20)

2  Abali, yimwi mwaŵeni muziŵa kuti kuza kwidu kwaku yimwi kwenga kwambula phindu cha.  Pakuti chinanga kuti pakwamba tingusuzgika ukongwa ndipu angutichita chipongu ku Filipi nge mo muziŵiya, tinguchita chiganga chifukwa chaku Chiuta widu kuti tikukambiyeni uthenga wamampha waku Chiuta ndipu tinguchita ivi tichisuskika* ukongwa.  Pakuti tingukudandawuliyani chifukwa cha kulandizgika maŵanaŵanu cha, pamwenga unyakazi pamwenga uryarya,  kweni nge mo Chiuta wazomereze kuti watipaski ntchitu yakupharazga uthenga wamampha, nasi tilongoro kuti tikondwesi ŵanthu cha, kweni Chiuta yo wasanda mitima.  Ndipu muziŵa kuti tingu­longoro mwauryarya cha, pamwenga kukunyetani phula mumasu chifukwa cha mbunu; Chiuta ndi kaboni!  Ndipuso tipenja unkhankhu kutuliya ku ŵanthu cha, kwali nkhwaku yimwi pamwenga ku ŵanthu anyaki, chinanga kuti tatingi tijengi mphingu yikulu pakuti te akutumika aku Khristu.  Kweni tinguja akuzika pakati pinu, nge mo munthukazi wakonkhesa wachitiya pakuphwere ŵana ŵaki mwachanju.  Sonu chifukwa chakuti titikuyanjani ­ukongwa, tingusimikiza* kukupaskani uthenga wamampha waku Chiuta pe cha, kweni kukupaskani ndi umoyu widu viyo, chifukwa titikuyanjani ukongwa.  Abali, kukamba uneneska mukumbuka ntchitu yo tagwiranga mwaphamphu kweniso mwakufyoka nayu. Tagwiranga ntchitu msana ndi usiku tichikupharazgiyani uthenga wamampha waku Chiuta, kuti tileki kupereka mphingu yikulu kwaku weyosi waku yimwi. 10  Yimwi mwe akaboni ŵangu ndipu Chiuta nayu so ndi kaboni, kuti tinguja akugomezgeka, arunji ndipuso ambula chifukwa tichichita vinthu ndi yimwi. 11  Muziŵa kuti nge mo ada achitiya ndi ŵana ŵawu, tingulutirizga kukuchiskani, kukupembuzgani ndipuso kupereka ukaboni kwaku weyosi waku yimwi, 12  kuti mulutirizgi kwenda nge mo Chiuta wakhumbiya, yo watikudaniyani ku Ufumu waki ndipuso ku unkhankhu waki. 13  Kukamba uneneska, ndichu chifukwa chaki titimuwonga nadi Chiuta mwambula kulekezga, pakuti mwati mwalonde mazu ngaku Chiuta ngo munguvwa kwaku isi, mungungalonde nge kuti ndi mazu nga ŵanthu cha, kweni nge mazu ngaku Chiuta, ndipu ndimu ngaliri nadi. Mazu ngenanga ngagwira so ntchitu mwaku yimwi akugomezga. 14  Pakuti yimwi abali munguyezga mipingu yaku Chiuta yakukoliyana ndi Khristu Yesu yo ye ku Yudeya, chifukwa mungutombozgeka mu manja mwa ŵanthu amtundu winu, nge mo nawu so angutombozgeke mumanja mwa Ayuda. 15  Ayuda ŵenaŵa angufika mpaka pakubaya Ambuya Yesu, achimi ndipuso angutitombozga. Kweniso akondwesa Chiuta cha, ndipu vo achita vakovya cha ku ŵanthu wosi. 16  Achita venivi kuti atitondekesi kulongoro ndi ŵanthu amitundu yinyaki, ndi chilatu chakuti ŵanthu ŵenaŵa aleki kutaskika. Achichita viyo, atijizaziya mwesu wa maubudi ngawu. Kweni sonu ukali waki waza paku yiwu. 17  Kweni tati tatuzgikaku kwaku yimwi kwa nyengu yimanavi (pa masu ndi pa masu, kweni mumitima yidu cha), chifukwa takhumbisiskanga ukongwa, tinguyesesa kuti tikuwoneni pa masu ndi pa masu.* 18  Pa chifukwa chenichi, takhumbanga kuza kwaku yimwi ndipu ini Paulo, ndingwesapu kamoza pe cha, kweni kaŵi. Kweni Satana wangutijaliza nthowa. 19  Kumbi chilindizga chidu, likondwa lidu pamwenga chisoti chidu cha ufumu chakunyadiya pa masu pa Ambuya Yesu pa nyengu ya kuŵapu kwawu, ndi vinthu wuli? Asi ndimwi? 20  Yimwi ndimwi nadi unkhankhu widu ndi likondwa lidu.

Mazu Ngam'mphata

Panyaki kuti, “chinanga kuti tasuzgikanga.”
Mazu ngaki chayingu, “tingukondwa ukongwa.”
Mazu ngaki chayingu, “kuti tiwoni visku vinu.”