Julani

Kumbi Akaboni aku Yehova Agomezganji?

Kumbi Akaboni aku Yehova Agomezganji?

Isi Akaboni aku Yehova, tiyesesa kulondo vo Yesu wasambizanga kweniso tichita vinthu nge mo akutumika achitiyanga. Nkhani iyi yikonkhoska vinyaki mwa vinthu vo tigomezga.

  1. Chiuta. Tisopa Chiuta yumoza wauneneska kweniso Wanthazizosi, Mlengi, yo zina laki ndi Yehova. (Sumu 83:18; Chivumbuzi 4:11) Iyu ndi Chiuta waku Aburahamu, Mozesi, kweniso Yesu.​—Chituwa 3:6; 32:11; Yohane 20:17.

  2. Bayibolu. Tigomezga kuti mu Bayibolu mwe uthenga wakutuliya kwaku Chiuta wo uluta ku ŵanthu. (Yohane 17:17; 2 Timote 3:16) Vinthu vo tigomezga vituliya mumabuku ngosi 66 nga mu Bayibolu kwamba “Chipanganu Chakali” kweniso “Chipanganu Chifya.” Pulofesa munyaki zina laki Jason D. BeDuhn wanguzomereza kuti fundu iyi njauneneska. Iyu wangulemba kuti “vo yiwu achita kweniso vo agomezga vituliya mu Bayibolu, yiwu abendezga cha Malemba kuti ngakoliyanengi ndi vo agomezga.” *

    Mbuneneska kuti tikoliyana ndi vosi vo Bayibolu lisambiza, kweni kuti tivwisi vo Bayibolu likamba, titole ŵaka mo mazu ngakulembeke cha. Tiziŵa kuti mu Bayibolu vinthu vinyaki vikulembeka mwantharika kweniso kuti vimiya vinthu vinyaki ndipu kuti tivwisi vinthu venivi tikhumbika kuwona mo nkhani yaki yiliri.​—Chivumbuzi 1:1.

  3. Yesu. Tilondo vo Yesu Khristu wasambizanga kweniso vo wachitanga. Titimutumbika nge Mtaski widu kweniso nge Mwana waku Chiuta. (Mateyu 20:28; Machitidu 5:31) Mwaviyo, te Akhristu. (Machitidu 11:26) Kweni tikusambira mu Bayibolu kuti Yesu ndi Chiuta Wanthazizosi cha, kweniso kuti mu Bayibolu mulivi chisambizu chakuti kwe achiuta atatu.​—Yohane 14:28.

  4. Ufumu waku Chiuta. Ufumu waku Chiuta ndi boma chayilu lo le kuchanya, uja mu mtima wa munthu cha. Ufumu uwu wazamusere mumalu mwa maboma nga ŵanthu ndipu wazamufiska vo Chiuta wakhumba kuchita pacharu chapasi. (Danyele 2:44; Mateyu 6:9, 10) Ufumu waku Chiuta uchitengi venivi pambula kuswera yapa chifukwa uchimi wa mu Bayibolu ulongo kuti tija “mu mazuŵa ngakumaliya.”​—2 Timote 3:1-5; Mateyu 24:3-14.

    Yesu ndi Fumu ya Ufumu waku Chiuta kuchanya. Iyu wangwamba kulamuliya mu 1914.​—Chivumbuzi 11:15.

  5. Utaski. Sembi yaku Yesu ndiyu yititiwombo ku ubudi ndi nyifwa. (Mateyu 20:28; Machitidu 4:12) Kuti munthu wayanduwi ndi sembi yaku Yesu wakhumbika kuvwana mwaku iyu, kusintha umoyu waki kweniso kubatizika. (Mateyu 28:19, 20; Yohane 3:16; Machitidu 3:19, 20) Vinthu vo munthu wachita ndivu vilongo kuti chivwanu chaki ntchamoyu. (Yakobe 2:24, 26) Munthu wazamutaskika chifukwa cha vo wachita cha kweni chifukwa cha “wezi ukulu waku Chiuta.”​—Agalatiya 2:16, 21.

  6. Kuchanya. Yehova Chiuta, Yesu Khristu kweniso angelu akugomezgeka aja kuchanya. * (Sumu 103:19-21; Machitidu 7:55) Ŵanthu amanavi ŵaka akukwana 144,000 azamuyuskikiya kuchanya kuti akalamuliyi ndi Yesu.​—Danyele 7:27; 2 Timote 2:12; Chivumbuzi 5:9, 10; 14:1, 3.

  7. Charu chapasi. Chiuta wangulenga charu chapasi kuti ŵanthu ajengemu kwamuyaya. (Sumu 104:5; 115:16; Wakutaula 1:4) Chiuta wazamutumbika ŵanthu akuvwiya. Azamutamanga cha ndipuso wazakuŵapaska umoyu wamuyaya muparadayisu pacharu chapasi.​—Sumu 37:11, 34.

  8. Vinthu viheni kweniso masuzgu. Vinthu ivi vingwamba mungelu waku Chiuta wati wagaruka. (Yohane 8:44) Mungelu mwenuyu, yo wati wagaruka wangudanika kuti “Satana” kweniso “Dyaboli” wangunyenga ŵanthu ŵaŵi akwamba kuti amuvwiyi. Venivi vikuchitiska kuti ŵana ŵaki akumanengi ndi masuzgu. (Chiyambo 3:1-6; Aroma 5:12) Kuti nkhani yo Satana wangwambisa yimali Chiuta wazomereza kuti vinthu viheni kweniso masuzgu vichitikengi kweni wazomerezengi cha kuti vinthu venivi vilutiriyi.

  9. Nyifwa. Asani munthu wafwa ndikuti kulivi. (Sumu 146:4; Wakutaula 9:5, 10) Ŵanthu akufwa atombozgeka cha mumotu.

    Chiuta wazamuyuska ŵanthu mabiliyoni nganandi pa nyengu ya chiyuka. (Machitidu 24:15) Kweni asani ŵanthu wo azamuyuskika azikana kusambira nthowa zaku Chiuta, azamubayikiya limu ndipu azamuyuskika so cha.​—Chivumbuzi 20:14, 15.

  10. Banja. Tigomezga kuti banja lipangika ndi munthulumi yumoza kweniso munthukazi yumoza nge mo Chiuta wangunozge pakwamba. Ndipu nthengwa yingamala pijapija asani yumoza wachita ureŵi. (Mateyu 19:4-9) Tisimikiza kuti fundu za mu Bayibolu zitovya kuti vinthu viyendengi umampha mu banja.​—Aefeso 5:22–6:1.

  11. Kusopa kwidu. Tisopa mphinjika cha pamwenga chikozgu chechosi. (Marangu 4:15-19; 1 Yohane 5:21) Vinyaki mwa vinthu vakukhumbika ukongwa vo tichita pakusopa ndi ivi:

  12. Gulu lidu. Akaboni aku Yehova agaŵika mu mipingu yakupambanapambana, ndipu mpingu wewosi ulongozgeka ndi wupu wa ŵara. Kweni ŵara ŵenaŵa ndi gulu lapade la aliska cha ndipuso alipirika ndalama cha. (Mateyu 10:8; 23:8) Tipereka vatchumi cha kweniso ku maunganu ngidu kutendeseka mbali ya mpasku cha. (2 Akorinto 9:7) Ndalama zo zitovya pa ntchitu zidu ndi zo ŵanthu apereka mwakukhumba kwawu.

    Wupu Wakulongozga, kagulu kamana ka Akhristu akukhwima wo ateŵete ku likulu lidu ndiwu upereka ulongozgi wo utovya Akaboni aku Yehova wosi pacharu chapasi.​—Mateyu 24:45.

  13. Kukoliyana kwidu. Tosi tigomezga vinthu vakuyanana pacharu chosi chapasi. (1 Akorinto 1:10) Tifwiyapu kuti tileki kugaŵikana chifukwa cha kupambana mitundu, mafuku pamwenga mo vinthu viliri pa umoyu widu. (Machitidu 10:34, 35; Yakobe 2:4) Chinanga kuti tosi tisankha vinthu mwakupambana, kweni tikoliyana. Kaboni waku Yehova weyosi wasankha vinthu mwakukoliyana ndi njuŵi yaki yo yikusambizika Bayibolu.​—Aroma 14:1-4; Aheberi 5:14.

  14. Nkharu yidu. Tiyesesa kuchita vinthu vosi mwachanju. (Yohane 13:34, 35) Tichita cha vinthu vo vikwiyisa Chiuta, nge kuŵikika ndopa. (Machitidu 15:28, 29; Agalatiya 5:19-21) Tija mwachimangu ndipu tichitaku cha nkhondu. (Mateyu 5:9; Yesaya 2:4) Kosi ko tija titumbika boma ndi kutumbika marangu ngaki asani ngaleka kususkana ndi marangu ngaku Chiuta.​—Mateyu 22:21; Machitidu 5:29.

  15. Mo tichiya vinthu ndi ŵanthu. Yesu wangukamba kuti: “Uyanjengi munyaku nge mo utijiyanjiya wamweni.” Wangukamba so kuti Akhristu “mbacharu cha.” (Mateyu 22:39; Yohane 17:16) Mwaviyo, tiyesesa ‘kuchitiya vamampha ŵanthu wosi,’ kweni tichitaku cha ndali ndipuso tichitiya limoza cha vinthu ndi visopa vinyaki. (Agalatiya 6:10; 2 Akorinto 6:14) Chinanga kuti ve viyo titumbika vo ŵanthu asankha pa nkhani zenizi.​—Aroma 14:12.

Asani mwe ndi mafumbu pa vo Akaboni aku Yehova agomezga, ŵerengani pa webusayiti yidu, lutani ku maofesi ngidu, lutani ku maunganu ngidu pa nyumba ya ufumu yo mwe nayu pafupi pamwenga kambisanani ndi Kaboni waku Yehova yo waja muchigaŵa chinu.

^ ndimi 4 Wonani buku la Chingelezi la mutu wakuti Truth in Translation, papeji 165.

^ ndimi 10 Angelu aheni akudikiskika kuchanya, kweni tingaŵawona cha.​—Chivumbuzi 12:7-9.