1 Akorinto 8:1-13

  • Nkhani yakukwaskana ndi vakurya vakuperekeka ku angoza (1-13)

    • Kwaku isi kwe Chiuta yumoza pe (5, 6)

8  Sonu pa nkhani yakukwaskana ndi chakurya chakuperekeka ku angoza: Tiziŵa kuti tosi tiziŵa vinthu. Kuziŵa vinthu kuchitiska munthu kujikuzga kweni chanju chizenga.  Asani munthu munyaki waŵanaŵana kuti waziŵa chinthu chinyaki, ndikuti wechendafikepu pakuchiziŵa nge mo wakhumbikiya.  Kweni asani munthu munyaki watanja Chiuta, munthu mwenuyu waziŵika ndi iyu.  Sonu pa nkhani yakukwaskana ndi chakurya chakuperekeka ku angoza, tiziŵa kuti ngoza nkhanthu cha mucharu, ndipuso kuti kulivi so Chiuta munyaki kweni yumoza pe.  Pakuti chinanga kuti kwe anandi wo adanika kuti achiuta, kwali nkhuchanya pamwenga pacharu nge mo viliri kuti kwe “achiuta” anandi ndipuso “ambuya” anandi,  kweni kwaku isi kwe Chiuta yumoza, Ada, mweniyo chifukwa chaku iyu, vinthu vosi vilipu ndipuso isi te ŵaki. Kweniso kwe Mbuya yumoza Yesu Khristu, mweniyo kuporote mwaku iyu vinthu vosi vilipu, ndipu isi so kuporote mwaku iyu.  Kweni ndi wosi cha wo aziŵa venivi. Anyaki chifukwa chakuti anguziŵiliya angoza, aturya chakurya chenichi nge kuti ntchakuperekeka ku angoza, ndipu pakuti njuŵi yawu njambula nthazi, yifipiskika.  Kweni chakurya chingatiwovya cha kuti tindere kufupi ndi Chiuta. Asani tileka kurya te aheni cha, ndipu asani titurya te amampha ukongwa cha.  Kweni lutirizgani kuphwere, kuti nyengu zinyaki wanangwa winu wa kusankha ungaja chakuguŵiska ku ŵanthu ambula nthazi. 10  Pakuti asani munthu munyaki watikuwona yiwi wakuziŵa vinthu uturya munyumba yakusopiyamu ngoza, kumbi njuŵi ya munthu uyu, mweniyo ngwambula nthazi yingamuchitiska cha kuja ndi chiganga mpaka kurya chakurya chakuperekeka ku angoza? 11  Mwaviyo, chifukwa cha kuziŵa vinthu kwaku, munthu wakulopwa wanangika, mubali waku, mweniyo Khristu wakumufwiya. 12  Asani munangiya abali ŵinu mu nthowa yeniyi, ndipu mupweteka njuŵi zawu zambula nthazi, munangiya Khristu. 13  Ndichu chifukwa chaki asani chakurya chiguŵiska mubali wangu, ndazamuryapu so cha nyama, kuti ndileki kuguŵiska mubali wangu.

Mazu Ngam'mphata