Julani

Mapempheru nga Munthukazi Wambula Kuwona Ngangumukika

Mapempheru nga Munthukazi Wambula Kuwona Ngangumukika

Kaboni waku Yehova munyaki ku Asia zina laki Yanmei, wanguwovya munthukazi munyaki wambula kuwona zina laki Mingjie kuti wayambuki msewu. * Mingjie wangukamba kuti: “Ndawonga ukongwa, Chiuta wakutumbikeni!” Yanmei wangufumba Mingjie asani wangayanja kuti azikumani so zuŵa linyaki kuti azikambiskani fundu za mu Bayibolu. Mingjie wangukamba kuti waja wachipemphera zuŵa lelosi kuti Chiuta wamulongozge ku mpingu waki wauneneska. Ntchifukwa wuli wapempheranga viyo?

Mingjie wangukamba kuti mu 2008, mubwezi waki yo nayu ngwambula kuwona wangumudaniya ku tchalitchi lo litovya ŵanthu akupunduka. Wati wavwisiya vo vakambikanga, Mingjie wangufumba wasembi kuti wamukambiyi buku lo wangutomu vo wapharazganga. Wasembi uyu wangumukambiya kuti ndi Bayibolu, Mazu ngauneneska ngaku Chiuta. Mingjie wangukhumbisiska ukongwa kuŵerenga Bayibolu. Mwaviyo wangusaniya Bayibolu la Chitchayinizi la vilembu va ŵanthu ambula kuwona (braille) ndipu pa myezi pafufupi 6 wanguŵerenga mavoluyumu 32. Mingjie wangulutirizga mbwenu kuŵerenga Bayibolu ndipu wanguziŵa kuti chisambizu chakuti kwe achiuta atatu mwaku chiuta yumoza cho asambizanga ku tchalitchi lo walutangaku tchaboza, kweniso wangusambira kuti Chiuta we ndi zina ndipu zina laki ndi Yehova.

Kweni mukuluta kwa nyengu, Mingjie wanguguŵa ndi vakuchita va ŵanthu mutchalitchi lo wenga. Wanguwona kuti vo achitanga vakoliyananga cha ndi vo waŵerenganga mu Bayibolu. Mwakuyeruzgiyapu, ŵanthu ambula kuwona apaskikanga chakurya cho chajaku, penipo ŵanthu anyaki wosi aryanga chakurya chamampha. Venivi vingumuguŵiska ukongwa Mingjie, mwaviyo wangwamba kupenja matchalitchi nganyaki muchigaŵa chawu. Ndichu chifukwa chaki Mingjie wapempheranga kuti wasaniyi mpingu wauneneska Wachikhristu.

Wati wawona lisungu lo Yanmei wangumulongo, Mingjie wanguzomera kusambira Bayibolu. Ndipu pati pajumpha nyengu, Mingjie wangwamba kuwungana ndi Akaboni aku Yehova. Mingjie wangukamba kuti: “Zuŵa lakwamba lo ndingwambiya kuwungana ndazakuliluwapu cha. Abali ndi azichi wosi angunditauzga mwalikondwa. Ndingukondwa ukongwa. Chinanga kuti ndiwona cha, kweni ndinguwona kuti ŵanthu yaŵa atanjana.”

Mingjie wanguluta panthazi mwauzimu ndipu wangwamba kuwungana nyengu zosi. Iyu wakondwanga kumba sumu za Ufumu kweni waziŵanga zinandi cha chifukwa pa nyengu yo pengavi buku la sumu la vilembu va ŵanthu ambula kuwona. Ndi chovyu cha abali mu mpingu, Mingjie wangupanga buku laki ndi laki la sumu. Wangulemba sumu zosi 151 mu vilembu va ŵanthu ambula kuwona kwa maora 22! Mu April 2018, Mingjie wangwamba kupharazga ndipu wamaliyanga maora pafufupi 30 mwezi wewosi.

Kufwatuiliya buku mu vilembu va ŵanthu ambula kuwona ndi ntchitu yamaseŵera cha

Pakukhumba kovya Mingjie kunozgeke kubatizika, Yanmei wangujambula mafumbu kweniso mavesi nga mu Bayibolu ngo nge mu buku la Gulu lo Lichita Khumbu laku Yehova. Mu July 2018, Mingjie wangubatizika. Iyu wangukamba kuti: “Ndingukwaskika ukongwa ndi chanju cho abali ndi azichi angundilongo pa unganu wachigaŵa uwu. Ndingukondwa ukongwa ndipu ndinguliya chifukwa pa nyengu iyi ndenga mu mpingu wauneneska waku Chiuta.” (Yohane 13:34, 35) Pakukhumba kulongo chanju nge cho abali angumulongo, pasonu panu, Mingjie wateŵete nge mpayiniya wanyengu zosi.

^ ndimi 1 Mazina ngasinthika.