1 Akorinto 13:1-13

  • Chanju chiluska vosi (1-13)

13  Asani ndilongoro mu malilimi nga ŵanthu ndipuso mu malilimi nga angelu kweni ndilivi chanju, ndikuti ndaja nge belu lo litumbatumba ŵaka pamwenga chibeketi cho chichita chiwawa.  Ndipu asani nde ndi mphasu yakukamba mauchimi, mphasu yakuvwisa visisi vosi vakupaturika, mphasu yakuziŵa vinthu vosi ndipuso nde ndi chivwanu chosi mwakuti ndingandelezga mapiri,* kweni ndilivi chanju, mbwenu nde kanthu cha.*  Asani ndipereka vinthu vangu vosi kuti ndiryisi ŵanthu anyaki, ndipuso asani ndipereka liŵavu langu kuti ndijiŵikemu, kweni ndilivi chanju, mbwenu palivi cho ndiyanduwa.  Chanju chizizipizga ndipuso ntchalisungu. Chanju chichita sanji cha. Chanju chitijilumba cha, chitijikuzga cha,  chichita vinthu vambula kwenere cha,* chikhumba vakuchija cha ndipuso chikwiya cha. Chisunga vifukwa cha.*  Chikondwa cha ndi vinthu vambula urunji, kweni chikondwa ndi uneneska.  Chiwundiya vinthu vosi, chigomezga vinthu vosi, chilindizga vinthu vosi ndipuso chikunthiyapu vinthu vosi.  Chanju chimala cha. Kweni asani kwe mphasu zakukamba mauchimi, zazamumala; asani kwe malilimi, ngazamumala.* Asani kwe kuziŵa vinthu kwazamumala.  Pakuti tiziŵa vinthu mwakupereŵere ndipuso tikamba mauchimi mwakupereŵere, 10  kweni po chiziyengi chakukwana, chakupereŵere chazamumala. 11  Pa nyengu yo ndenga mwana, ndalongoronga nge mwana, ndaŵanaŵananga nge mwana, ndawonanga vinthu nge mwana; kweni sonu pakuti ndakuwa, ndaleka kuchita vinthu nge mwana. 12  Pa nyengu yinu, tiwona ŵaka vulumutiyi mwakugwiriskiya ntchitu gilasi lachisulu, kweni pa nyengu yo, tazakuviwona masu ndi masu. Pa nyengu yinu, ndiziŵa vinthu mwakupereŵere, kweni pavuli paki ndazamuziŵa mwakukwana,* nge mo ndiziŵikiya umampha. 13  Kweni vinthu vitatu ivi vilutirizga kuŵapu: chivwanu, chilindizga ndipuso chanju; kweni chikulu ukongwa pa venivi, ntchanju.

Mazu Ngam'mphata

Pamwenga kuti, “mwakuti ndinganyamuwa mapiri ndi kuchingajalika panyaki.”
Pamwenga kuti, “nde wabwekabweka.”
Pamwenga kuti, “chichita mtafu cha.”
Pamwenga kuti, “Chiweze viheni cha.”
Kung’anamuwa kulongoro vineneru vinyaki mwakuziziswa.
Pamwenga kuti, “umampha.”