‘Oku vakai ‘a e kakai tokolahi ki he kolosí ko ha faka‘ilonga fakaemāmanilahi ia ‘o e lotu faka-Kalisitiané. Neongo ko e kau Kalisitiane ‘a e Kau Fakamo‘oni ‘a Sihová, ‘oku ‘ikai ke mau ngāue‘aki ‘a e kolosí ‘i he‘emau lotú. Ko e hā hono ‘uhingá?

Ko e ‘uhinga ‘e taha ‘oku fakahaa‘i ‘e he Tohi Tapú na‘e ‘ikai pekia ‘a Sīsū ‘i ha kolosi ka ‘i ha ‘akau pē. ‘Ikai ko ia pē, ‘oku fakatokanga mālohi ‘e he Tohi Tapú ki he kau Kalisitiané ke “hola mei he tauhi ‘aitolí,” ‘a ia ‘e ‘uhingá ko e ‘ikai ngāue‘aki ‘a e kolosí ‘i he lotú.​—⁠1 Kolinitō 10:14; 1 Sione 5:​21.

Ko e me‘a mahu‘ingá, na‘e pehē ‘e Sīsū: “‘I he me‘á ni ‘e ‘ilo ai ‘e he fa‘ahinga kotoa ko kimoutolú ko ‘eku kau ākonga, ‘o kapau ‘oku mou ma‘u ‘a e ‘ofá ‘i homou lotolotongá.” (Sione 13:34, 35) Na‘e fakahaa‘i ai ‘e Sīsū ko e ‘ofa feilaulau‘i-kitá​—⁠‘ikai ko e kolosí pe ko ha toe ‘īmisi⁠—⁠te ne faka‘ilonga‘i hono kau muimui mo‘oní.