Isi Akaboni aku Yehova tichitaku cha ndali chifukwa cha fundu za mu Bayibolu zo tigomezga. Tichitiya kampeni munthu pamwenga chipani chechosi cha, timaku cha pa maudindu ngengosi nga ndali kweniso tichitaku cha viwoneseru vakuti tisinthi boma. Tisimikiza kuti fundu zo zisanirika mu Bayibolu zipereka vifukwa vakuvwika vo tichitiya venivi.

•   Tilondo chakuwoniyapu chaku Yesu yo wangukana udindu wewosi wakukwaskana ndi ndali. (Yohane 6:15) Iyu wangusambiza ŵanthu wo amulondonga kuti angajanga ‘acharu cha’ kweniso angajanga chigaŵa chechosi cha pa nkhani za ndali.—Yohane 17:14, 16; 18:36; Mariko 12:13-17.

•   Isi te akugomezgeka ku Ufumu waku Chiuta, ndipu Yesu wakambanga za Ufumu wenuwu po wanguti: “Uthenga wamampha uwu wa Ufumu, wazamupharazgika pacharu chosi chapasi.” (Mateyu 24:14) Pakuti isi timiya Ufumu waku Chiuta ndipu tipharazgiya ŵanthu kuti Ufumu wenuwu uzengi pambula kuswera yapa, tiseleriyamu cha munkhani za ndali za charu chechosi kusazgapuso mucharu cho tija.—2 Akorinto 5:20; Aefeso 6:20.

•   Chifukwa chakuti tiseleriyamu cha mu ndali, tikambiskana uthenga wa Ufumu waku Chiuta mwakufwatuka ndi munthu weyosi kaya wangaŵa wa chipani wuli. Vakuchita vidu kweniso vo tilongoro vilongo kuti tigomezga kuti Ufumu waku Chiuta pe ndiwu wazamumalisa masuzgu pacharu chapasi.—Salimo 56:11.

•   Isi te akukoliyana pacharu chosi chifukwa chakuti tizomereza cha kuti ndali zitipatuski. (Akolose 3:14; 1 Peturo 2:17) Kweni matchalitchi ngo ngaselere mu ndali, ngachitiska kuti mamembala ngaki ngagaŵikanengi.—1 Akorinto 1:10.

 Titumbika maboma. Chinanga kuti tichitaku cha vandali, kweni titiŵatumbika ŵanthu wo alamuliya mucharu cho tija. Tichita venivi chifukwa tivwiya dangu la mu Bayibolu lakuti: “Munthu weyosi wajithereskengi ku ŵaraŵara amazaza.” (Aroma 13:1) Tivwiya marangu, tilipira msonkhu kweniso tikoliyana ndi ndondomeku yeyosi yo boma lajalikiska pa nkhani yakovya ŵanthu amucharu cho. Mumalu mwakuchitaku vinthu vo vingatimbanyizga boma, tilondo ulongozgi wa mu Bayibolu wakuti tipempheriyengi “mafumu, kweniso ŵanthu wosi wo ŵe ndi maudindu ngapachanya,” ukongwa asani asankha vinthu vo vingakwaska wanangwa widu wakusopa.—1 Timote 2:1, 2, mazu ngamumphata.

 Titumbikaso wanangwa wa ŵanthu anyaki wakusankha vakuchita pa nkhani za ndali. Mwakuyeruzgiyapu, titimbanyizga cha visankhu pamwenga titiŵakaniza cha ŵanthu wo asankha kuvota.

 Kumbi kuleka kuseleriyapu pa ndali kwayamba sonu? Awa. Akutumika kweniso Akhristu akwambiriya nawuso asereliyangamu cha munkhani za ndali. Buku linyaki likamba kuti: “Chinanga kuti Akhristu aŵatumbikanga ŵanthu wo alamuliyanga, kweni yiwu achitangaku cha chinthu chechosi chakukwaskana ndi ndali.” (Beyond Good Intentions) Buku linyakiso likamba kuti Akhristu akwambiriya “azomeranga cha kupaskika udindu wewosi wakukwaskana ndi ndali.”—On the Road to Civilization.

 Kumbi ŵanthu atenere kufipa mtima chifukwa chakuti tileka kusereliyapu pa nkhani za ndali? Awa. Te ŵanthu akwanja chimangu ndipu ŵaraŵara aboma akhumbika kopa chechosi cha. Mwakuyeruzgiyapu, ŵanaŵaniyani lipoti lo wupu wa National Academy of Sciences of Ukraine ungukamba mu 2001. Pakukamba vakukwaskana ndi kuleka kusereliyapu kwidu pankhani za ndali, lipoti ili lingukamba kuti: “Mazuŵa nganu ŵanthu anyaki angaŵatinkha Akaboni aku Yehova chifukwa cha nkhani iyi; kweni tingaluwanga cha kuti ulamuliru wankhaza wa chipani cha Nazi kweniso maboma nganyaki ngankhaza nangu nganguŵatinkha chifukwa cha nkhani zenizi.” Chinanga mphanyengu yo boma lachitiyanga nkhaza ŵanthu, Akaboni aku Yehova “angulutirizga mbwenu kuvwiya marangu nga boma. Yiwu agwiranga ntchitu mwakugomezgeka kuminda kweniso mumafakitale ngakupambanapambana ndipu anguliyukiyapu cha boma.” Lipoti ili lingumaliza kuti, “Mwakuyanana waka, vo Akaboni aku Yehova agomezga kweniso vo achita vingatimbanyizga chimangu cha pamwenga kuwisa boma lelosi.”