Titesesa kulondo vo Bayibolu likamba pa nkhani ya kumalisa nthengwa. Chiuta yo wakwambisa nthengwa wakhumba kuti munthurumi ndi munthukazi ajaliyengi limoza kwa umoyu wawu wosi. Malemba ngakamba kuti nthengwa yingamala pijapija asani munthurumi pamwenga munthukazi wachita ureŵi.​—Mateyu 19:5, 6, 9.

Kumbi Akaboni atovya mabanja ngo ngakumana ndi masuzgu?

Hinya, yiwu atingawovya munthowa zakupambanapambana:

  • Mabuku. Nyengu zinandi mu mabuku ngidu musanirika nkhani zo zingawovya mabanja, chinanga ndi ngo ngawoneka kuti vinthu vitenda so umampha cha. Mwakuyeruzgiyapu, wonani nkhani za mutu wakuti, “Khalanibe Okhulupirika Muukwati Wanu,” “Kodi Mungatani Kuti Muzikhululukirana?” kweniso yakuti “Zimene Mungachite kuti Muyambirenso Kukhulupirirana.”

  • Maunganu. Pa maunganu ngidu nga mpingu, nga dera kweniso nga chigaŵa tisambira fundu zakovya mabanja zo zisanirika m’Bayibolu.

  • Ŵara. Ŵara mumpingu atovya ŵanthu wo akutorana kuti agwiriskiyengi ntchitu ulongozgi wa m’Malemba, nge wo usanirika pa Aefeso 5:22-25.

Kumbi ŵara mumpingu akhumbika kuzomereza kuti Kaboni wamalisi nthengwa?

Awa. Chinanga ŵara angapempheka kuti awovyi mabanja ngo ngakumana ndi masuzgu, yiwu alivi udindu wakukambiya banja lo laŵapempha vo lingachita. (Agalatiya 6:5) Chinanga kuti ve viyo, munthu yo wasankha kumalisa nthengwa kwambula chifukwa cha m’Malemba, Malemba ngazomereza cha kuti munthu waviyo wato so pamwenga kuŵirwa.​—1 Timote 3:1, 5, 12.

Kumbi Akaboni atikuwona wuli kupatukana?

Bayibolu lichiska ŵanthu akutorana kuti atenere kujaliya limoza chinanga mphanyengu ya masuzgu. (1 Akorinto 7:10-16) Masuzgu nganandi nga m’banja ngangamala asani ŵanthu apemphera mwakutuliya pasi pa mtima, agwiriskiya ntchitu fundu za m’Bayibolu kweniso asani atanjana.​—1 Akorinto 13:4-8; Agalatiya 5:22.

Kweni asani masuzgu nganyaki ngakulu ukongwa, mwakuyeruzgiyapu nge masuzgu ngo nge mumphata, Akhristu anyaki asankha kupatukana ndi munthu yo akutorana nayu:

  • Kuleka kuphwere Banja.​—1 Timote 5:8.

  • Vinthu vankhaza nge kupumika.​—Sumu 11:5.

  • Vinthu vo vichitisa kuti munthu waleki kuja pa ubwezi ndi Chiuta. Mwakuyeruzgiyapu, yumoza pa banja wangachita vinthu vo vingachichizga munyaki yo ndi Kaboni kuti waleki kuvwiya marangu ngaku Chiuta. Asani ivi vachitika, yo ndi Kaboni wangawona kuti kupatukana kungamuwovya kuti ‘Wavwiyi Chiuta nge wakuwusa kuluska ŵanthu.’​—Machitidu 5:29.