Julani

Lutani pa menyu yachiŵi

Akaboni aku Yehova

Chitonga (Malawi)

Mavidiyo ngo Ngakondwesa Ŵanthu

Mavidiyo ngo Ngakondwesa Ŵanthu

Pakukonkhosa za mavidiyo ngamutu wakuti, Jani Bwezi Laku Yehova, da munyaki wa ku Malaysia wangukamba kuti, “Venga nge kuti Yehova wavwisiya vo ve m’mitima ya apapi.”

Kutuliya po angutuziya mavidiyo ngakwamba, Akaboni aku Yehova alutiriza kutuza mavidiyo nganyaki nga makatuni ngo mwe Kalebe ndi ŵanthu a m’banja laki. Mavidiyo yanga ngo ngasanirika pa jw.org, ngasambiza ŵana mijalidu yamampha kweniso fundu za m’Bayibolu nge mo angapemphere kwaku Chiuta kweniso kuti kuba nkhuheni.

Mavidiyo ngakwamba ngakufwatulika kali mu vineneru 131, ndipu ngatovya ŵana pacharu chosi.

Mo Ŵanthu Angungalondere Mavidiyo Yanga

Ma yo we ndi ŵana 5 wangulemba kuti: “DVD yamutu wakuti, Muvwiyengi Kuti Mutumbikiki tayiwonere maulendu 50 kutuliya po tikuyilonde sabata yamala.”

Msungwana munyaki zina laki Millie yo we ndi vyaka 12 ndipu waja ku England, we ndi mzichi waki wa vyaka 15 zina laki Thomas. Mzichi waki mwenuyu watama matenda nganyaki nga muwongu. Millie wangukamba kuti: “Thomas we ndi mavidiyo ngaku Kalebe mu tabuleti yaki ndipu wawonesa anyaki kusukulu. Iyu watanja sumu za mavidiyo ngenanga. Ndipu watizimba umampha ukongwa mwakuti nyengu yinyaki mzichi munyaki wanguliya chifukwa chakuwona mo iyu wambiyanga. Ivi vitindikondwesa ukongwa.”

Ava yo wangukamba kuti we ndi vyaka 8, myezi 9 ndi mazuŵa 25, wangukamba kuti: “Kalebe ndi mzichi waki asambiza umampha ukongwa ŵana.”

Mikaylah wangukamba kuti: “Nde ndi vyaka 6. Ndawonga ukongwa chifukwa chakutipasa DVD ya Muvwiyengi Kuti Mutumbikiki. Yitindisambiza kuti nditenere kuvwiya apapi chifukwa kuchita viyo kukondwesa Yehova.”

Ngaja ndi Uthenga Wakukhumbika Ukongwa

Mnyamata munyaki yo wapanga mavidiyo nga makatuni kweni ndi Kaboni waku Yehova cha wanguwonere vidiyo yakuti Kuba Nkhuheni. Iyu wanguzizwa wati waziŵa kuti vidiyo iyi yingupangika ndi ŵanthu amanavi waka. Mnyamata uyu wanguti: “Ndiziŵana ndi ŵanthu wo agwira ntchitu mu masitudiyo ngakulungakulu kweniso ngamanangamana ngakupangiya mavidiyo nga makatuni. M’malu yanga muja ntchitu yikulu ukongwa ndipu atiyigwira kwa nyengu yitali. Mavidiyo ngo yiwu apanga kwa nyengu yitali, ŵanthu atingawonere ndi kusekapu kwa nyengu yimanavi waka. Kweni mavidiyo nginu ngasintha maumoyu nga ŵana chifukwa ngatiŵasambiza kupambanisa chamampha ndi chiheni kweniso kuti asankhengi umampha. Asani mupanga mavidiyo nginu muja ndi chilatu chifukwa ngatovya ŵanthu.”

Apapi pacharu chosi akoliyana ndi vo anyaki akambapu. Ma munyaki wangukamba kuti: “Zuŵa linyaki mwana wangu wa vyaka vitatu zina laki Quinn, wawoneriyanga vidiyo ya mutu wakuti, Gaining Jehovah’s Friendship. Mukatikati mwa sumu wangundileresa kumasu, wanguko janja laki pa mtima ndipu wangundikambiya kuti: ‘Ama, mtima wangu ukondwa ukongwa chifukwa chakuwonere vidiyo iyi.’ ”