Julani

Lutani pa menyu yachiŵi

Akaboni aku Yehova

Chitonga (Malawi)

Ntchitu Yakusindikiza Mabuku Pacharu Chosi yo Yitovya Ŵanthu Kuziŵa Chiuta

Ntchitu Yakusindikiza Mabuku Pacharu Chosi yo Yitovya Ŵanthu Kuziŵa Chiuta

Pacharu chosi chapasi, ŵanthu aŵerenga mabuku nga Akaboni aku Yehova. Ŵanthu mamiliyoni nganandi aŵerenga mabuku ngenanga kuziya pa intaneti nge mo imwi muchitiya yapa. Kweni mungazizwa kuziŵa vo tichita pa ntchitu yidu yakusindikiza mabuku. Chichifika chaka cha 2013, tasindikizanga mabuku mu vineneru pafupifupi 700 ndipu tangagaŵiyanga mu vyaru 239.

Chechendafiki chaka cha 1920, mabuku ngidu ngasindikizikanga ndi makampani nganyaki ngo ngachita bizinesi. Kweni kutuliya mu chaka chenichi, tingwamba kusindikiza tija magazini kweniso mabuku ngidu nganyaki. Ntchitu iyi yagwirikiyanga mukanyumba kanyaki ku Brooklyn, New York. Kweni sonu tisindikiza mabuku ngidu mumalu ngakukwana 15 ngo nge ku Africa, Asia, Australia, Europe, North America, ndi ku South America.

Buku Lakukhumbika Ukongwa

Buku lakukhumbika ukongwa lo tisindikiza ndi Bayibolu. Mu 1942, ndimu tingusindikiza Bayibolu kakwamba. Bayibolu ili lenga la Chingelezi la King James Version. Kutuliya mu 1961, Akaboni aku Yehova afwatuliya kweniso kusindikiza Bayibolu losi la New World Translation of the Holy Scriptures. Chichifika chaka cha 2013, ndipu tasindikizapu kali Mabayibolu ngenanga ngakujumpha 184 miliyoni mu vineneru 121.

Chinanga kuti tisindikiza Mabayibolu nganandi, kweni ngaja so ngakukho ukongwa. Mapepala ngo tigwirisiya ntchitu ngaŵavi asidi yo wachitisa kuti mapepala ngabikiliyengi asani pajumpha nyengu. Mabayibolu ngidu titingamata umampha ukongwa kuti mapepala ngaleki kukhejuka. Ivi vichitisa kuti ngaje ngakukho ukongwa.

Mabuku Nganyaki

Tisindikiza so mabuku nganyaki ngo ngatovya ŵanthu kulivwisa umampha Bayibolu. Wonani viŵerengeru va mabuku nganyaki ngo tingusindikiza mu 2013:

  • Chigongwi cha Alinda: Iyi ndiyu magazini yidu yo yipharazgika ukongwa ndipu yisindikizika mu vineneru vakujumpha 210 kweniso ndiyu yakuwanda ukongwa pacharu chosi chapasi. Pa magazini yeyosi yo yija ndi mapeji 16, tisindikiza magazini pafupifupi 45,000,000.

  • Jani Masu! Magazini iyi yitende limoza ndi magazini ya Chigongwi cha Alinda ndipu nayuso njakuwanda ukongwa. Magazini iyi yisanirika mu vineneru 99. Pa magazini yeyosi, tisindikiza magazini pafupifupi 44,000,000.

  • Kumbi Bayibolo Lisambizanji Weniukongwa? Ili ndi buku la mapeji 224 lo likulembeka kuti liwovyi ŵanthu kuvwisa visambizu vakwamba va m’Bayibolu. Kutuliya mu chaka cha 2005, mabuku ngakujumpha 214 miliyoni ngasindikizika kali mu vineneru vakujumpha 240.

  • Vwiyani Chiuta: Yaka nkhabuku ka mapeji 32 ko kakulembeka kuti kawovyi wo asuzgika kuŵerenga. Kasambiza ŵanthu visambizu vipusu va m’Bayibolu mwakugwirisiya ntchitu vithuzi ndi mazu ngamanavi. Mabuku ngakujumpha 42 miliyoni ngakusindikizika mu vineneru vakujumpha 400.

Kusazgiyapu pa mabuku yanga, Akaboni aku Yehova asindikiza so vinthu vakupambanapambana nge mabuku, timabuku kweniso timapepala. Vinthu ivi vitovya wo asambira Bayibolu kumukika mafumbu ngawu kutuliya m’Bayibolu, kuzizipizga masuzgu ndipuso kuja ndi mabanja ngalikondwa. Mu 2012, Akaboni aku Yehova angusindikiza magazini ngakujumpha 1.3 biliyoni ndipuso mabuku ndi Mabayibolu 80 miliyoni.

Mu 2012 Akaboni aku Yehova angusindikiza magazini ngakujumpha 1.3 biliyoni ndipuso mabuku ndi Mabayibolu 80 miliyoni

Ŵanthu wo atuza kuziwona malu ngo tisindikiziyaku mabuku azizwa kuwona mo ŵanthu wo agwira ntchitu kumalu yanga atijipereke. Yiwu agwirisiya ntchitu nthazi kweniso nyengu yawu. Anandi mwa ŵanthu yaŵa asambira ntchitu yakusindikiza asani afika waka pa Beteli, zina lo ling’anamuwa kuti “Nyumba yaku Chiuta.” Yiwu asambira liŵi ntchitu chifukwa cha masambiru ngo alonde, malu ngamampha ngakugwiriya ntchitu ndipuso ŵanthu wo agwira nawu ntchitu. Ku malu yanga kwe achinyamata anandi a vyaka va m’ma 20 wo agwira ntchitu yakusindikiza mabuku mwakugwirisiya ntchitu makina ngo ngasindikiza magazini 200,000 pa ola limoza. Magazini yanga ngaja nga mapeji 16.

Kumbi Ndalama Zakugwiriya Ntchitu Iyi Zituwa Pani?

Ndalama zo ŵanthu apereka mwakukhumba kwawu ndizu zitovya pa ntchitu ya pacharu chosi ya Akaboni aku Yehova. Magazini ya Zion’s Watch Tower, yo sonu titiyidana kuti Chigongwi cha Alinda ya August 1879 yingukamba kuti: “ ‘Isi tigomeza kuti YEHOVA ndiyu watendesa ntchitu yakusindikiza magazini ya Zion’s Watch Tower, mwaviyo tazamupemphesapu cha pamwenga kuŵeyere ŵanthu kuti atiwovyi pa ntchitu yeniyi.” Ndiyu fundu yo titende so mazuŵa nganu.

Ntchifukwa wuli timaliya nyengu yidu yinandi, nthazi kweniso ndalama pa ntchitu iyi? Chifukwa tigomeza kuti asani imwi mwaŵerenga Bayibolu ndi mabuku ngidu, kaya ngakusindikizika pamwenga pa intaneti, ngakuwovyeningi kundere kufupi ndi Chiuta.