Skip to content

Skip to secondary menu

Skip to table of contents

Testigopi de Jehová

toba

Ñapaxaguenaxa ñi Dios

 PAXAGUENAXAT 6

So David sa ñiʼi

So David sa ñiʼi

Ra ʼañiʼi, ¿négueʼt ca ʼauʼot?... ʼAnqoʼona petaʼa caua ʼartaʼal yaqtoʼ ʼam qaitauan. Qalaq taqaʼen huoʼo ñi lỹa ishet ra ʼam itauan. Ñi maye ỹataqta qaica ca napacalec ra lʼañaxac. ¿ʼAuaỹaten négueʼt ñi maye?... Ajaʼ, nachiñi ñi Jehová. Aye la Biblia iaʼaxat so nsoq lʼenaxat David. So maye sa ñiʼi, chaʼaye ỹaỹaten ra ñi Jehová saxaỹet ra itauan. Ñapaxaguenaxa so maye.

Ca ñaq nogotolec so David, soua ltaʼal ỹapaxagueʼn ra ỹauotec ñi Jehová. Ỹoqoʼoye sa ñiʼi, naiʼctaxa ra anac ca camachaqca ñiʼiỹaxa. So maye ỹaỹaten ra nauochaxaua ñi Jehová taq ishet ra itauan. Huoʼo so naʼaq so David ilotagueʼ aso qaguetapi. Nache anac so llon ltaʼaraic ỹacona aso ʼoonole qagueta. ¿ʼAuaỹaten négueʼt so ỹoʼot so David? Icanapec so llon nache ỹalauat, qaipetaʼa ra ndotec roʼogoxona naua lhuaʼq. Taq caiye anac so oso itoʼ aso qaguetapi, taqaʼen ỹalauat. ¿Chaq négueʼt ca itauan so David?... Ajaʼ, nachiñi ñi Jehová.

Taqaʼen huoʼo so naʼaʼq so David ỹachaxan ra ỹataqta ʼañaxaic. So israelitapi nhuaxatagueʼ so shiỹaxauapi lʼenaxaʼt filisteopi. Huoʼo so ʼoonolec nallippi filisteo salaxaic ra logoraic. Seʼeso ỹale lʼenaxat Goliat. Iʼen ñi Jehová taq na nallippi israelitapi. So Goliat ʼenapega na mayepi ra huoʼo ca ñiʼigueneʼ. Qalaxaye ʼenauac na nallippi israelitapi ñiʼi ra nhuaxaneʼ. So David huaʼaxaỹa reʼera, nache ʼenapega so Goliat: ‹¡Aỹem ʼam inhuaxaneʼ! ¡Ñi Jehová aỹem itauan, nache ʼam ñiauec!›. ʼAm, ¿ʼalaʼa ra ʼañaxaic so David?... Ajaʼ, ỹataqta ʼañaxaic. ¿ʼAnshetaique ra ʼauaỹaten ʼeetec so lcopaʼague?

So David ỹacona soua cinco comaʼ sallita taq so lpocnaxanaxat. Nache jec yaqtoʼ nhuaxaneʼ so ỹale logoraic. Qanache so Goliat ilaʼa so David ra ñaq nsoq, nache iʼen. Qalaxaye so David ʼenapega: ‹¡ʼAm ʼananac ʼanachetac na ʼainec. Qalaq ʼam ñoqoʼona sachetac ra lʼenaxat ñi Jehová!›. Nache ỹanaigui so ʼoonolec comaʼ so lpocnaxanaxat, nqalgaqaʼa so Goliat, nache  ichiquen. So comaʼ tachigui na latap so maye. ¡Nache najñi ileu! So filisteopi ñiʼi nache ʼenauac ratauec. ¿ʼÉetec ra ishet so nsoqolec David ra nauec so ỹale logoraic?... ¡Ñi Jehová itauan, chaʼaye napacalec ra lʼañaxac seʼeso ỹale logoraic!

So David sa ñiʼi chaʼaye ỹaỹaten ra ñi Jehová itauan

¿Négueʼt ca ʼam ỹapaxaguenec ye nʼaqtaguec so David?... Ñi Jehová ỹataqta qaica ca napacalec ra lʼañaxac. Nache qom ỹoltaxa ʼañiʼi, ʼauennataʼa: ¡ñi Jehová ʼanauochaxaua! Ishet ra ʼam itauan yaqtoʼ sa ʼañiʼi.

ʼAUTAXAỸAXAN AYE MAICHE ANA BIBLIA