Tali ʻa e Tohi Tapú

 ʻOku tui ʻa e kau Kalisitiané naʻe pekia ʻa Sīsū maʻá e angahala ʻa e faʻahinga ʻo e tangatá. (1 Pita 3:18) Kae kehe, ko e fakamoʻuí ʻoku fiemaʻu ki ai ʻa e meʻa lahi ange ʻi he tui pē kia Sīsū ko e Fakamoʻuí. ʻOku ʻiloʻi ʻe he fanga tēmenioó ko Sīsū ʻa e ʻAlo ʻo e ʻOtuá, neongo ia ʻe fakaʻauha kinautolu kae ʻikai ke fakamoʻui.​—Luke 4:41; Sute 6.

•  Ko e hā kuo pau ke u fai ke maʻu ʻa e fakamoʻuí?

•  Fēfē ʻa e “Lotu ʻa e Tokotaha Angahalá”?

•  Naʻe kamata mei fē ʻa e “Lotu ʻa e Tokotaha Angahalá”?

 Ko e hā kuo pau ke u fai ke maʻu ʻa e fakamoʻuí?

•   Kuo pau ke ke tui naʻe feilaulauʻi ʻe Sīsū ʻene moʻuí maʻa ʻetau angahalá. (Ngāue 16:30, 31; 1 Sione 2:2) ʻOku kau heni ʻa e tui ko Sīsū ko ha tokotaha moʻoni ia pea ko e meʻa kotoa pē ʻoku fakamatala ʻe he Tohi Tapú ʻo fekauʻaki mo iá ʻoku tonu.

•   Ako ki he meʻa ʻoku akoʻi moʻoni ʻe he Tohi Tapú. (2 Tīmote 3:15) ʻOku pehē ʻe he Tohi Tapú naʻe tala ʻe he ʻapositolo ko Paulá mo Sailosi ki ha sela: “Tui ki he ʻEiki ko Sīsuú, pea ʻe fakahaofi koe.” Hili pē ia, naʻe kamata ke na akoʻi “ʻa e folofola ʻa Sihová” a ki he selá. (Ngāue 16:31, 32) ʻOku fakahaaʻi heni naʻe ʻikai malava moʻoni ki he selá ke ne tui kia Sīsū kae ʻoua kuó ne maʻu ʻa e ʻilo tefito ki he Folofola ʻa e ʻOtuá. Naʻe fiemaʻu ke ne maʻu ʻa e ʻilo totonu ʻoku makatuʻunga ʻi he Tohi Tapú.​—1 Tīmote 2:3, 4.

•   Fakatomala. (Ngāue 3:19) Kuo pau foki ke ke fakatomala, pe ongoʻi fakaʻiseʻisa moʻoni ʻi he ngaahi ʻulungaanga mo e tōʻonga hala ʻi he kuohilí. ʻE hā mahino atu ki he niʻihi kehé hoʻo fakatomalá ʻi hoʻo taʻofi hono fai ʻa e ngaahi meʻa ʻokú ne fakalotomamahiʻi ʻa e ʻOtuá pea fai ʻa e “ngaahi ngāue ʻoku tuha mo e fakatomalá.”​—Ngāue 26:20.

•   Hoko ʻo papitaiso. (Mātiu 28:19) Naʻe pehē ʻe Sīsū ko e faʻahinga ‘e hoko ko ʻene kau ākongá te nau papitaiso. Ko e sela naʻe lave ki ai ki muʻá naʻe papitaiso. (Ngāue 16:33) ʻI he tuʻunga meimei tatau, hili hono akoʻi ʻe he ʻapositolo ko Pitá ha fuʻu kakai ki he moʻoni ʻo kau kia Sīsū, “ko e faʻahinga naʻa nau tali fiefia ʻene leá naʻa nau papitaiso.”​—Ngāue 2:40, 41.

•   Talangofua ki he fakahinohino ʻa Sīsū. (Hepelū 5:9) Ko kinautolu ʻoku nau “tauhi ʻa e ngaahi meʻa kotoa pē” naʻe fekau ʻe Sīsuú, ʻoku nau fakahaaʻi ʻi heʻenau founga moʻuí ko ʻene kau muimui kinautolu. (Mātiu 28:20) ʻOku nau “hoko ko e kau fai ki he folofolá ʻo ʻikai ko e kau fanongo pē.”​—Sēmisi 1:22.

•   Kātaki ki he ngataʻangá. (Maʻake 13:13) Ko e kau ākonga ʻa Sīsuú ʻoku “fiemaʻu kiate [kinautolu] ʻa e kātakí” kae lava ke fakahaofi kinautolu. (Hepelū 10:36) Ko e fakatātaá, ko e ʻapositolo ko Paulá naʻá ne talangofua kakato ki he ngaahi akonaki ʻa Sīsuú, mateaki ki he ʻOtuá pea kātaki ai pē ʻo aʻu ki heʻene maté.​—1 Kolinitō 9:27.

 Fēfē ʻa e “Lotu ʻa e Tokotaha Angahalá”?

 ʻI he ngaahi lotu ʻe niʻihi ʻoku leaʻaki ʻe he kakaí ʻa e lotu hangē ko e “Lotu ʻa e Tokotaha Angahalá” pea mo e “Lotu ki he Fakamoʻuí.” Ko e anga-mahení, ko e lotu ko ení ʻoku fakahaaʻi ai ʻenau tuʻunga angahalaʻiá pea fakahāhā ʻenau tui naʻe pekia ʻa Sīsū maʻa ʻenau angahalá. Pea ʻoku nau toe lotu foki ke tali ʻa Sīsū ki heʻenau moʻuí. Ka ʻoku ʻikai ha lave pe poupouʻi ʻe he Tohi Tapú ʻa e founga lotu hangē ko e “Lotu ʻa e Tokotaha Angahalá.”

 ʻOku fakakaukau ʻa e kakai ʻe niʻihi hili hono fai ʻa e “Lotu ʻa e Tokotaha Angahalá,” ʻe lava ke fakapapauʻi ai ʻe he tokotahá ʻe fakahaofi ia. Ka ʻoku ʻikai ha lotu ʻiate ia pē te ne fakapapauʻi mai ʻa e fakamoʻuí. ʻI hotau tuʻunga taʻehaohaoá, te tau hokohoko atu ke fai ʻa e ngaahi fehālaaki. (1 Sione 1:8) Ko e ʻuhinga ia naʻe akoʻi ai ʻe Sīsū ʻene kau muimuí ke nau lotu maʻu pē ke fakamolemoleʻi ʻenau ngaahi angahalá. (Luke 11:2, 4) Tānaki atu ki aí, ko e kau Kalisitiane ʻe niʻihi naʻa nau fakatuʻotuʻa atu ke maʻu ʻa e moʻui taʻengatá naʻe mole meiate kinautolu ʻa e ʻamanaki ko iá, koeʻuhí naʻa nau tafoki mei he ʻOtuá.​—Hepelū 6:4-6; 2 Pita 2:20, 21.

 Naʻe kamata mei fē ʻa e “Lotu ʻa e Tokotaha Angahalá”?

 ʻOku ʻikai loto-tatau ʻa e kau faihisitōliá ki he tupuʻanga ko ia ʻo e “Lotu ʻa e Tokotaha Angahalá.” ʻOku pehē ʻe he niʻihi naʻe kamata ia ʻi he lolotonga ʻa e vahaʻa taimi ʻo e Fakalelei-Lotu Palotisaní. ʻOku tui ʻa e niʻihi naʻe kamata ke fai ʻe he kakaí ʻa e “Lotu ʻa e Tokotaha Angahalá” ʻi he taimi naʻe fokotuʻu ai ʻa e ngaahi lotu foʻoú ʻi he senituli hono 18 mo e 19. Pe ko e hā pē ʻa e tuʻungá, ko e tōʻonga lotu ko ení ʻoku ʻikai ke poupouʻi ia ʻe he Tohi Tapú​—ʻoku fepaki ia mo e ngaahi akonaki ʻa e Tohi Tapú.