1 Akorinto 5:1-13

  • Nkhani ya malusu ngaheni ngakugonana (1-5)

  • Chakutupisa chimanavi, chitupisa bulunga losi (6-8)

  • Munthu muheni watuzgikepu (9-13)

5  Kwavwika kuti pakati pinu pe lusu liheni lakugonana* ndipu lusu lenili ndakuti lichitika cha ndi ŵanthu amitundu. Ndavwa kuti munthu munyaki waja ndi* muwolu wa awisi.  Kumbi mutijikuzga chifukwa cha venivi? Asi mungwenere kuchita chitima, kuti munthu yo wachita venivi watuzgikepu pakati pinu?  Chinanga kuti mwakuliŵavu nde kweniko cha, kweni nde kweniko mumaŵanaŵanu* ndipu ndamuyeruzga kali munthu yo wachita venivi nge kuti nde namwi kweniko.  Asani muwungana pamoza mu zina la Ambuya Yesu, ndipu muziŵa kuti mumaŵanaŵanu* nde namwi, limoza ndi nthazi ya Ambuya Yesu,  muperekeni kwaku Satana munthu waviyo kuti liŵavu laki linangiki, ndi chilatu chakuti mzimu utaskiki mu zuŵa la Ambuya.  Kujiŵikamu kwinu nkhwamampha cha. Kumbi muziŵa cha kuti chakutupisa chimanavi, chitupisa bulunga losi la fulawu wakukasa?  Tuzganipu chiŵandi chakali kuti muje chiŵandi chasonu, ndi chilatu chakuti muleki kutupisika. Pakuti kukamba uneneska, Khristu mbereri yidu ya Pasika, waperekeka kuŵa sembi.  Mwaviyo tiyeni tichiti phwandu lenili kwambula chakutupisa chakali pamwenga kwambula chakutupisa chiheni ndipuso chaubudi, kweni tichiti ndi chiŵandi chambula chakutupisa, chamampha ndi chauneneska.  Mukalata yangu ndingukulembiyani kuti muleki kwanjana* ndi ŵanthu a malusu ngaheni ngakugonana.* 10  Ndang’anamuwanga kuti muŵakhwechiyengi limu cha ŵanthu a mucharu ichi a malusu ngaheni ngakugonana* pamwenga ambunu, pamwenga akuphanga, pamwenga akusopa angoza. Chifukwa asani vingaŵa viyo, ndikuti mwatingi mukhumbikengi kutuwamu mucharu ichi. 11  Kweni sonu nditikulembiyani kuti muleki kwanjana* ndi munthu weyosi yo wadanika kuti mubali mweniyo we ndi malusu ngaheni ngakugonana* pamwenga ndi munthu wambunu pamwenga wakusopa angoza pamwenga wakutuka* pamwenga wakuloŵe pamwenga wakuphanga. Muleki chinanga nkhurya nayu munthu waviyo. 12  Kumbi kuyeruzga ŵanthu akubwalu ndi ntchitu yangu? Asi muyeruzga ŵanthu amukati, 13  penipo Chiuta wayeruzga akubwalu? “Mutuzgenipu munthu muheni yo pakati pinu.”

Mazu Ngam'mphata

Malusu ngaheni ngakugonana. Mu Chigiriki, por·neiʹa. Wonani Mazu ngo Ngakonkhoskeka.
Mazu ngaki chayingu, “wato.”
Mazu ngaki chayingu, “mu mzimu.”
Mazu ngaki chayingu, “mu mzimu.”
Pamwenga kuti, “kuchitiya limoza vinthu.”
Mu Chigiriki, por·neiʹa. Wonani Mazu ngo Ngakonkhoskeka.
Mu Chigiriki, por·neiʹa. Wonani Mazu ngo Ngakonkhoskeka.
Pamwenga kuti, “kuchitiya limoza vinthu.”
Mu Chigiriki, por·neiʹa. Wonani Mazu ngo Ngakonkhoskeka.
Pamwenga kuti, “wakutondowo.”