Julani

Makalata Ngakutuwa Ku Ŵeneku a Nyumba

Makalata Ngakutuwa Ku Ŵeneku a Nyumba

Pambula kuswera yapa, Akaboni aku Yehova akumaliza ntchitu ya kusazgiyaku maofesi nga nthambi mutawuni ya Wallkill ku New York ndipu ntchitu iyi yinguto vyaka 6. Po ntchitu iyi yalutanga panthazi, mu vyaka viŵi va kukumaliya Akaboni akhumbikanga kuchita lendi nyumba zinyaki kuti alendu wo anguza kuzigwira ntchitu yeniyi mwakujipereka ajengemu. Mwamwaŵi, angusaniya nyumba za lendi zakukwana 25 zo zenga mu dera lakuzunguliya ofesi ya nthambi.

Vo Angukamba Vakukwaskana Ndi Alendi

Kumbi ŵeneku a nyumba anguvwa wuli ŵati awona kuti Akaboni aku Yehova achita lendi nyumba zawu?

  • Ma munyaki yo ndi mweneku wa nyumba wangulemba kuti: “Tingukondwa ukongwa ndi wo ajanga munyumba yo tachitisangamu lendi. Ini ndi mulumu wangu tija pafupi ukongwa ndi [nyumba yidu yo Akaboni achitamu lendi] ndipu nyengu zosi tikondwa ukongwa chifukwa chakuti tija nawu mwakukoliyana ndipuso tichita nawu vinthu mwachimangu.”

  • Ma munyaki so yo wajanga pafupi ndi nyumba yaki yo wachitisanga lendi, pakukamba za wo ajanga munyumba mwaki wangulemba kuti: “Nyengu zosi tajanga nawu umampha. Kuseli kwa nyumba yidu kwe ka damu ko tisambiyaku ndipu kaŵikaŵi anyamata azanga kuzisambaku asani akhumba. Posi po angaziya, yiŵu achitanga nasi vinthu mwa ulemu. Kukamba uneneska, takondwanga nawu ukongwa ndipu tiŵasoŵengi.” Ma uyu wangulutirizga kulemba kuti: “Techendajepu ndi ŵanthu amampha nge ŵenaŵa.”

  • Da munyaki so yo nayu wachitisa lendi wangukamba kuti: “Chenga chinthu chakukondweska ukongwa, ndipu ndajanga nawu nge alendi cha kweni nge ŵanthu wo andiwovyanga.”

Vo Angukamba Vakukwaskana ndi Alendu Wo Anguphwere Nyumba Zawu

Kumbi ŵeneku anyumba angukambanji vakukwaskana ndi nyumba zo Akaboni achitangamu lendi?

  • “Nyengu zosi ŵanthu yaŵa aperekanga ndalama ya lendi pa nyengu yaki ndipu nyumba nazu aziphweriyanga so umampha.”

  • Da munyaki yo tamuzumbuwapu kali kukwamba wangulutirizga kukamba kuti “titikuwongani ukongwa Akaboni aku Yehova chifukwa chakuphwere umampha nyumba zidu ndipu taziŵanga cha kuti mungaziphwere viyo.”

  • Ma munyaki wangukonkhoska kuti “Chifukwa chakuti tiziŵa kuti Akaboni aku Yehova achita vinthu mwakugomezgeka, tinguŵakambiya kuti angatipaskiyanga limu cha ndalama zakunozge nyumba asani aleka kuyiphwere. Pa nyengu yo asamiyanga, angusiya nyumba zidu ze zakutowa ukongwa.”

  • Akaboni ŵati amaliza kunozga vinthu vinyaki pa nyumba, mweneku wanyumba wanguŵafumba kuti: “Kumbi vingachitika kuti ndizikudaneni so asani nde ndi ntchitu yinyaki? Asani mwalayizga kuti mumalizengi ntchitu pa zuŵa lakuti, mumaliza nadi pa zuŵa lenilo. Ŵanthu wo atindinozge nyumba zangu kanandi akamba ŵaka kweni afiska cha phanganu.”

Vo Angukamba Kuti Alongo Kuwonga

  • Zuŵa lepafupi lakuti ŵanthu wo achitanga lendi munyumba yinyaki atuwemu, mweneku wa nyumba wangulemba kalata yakuti Akaboni akalutirizgengi kuja munyumba iyi ndatingi “ndiŵatuzgiyengeku ndalama za lendi.”

  • Munthu munyaki wangukamba so kuti: “Asani pangasanirika mwaŵi wakuti Akaboni apenja nyumba za lendi, ndingayanja kuŵapaska so nyumba yangu.”