Julani

Lutani pa menyu yachiŵi

Akaboni aku Yehova

Chitonga (Malawi)

Ŵanthu Akwanja Chimangu Angukumana pa Chiwoneseru cha Armada

Ŵanthu Akwanja Chimangu Angukumana pa Chiwoneseru cha Armada

Kwambiya pa 6 mpaka pa 16 June 2013, ŵanthu mamiliyoni azanga ku jiti ku Rouen ku nkhondi kwa France. Yiwu azanga kuziwona masitima pa chiwoneseru chikulu ukongwa pa charu chosi cho chidanika kuti Armada.

Pavuli pakwenda kwa mtunda wa makilomita 120 mu msinji wakukhotakhota wa Seine wo we ku Normandy, masitima ngakutowa ukongwa kweniso ngatalingatali ngangufika pa jiti po pachitikiyanga chiwoneseru chenichi. Jiti ili nditali makilomita 7. Kwa mazuŵa 10, ŵanthu ŵenga ndi mwaŵi wakusere m’masitima ngakutowa kweniso ngatalingatali pafupifupi 45 ngo ngenga pa chiwoneseru ichi.

Ntchinthu wuli cho chinguchitisa kuti ŵanthu akupambanapambana aluti ku chiwoneseru ichi? Wo achitisanga chiwoneseru ichi angukamba kuti ŵanthu ŵenga ndi mwaŵi “wakuti afiki pafupi ndi masitima ngakulungakulu ngo titingalota.” Mbuneneska, masitima yanga ngachitisa nadi ŵanthu anandi ara pamwenga ŵana kujiyeruzgiya kuti ŵe pa ulendu utali kweniso aja mwachimangu.

Ŵanthu masawuzandi nganandi wo anguza pa chiwoneseru ichi ŵenga so ndi mwaŵi wakuvwa uthenga unyaki wa chimangu. Chimangu cho Bayibolu likonkhoska. (Yohane 8:31, 32) Achiyendayenda pa malu nga chiwoneseru chenichi po pazazanga ukongwa, ŵanthu awonanga so timashelufu tamatayala to Akaboni aku Yehova agwirisiyanga ntchitu. Asani ŵanthu yaŵa aza pafupi ndi timashelufu teniti, aŵakambiyanga kuti angatopu buku lelosi kwawezi. Ŵanthu anandi angwanja nkhani yakuti, “Charu Chambula Sankhu Chiŵengeku Zukwanji?” yo yenga mu Chigongwi cha Alinda. Apemphekanga so kuti azisanirikepu pa nkhani yakutuliya m’Bayibolu yo yingukambika mu Chifurenshi, Chingelezi ndipuso Chisipanishi.

Ŵanthu akwenuku anguŵawonga ukongwa Akaboni. Munthurumi munyaki yo pakwamba wanguzizwa wati wawona Akaboni ndi timashelufu wangukamba kuti: “Ndakondwa ukongwa kukuwonani mumusewu. Nditiŵawonga ukongwa ŵanthu wo achita vo agomeza, chinanga kuti ini ndigomeza vo imwi mugomeza cha.” Anthurumi arara ŵaŵi wo angukumana ndi achinyamata wo apharazganga pa chiwoneseru ichi anguŵakambiya kuti: “Munyadiyengi vo mugomeza!”