Julani

Lutani pa menyu yachiŵi

Akaboni aku Yehova

Chitonga (Malawi)

Sumu Zakuthamika Chiuta mu Vyaka 100

Sumu Zakuthamika Chiuta mu Vyaka 100

“Ndipenja kuti iwi uluti ku Studiyo ya Columbia ku New York kuti ukambi yimoza mwa sumu zidu. Yiwu akuyijambula mwapachanya ukongwa. Kukambiya weyosi cha vo wamuchita.”

William Mockridge

Chakukumaliya kwa chaka cha 1913, William Mockridge wangumaliza kugwira ntchitu iyi yo wangutumika ndi Charles Taze Russell. * Sumu yeniyi yo ŵanthu anyaki ayiziŵanga ndi mutu wakuti “Pambula Kuswera,” yingujambulika ndi kuŵikika pa chimbali. Pavuli paki, William wanguvwa kuti sumu iyi ndiyu yamuja kalambula bwalu wa “Sinema ya Vithuzi va Chilengendu.” Sinema iyi yenga ya vidiyo yo nkhani zaki zingutuliya m’Bayibolu. Mu sinema iyi mwenga so sumu ndipu angusazgamu vithuzi vo vasinthangasinthanga. “Seŵeru la Vithuzi” anguliwonesa kakwamba ku New York mu January 1914.

Sumu yo William wangumba njimoza mwa sumu zakujumpha 50 zo azigwirisikiyanga ntchitu pakuwonesa “Sinema ya Vithuzi” ya Chingelezi. Chinanga kuti sumu zinyaki zo agwirisiyanga ntchitu zingupangika ndi ŵanthu anyaki, kweni sumu zinyaki zimanavi kusazgapu yaku William, zingupangika ndi Akusambira Bayibolu. Sumu zenizi zingutuliya mu buku lawu la sumu lo laziŵikanga kuti Hymns of the Millennial Dawn.

Kuŵanaŵaniya Vo Sumu Zikamba

Kwa vyaka vinandi, Akaboni aku Yehova agwirisiyanga ntchitu sumu zo zalembekanga ndi akaboni cha. Kweni asani mphakwenere, asinthangamu m’malu nganyaki kuti vikoliyani ndi vo Malemba ngakamba.

Mwakuyeruzgiyapu, sumu yinyaki yo yambikanga pakuwonesa “Sinema ya Vithuzi” yenga ya mutu wakuti “Fumu Yidu ye Pa Ulendu,” ndipu yingutoleka pa sumu yo yingulembeka ndi Akaboni cha ya mutu wakuti, “Sumu ya Nkhondu ya Charu.” Vesi lakwamba la “Sumu ya Nkhondu” lenga ndi mazu ngakuti: “Masu ngangu ngawona unkhankhu wakuza so kwa Ambuya.” Kweni Akusambira Bayibolu angusintha mazu yanga ndipu sumu yawu yatingi: “Masu ngangu ngawona unkhankhu wakuŵapu kwa Ambuya.” Kusintha uku kwakoliyananga ndi vo yiwu agomezanga vakuti ulamuliru waku Yesu Khristu ukwaskana ndi kuza kwaki pe cha, kweniso kuŵapu kwaki.​—Mateyu 24:3.

Ŵati atuza buku lawu la sumu mu 1966, (Singing and Accompanying Yourselves With Music in Your Hearts) anguwonesesa kuti atuzamu sumu zosi zo zingulembeka ndi visopa vinyaki kweniso zo zingulembeka ndi ŵanthu wo ŵenga akaboni cha. Mu chaka chenichi, Akaboni angusankha ŵanthu wo ambanga vipangizu vakupambanapambana ndipu angujambula sumu zosi 119 zo zenga mu buku ili. Mu mipingu yakupambanapambana, Akaboni aku Yehova angwamba kugwirisiya ntchitu sumu zenizi pa maunganu ndipu anyaki azivwisiyanga kunyumba zawu.

Mu 2009, Akaboni aku Yehova angutuza buku lifya la sumu ndipu lenga ndi mutu wakuti Mbiyani Yehova. Sumu za mazu za m’buku lenili, zajambulikapu kali mu vineneru vinandi. Mu 2013 Akaboni angwamba kutuza sumu za mavidiyo za ŵana. Yimoza mwa sumu zenizi ye ndi mutu wakuti, Murombengi Nyengu Yeyosi. Ŵanthu wo agwirisiya ntchitu jw.org apanga dawunilodi sumu mamiliyoni nganandi mwezi wewosi.

Ŵanthu anandi awonga ukongwa chifukwa cha sumu zenizi. Pa kukamba za sumu za m’buku la Mbiyani Yehova, munthukazi munyaki zina laki Julie wanguti: “Sumu zasonu zamampha ukongwa! Asani nde ndija ndivwisiya sumu zo zikonkhosa mo ndivwiya m’mtima pa nyengu yo. Ivi vitindichitisa kuti ndije pa ubwezi wakukho ndi Yehova kweniso kuti ndiyesesengi kujipereka ndi mtima wosi kwaku iyu.”

Ma munyaki zina laki Heather, wangukonkhosa mo sumu yakuti Murombengi Nyengu Yeyosi yawovye ŵana ŵaki ŵaŵi wa vyaka 7 ndi 9. Sumu yeniyi “yaŵawovya kuti apempherengi asani kwacha, asani te limoza kweniso nyengu yeyosi yo yiwu awona kuti akhumba kukambisana ndi Yehova.”

^ ndimi 3 Charles Taze Russell (wangujaku kutuwa mu 1852–1916) ndiyu walongozganga Akusambira Bayibolu. Kali, Akaboni aku Yehova aziŵikanga kuti Akusambira Bayibolu.

Ziŵani Vinandi

VO VICHITIKA PA BETELI

Chiwoneseru cho Chilongo Mbiri Yidu ku Likulu Lidu

Ziŵani mbiri ya chikhristu kweniso ya Akaboni aku Yehova. Pa chiwoneseru ichi pakuŵikika vinthu vakupambanapambana nge vithuzi.