Julani

Lutani pa menyu yachiŵi

Akaboni aku Yehova

Chitonga (Malawi)

Nchifukwa Wuli Akaboni aku Yehova Akana Kuŵikika Ndopa?

Nchifukwa Wuli Akaboni aku Yehova Akana Kuŵikika Ndopa?

Maboza ngo ŵanthu akamba kweniso fundu zauneneska

Boza: Akaboni aku Yehova akana chovyu chechosi chakuchipatala pamwenga munkhwala.

Fundu yauneneska: Tilonde chovyu cha munkhwala kuti tiwovyeki kweniso kuti tiwovyi mabanja ngidu. Asani tatama tipenja madokotala ngalusu ngo ngangatiwovya pamwenga kutichita opaleshoni kwambula kugwiriskiya nchitu ndopa. Tiwonga ukongwa kuluta panthazi kwa vinthu pa nkhani ya vachipatala. Ndipu chovyu chakuchipatala chambula kugwiriskiya nchitu ndopa cho Akaboni alonde, chitovya so ukongwa ŵanthu anyaki wo Mbakaboni cha. M’vyaru vinandi, munthu yo watama we ndi wanangwa wakusankha kuleka kuŵikika ndopa, kuti waleki kuto matenda ngo ngayambukiya kuporote m’ndopa kweniso kuti waleki kukumana ndi masuzgu nganyaki ngo ngatuza chifukwa chakuŵikika ndopa.

Boza: Akaboni aku Yehova agomezga kuti chivwanu chingachizga munthu.

Fundu yauneneska: Tigomezga cha kuti chivwanu chingachizga munthu.

Boza: Chovyu chambula kuŵikika ndopa nchakudula ukongwa.

Fundu yauneneska: Chovyu chambula kuŵikika ndopa nchakudula cha. *

Boza: Akaboni anandi kusazgapu ŵana atufwa chifukwa cha kukana kuŵikika ndopa.

Fundu yauneneska: Ili ndi boza likulu ukongwa. Akaboni aku Yehova anyaki apangikapu opaleshoni ya mtima, ndi mitundu yinyaki ya maopaleshoni kwambula kuŵikika ndopa. * Ŵanthu anandi wo aleka kuŵikika ndopa kusazgapu ŵana achira umampha kuluska wo azomera kuŵikika ndopa. * Kwali munthu waŵikiki ndopa pamwenga cha, wangafwa pamwenga wangachira.

Nchifukwa wuli Akaboni aku Yehova akana kuŵikika ndopa?

Nkhani yakuŵikika ndopa yikwaskana ndi kusopa. Vigaŵa vosi viŵi va Bayibolo, Chipanganu Chakali kweniso Chipanganu chasonu, vikanizga kugwiriskiya nchitu ndopa. (Chiyambo 9:4; Ŵalevi 17:10; Marangu 12:23; Machitidu 15:28, 29) Ndipu Yehova wawona kuti ndopa zimiya umoyu. (Ŵalevi 17:14) Mwaviyo, tikana kuŵikika ndopa chifukwa tikhumba kuvwiya Chiuta kweniso kumutumbika pakuti ndiyu wakutipaska umoyu.

Kusintha Maŵanaŵanu

Maopaleshoni ngakulungakulu ngangachitika kwambula kuŵikika ndopa.

Pakwamba madokotala ngawonanga kuti kuchita opaleshoni yambula kuŵikika ndopa nkhwakusuzga ukongwa kweniso nkhwakubaya. Kweni pambula kuswera yapa, yiwu asintha mo aŵanaŵaniyanga. Mwakuyeruzgiyapu, mu 2004, nkhani yinyaki yo yingutuwa m’magazini, yingukamba kuti “nthowa zinandi zo atovye Akaboni aku Yehova asani atama ziŵengi zakovya ukongwa kunthazi.” * Nkhani yinyaki ya m’magazini yamutu wakuti Heart, Lung and Circulation, yo yingutuwa mu 2010, yingukamba kuti “nthowa zakupangiya opaleshoni kwambula kuŵikika ndopa zingagwiranga nchitu kwa Akaboni aku Yehova pe cha, kweni zigwiriskikiyengi nchitu nyengu zosi.

Madokotala nganandi pacharu chosi agwiriskiya nchitu nthowa zakusungiya ndopa asani apanga maopaleshoni ngakulungakulu kwambula kuŵika ndopa. Nthowa izi zigwiriskikiya so nchitu m’vyaru vakukhupuka ndipu ŵanthu anandi wo Mbakaboni cha apempha nthowa zenizi.

^ ndimi 8 Wonani buku la Transfusion and Apheresis Science, Volume 33, No. 3, peji 349.

^ ndimi 10 Wonani, magazini yamutu wakuti The Journal of Thoracic and Cardiovascular Surgery, Volume 134, No. 2, peji 287 mpaka 288; Texas Heart Institute Journal, Volume 38, No. 5, peji 563; Basics of Blood Management, peji 2; ndi Continuing Education in Anaesthesia, Critical Care & Pain, Volume 4, No. 2, peji 39.

^ ndimi 10 Wonani magazini yamutu wakuti The Journal of Thoracic and Cardiovascular Surgery, Volume 89, No. 6, peji. 918; ndi Heart, Lung and Circulation, Volume 19, peji 658.

^ ndimi 14 Continuing Education in Anaesthesia, Critical Care & Pain, Volume 4, No. 2, peji 39.