Julani

Lutani pa menyu yachiŵi

Akaboni aku Yehova

Chitonga (Malawi)

Buku Langu la Nkhani za m’Bayibolo Litovya Kusukulu

Buku Langu la Nkhani za m’Bayibolo Litovya Kusukulu

Buku Langu la Nkhani za m’Bayibolo la Chipangasinani lo lingutuzgika mu 2012, litovya ŵana a sukulu ku Philippines wo alongoro chineneru chenichi. Buku lenili likoliyana ndi vo Dipatimeti Yakuwonere Masambiru ku Philippines yikhumba. Dipatimenti iyi yikukamba kuti ŵana wo ŵeche kusukulu za mkaka asambizikengi mu chineneru cha apapi ŵawu.

Ku Philippines ŵanthu alongoro vineneru vakujumpha 100 ndipu nkhani yakuti ŵana kusukulu asambizikengi mu chineneru nichi yikwamba kali kukambika. Mu 2012, Dipatimenti Yakuwonere Masambiru yingukamba kuti, “asani ŵana asambizika mwakugwirisiya ntchitu chineneru cho alongoro kunyumba” vichitisa kuti “asambiri umampha kweniso aziŵi liŵi vinthu.” Chifukwa cha venivi angujalikisa ndondomeku yakuti ŵana asambizikengi mu vineneru vawu.

Chineneru cha Chipangasinani ntchimoza mwa vineneru vo vingusankhika kuti asambizi agwirisiyengi ntchitu. Kweni penga suzgu. Hedimasitala wa pa sukulu yinyaki wangukamba kuti pe mabuku ngamanavi nga Chipangasinani ngo ŵana asukulu angagwirisiya ntchitu. Mwaviyo, Buku Langu la Nkhani za m’Bayibolo lo Akaboni aku Yehova angutuzga pa unganu wawu wachigaŵa mu November 2012, lingutuzgika pa nyengu yakwenere.

Mabuku pafupifupi 10,000 ngangusindikizika kuti ngakagaŵiki pa unganu. Ŵana kweniso apapi angukondwa ukongwa kulonde buku lenili mu chineneru chawu. Banja linyaki lingukamba kuti: “Ŵana ŵidu atiliyanja ukongwa chifukwa atilivwisa.”

Unganu wati wamala waka, Akaboni anyaki anguchipereka mabuku yanga kusukulu yinyaki mu Tawuni ya Dagupan. Asambizi pasukulu iyi wo asuzgikanga kusaniya mabuku nga Chipangasinani, angukondwa ukongwa. Mabuku ngakujumpha 340 ngangugaŵika. Asambizi angwamba kugwirisiya ntchitu buku lenili pakusambiza ŵana kulemba ndi kuŵerenga mu chineneru chawu.

Akaboni aku Yehova mbakukondwa ukongwa kuti buku ili litovya ŵana kuti asambiri kulemba ndi kuŵerenga. Kaboni munyaki yo wangufwatuliyaku Buku Langu la Nkhani za m’Bayibolo wangukamba kuti: “Tawona kukhumbika kwakufwatuliya vinthu mu chineneru cho ŵanthu alongoro kuti viŵafiki pamtima. Ndichu chifukwa chaki Akaboni aku Yehova ayesesa kufwatuliya Bayibolu kweniso mabuku ngo ngakonkhosa Bayibolu mu vineneru vinandi.”