Julani

Lutani pa menyu yachiŵi

Akaboni aku Yehova

Chitonga (Malawi)

Kumbi Akaboni aku Yehova Atovya Ŵanthu wo Akumana ndi Masoka Ngachilengedu?

Kumbi Akaboni aku Yehova Atovya Ŵanthu wo Akumana ndi Masoka Ngachilengedu?

Hinya, kanandi Akaboni aku Yehova atovya asani kwachitika masoka ngachilengedu. Titovya ŵanthu wosi wo akumana ndi masoka ngachilengedu, kwali angaŵa Akaboni pamwenga cha. Tichita viyo chifukwa chakulondo ulongozgi wa pa Ŵagalatia 6:10 po patiti: “Tichitiyengi kwaku wosi cho nchamampha, ukongwa ku ŵanambumba ŵa chivwanu.” Mwaviyo, titesesa kovya ŵanthu wo akumana ndi masoka mwakuŵapembuzga kweniso kuŵachiska pa nyengu yakusuzga iyi.2 Ŵakorinte 1:3, 4.

Mo Tichitiya

Asani kwachitika masoka, ŵara a mipingu yo yakwaskika akambiskana ndi ŵanthu wosi m’mipingu yo, kuti aziŵi mo aliri kweniso kuti aziŵi chovyu cho akhumbika. Ŵara alemba vo asaniya kweniso chovyu cho chikhumbika mwaliŵi ndipu atumiza lipoti ku ofesi ya Akaboni aku Yehova.

Asani chovyu cho chikhumbika nchakuti mpingu pakuwija ungafiska cha, Wupu Wakulongozga wa Akaboni aku Yehova ndiwu unozga kuti chovyu chiperekeki. Ivi viyanana ndi mo Akhristu a m’nyengu ya Akutumika awovyiyananga pa nyengu ya nja. (1 Ŵakorinte 16:1-4) Ofesi ya Akaboni aku Yehova ya m’charu cho kwachitika masoka ndiyu yisankha komiti yakuti yiyendeski nchitu yo. Akaboni aku Yehova a m’vigaŵa vinyaki nawu atijipereka kuti awovyi ndi chuma chawu kweniso nyengu yawu.Nthanthi 17:17.

Ndalama

Ndalama zinyaki zo ŵanthu apereka mwakukhumba kwawu ku maofesi nga Akaboni aku Yehova, zitovya pa nchitu yakovya ŵanthu wo akumana ndi masoka ngachilengedu. (Machitidu 11:27-30; 2 Ŵakorinte 8:13-15) Chifukwa chakuti ŵanthu wosi wo agwiraku nchitu iyi atijipereka ŵaka, ndalama zosi zo ziperekeka kuti zigwiri nchitu iyi, zitovya nadi ŵanthu wo akumana ndi masoka, m’malu mwakulipira wo agwira nchitu yo. Vawanangwa vosi vo ŵanthu apereka titivigwiriskiya nchitu mwakuphwere.—2 Ŵakorinte 8:20.