Julani

Lutani pa menyu yachiŵi

Akaboni aku Yehova

Chitonga (Malawi)

Kumbi Sambiru la Bayibolo Nchinthu Wuli?

Kumbi Sambiru la Bayibolo Nchinthu Wuli?

Akaboni aku Yehova achitiska sambiru la Bayibolo lo limuka mafumbu nge:

  • Kumbi Chiuta ndi yani?

  • Kumbi Chiuta watindiŵanaŵaniya nge munthu pakundija?

  • Kumbi ndingachita wuli kuti nthengwa yangu yiyendengi umampha?

  • Kumbi ndingachita wuli kuti ndikondwengi pa umoyu wangu?

Mumphata umu mwe kwamuka kwa mafumbu ngo ŵanthu afumba kaŵikaŵi ngakukwaskana ndi sambiru la Bayibolo.

Kumbi sambiru la Bayibolo lichitika wuli? Tisankha mutu wa nkhani nge wakuti “Chiuta” pamwenga “nthengwa” ndipu tikambiskana malemba ngakupambanapambana nga m’Bayibolo ngakukwaskana ndi nkhani yo tasankha. Asani tawona malemba ngakupambanapambana tiziŵa vo Bayibolo likamba pa nkhani yo tasankha, ndipu kuchita viyo kutovya kuti Bayibolo lijikonkhoski lija.

Buku la Kumbi Bayibolo Lisambizanji Weniukongwa? ndilu lititiwovya pakusambira Bayibolo. Buku ili likonkhoska mwakuvwika umampha nkhani zakupambanapambana nge vo Bayibolo likamba pa nkhani yakukwaskana ndi Chiuta, Yesu kweniso umoyu widu wa munthazi.

Kumbi ndakulipiliska? Sambiru la Bayibolo ndawezi ndipu vinthu vo tigwiriskiya nchitu pakusambira navu vawezi.

Kumbi lito nyengu yitali wuli? Ŵanthu anandi asankha kusambira nawu Bayibolo kwa ora limoza pamwenga kujumpha, sabata yeyosi. Kweni munthu wangasankha yija utali wa nyengu yo wangasambiriya. Isi tingasambira namwi pa nyengu yo mungayanja.

Kumbi nchinthu wuli cho chichitikengi asani ndapempha sambiru la Bayibolo? Asani mwapempha sambiru la Bayibolo, yumoza wa Akaboni aku Yehova wazengi kuzikumana namwi pa malu ngo imwi mungayanja kweniso pa nyengu yo mungayanja. Wachitengi namwi sambiru ili kwa maminisi ngamanavi ndipu asani mwaliyanja mungalutirizga.

Asani ndazomera kuti muchitengi nani sambiru la Bayibolo, kumbi ndikhumbika kuja yumoza wa Akaboni aku Yehova? Awa. Akaboni aku Yehova atanja kusambiza ŵanthu Bayibolo, kweni tichichizga ŵanthu cha kuti asere m’chisopa chidu. M’malu mwaki titiŵakambiya mwaulemu vo Bayibolo lisambiza ndipu tiziŵa kuti munthu weyosi we ndi wanangwa wakugomezga vo wakhumba.1 Petro 3:15.