Julani

Lutani pa menyu yachiŵi

Akaboni aku Yehova

Chitonga (Malawi)

Abali ndi Azichi wo Afwatuliya Chisipanishi Asamiya ku Spain

Abali ndi Azichi wo Afwatuliya Chisipanishi Asamiya ku Spain

Yesu wangukamba kuti uthenga wamampha wa Ufumu wazamupharazgika pacharu chosi chapasi. (Mateyu 24:14) Mabuku ngakukonkhosa Bayibolu nga Akaboni aku Yehova, ngakwamba kufwatulikiya mu Chisipanishi kwamba mu 1909. Ivi vawovya kuti ŵanthu avwengi uthenga wa Ufumu mu chineneru chawu. Pa vineneru vosi vo ve pacharu chapasi, ŵanthu anandi aŵereŵeta Chitchayinizi. Chachiŵi ntchisipanishi ndipu pacharu chosi ŵanthu pafupifupi hafu biliyoni aŵereŵeta Chisipanishi.

William yo wafwatuliya mabuku nga Chisipanishi wanguti: “Chisipanishi chiŵereŵeteka muvyaru vakupambanapambana. Isi tipenja kuti tifwatuliyengi vinthu vo vamufika ŵanthu pamtima kwambula kuphwere ko akutuliya, masambiru ngawu kweniso kaya mbakavu pamwenga mbakukhupuka.” Kuti vo vifwatulikiya mu Chisipanishi viŵafiki pa mtima ŵanthu a muvyaru vakupambanapambana, wo afwatuliya akusankhika kutuliya ku Argentina, Colombia, El Salvador, Guatemala, Mexico, Puerto Rico, Spain, United States, Uruguay, ndipuso ku Venezuela.

Kwa vyaka vinandi, Akaboni aku Yehova agwiriyanga ntchitu yakufwatuliya mabuku nga Chisipanishi ku United States. Kweni penga so anyaki wo afwatuliyinga chineneru ichi wo agwiriyanga ntchitu yawu ku Argentina, Mexico ndi Spain. Kweni mu 1993, Akaboni wosi wo agwiranga ntchitu yakufwatuliya Chisipanishi, anguŵasamisiya ku Puerto Rico. Ivi vinguwovya kuti wosi agwiriyengi ntchitu pa malu ngamoza.

Mu March 2012, tinguŵanaŵana kuti Dipatimenti Yakufwatuliya Chisipanishi yisami so. Ulendu wunu tinguŵanaŵana kuti tiyisamisiyi ku Ofesi yidu ya ku Spain. Edward wangukamba kuti, “Takhumbikanga kusamisa ŵanthu ndi katundu wawu pe cha, kweni takhumbikanga so layibulare ya dipatimenti iyi yo ntchinthu chakukhumbika ukongwa pa ntchitu yakufwatuliya.” Pa layibulare iyi pe mabuku ngakujumpha 2,500, kusazgiyapu Mabayibolu nga Chisipanishi.

Wo agwira ntchitu yakufwatuliya Chisipanishi alondereka ku Spain

Pa 29 May 2013, wo agwira ntchitu mu Dipatimenti Yakufwatuliya Chisipanishi angufika ku muzi wawu wasonu ndipu angulondereka ndi banja la Beteli ya ku Spain. Mabuku nga pa layibulare, vipangizu vo agwiriya ntchitu ndipuso ŵanthu wo afwatuliya anguyambuka Nyanja ya Atlantic. Kweni Chifukwa cha ndondomeku yamampha yo angupanga, ntchitu yakufwatuliya mabuku nga Chisipanishi yinguma cha. Edward wangukamba kuti, “Uthenga wa Ufumu ngwakukhumbika ukongwa ndipu tikhumba kuti ŵanthu anandi wo aŵereŵeta Chisipanishi awuŵerengengi.”