Tali ʻa e Tohi Tapú

 ʻOku fakangeingeiaʻi kitautolu ʻe he ʻOtuá ʻaki hono ʻomai ʻa e tauʻatāina ke filí, ʻa e mālohi ke tau fai pē ʻe kitautolu ʻetau fili kae ʻikai ke tomuʻa fakapapauʻi ʻe he ʻOtuá pe ko hotau tufakangá. Tau lāulea angé pe ko e hā ʻoku akoʻi mai ʻe he Tohi Tapú.

•   Naʻe fakatupu ʻe he ʻOtuá ʻa e faʻahinga ʻo e tangatá ʻi hono ʻīmisí. (Sēnesi 1:26) ʻI he ʻikai hangē ko e fanga manú, ʻa ia ʻoku nau ngāue ʻo fakatatau ki honau poto fakanatulá, ʻoku tau hangē ko hotau Tokotaha-Fakatupú ʻi he malava ke tau fakahāhā ʻa e ngaahi ʻulungaanga hangē ko e ʻofá mo e fakamaau totonú. Pea hangē pē ko hotau Tokotaha-Fakatupú, ʻoku tau maʻu ʻa e tauʻatāina ke fili.

•   Ko hotau kahaʻú, ʻoku fakatuʻunga lahi pē ia ʻiate kitautolu. ʻOku fakalototoʻaʻi kitautolu ʻe he Tohi Tapú ke “fili ʻa e moʻuí . . . ʻaki [ʻa e] fanongo ki hono leʻó [ʻo e ʻOtuá],” ʻa ia ko e fili ke talangofua ki heʻene ngaahi fekaú. (Teutalōnome 30:19, 20) Ko e fakalototoʻa ko ení ʻe taʻeʻuhinga ia pe aʻu ʻo fakamamahi, kapau naʻe ʻikai ke tau maʻu ʻa e tauʻatāina ke filí. ʻOku ʻikai ke fakamālohiʻi kitautolu ʻe he ʻOtuá ke tau fai ʻa e meʻa ʻokú ne folofolaʻakí, ʻi hono kehé ʻokú ne kōlenga mai kiate kitautolu: “Pehē ange mai te ke tokanga ki heʻeku ngaahi tuʻutuʻuní! ʻE hoko leva ai ʻa hoʻo nongá ʻo hangē ko ha vaitafé.”​—ʻAisea 48:18.

•   Ko ʻetau lavameʻá pe taʻelavameʻá ʻoku ʻikai ke fakapapauʻi ia ʻe he tufakangá. Kapau ʻoku tau loto ke lavameʻa ʻoku fiemaʻu ke tau ngāue mālohi. “ʻIlonga ha meʻa ʻoku ʻilo ʻe ho nimá ke faí,” ko e lau ia ʻa e Tohi Tapú, “faiʻaki ia ʻa e kotoa ho mālohí.” (Tangata Malanga 9:10) ʻOku toe pehē ai: “Ko e ngaahi palani ʻa e tokotaha faʻa ngāué ʻe iku moʻoni atu ki he lavameʻa.”​—Palōveepi 21:5.

 Ko e tauʻatāina ke filí ko ha meʻaʻofa ia mei he ʻOtuá, he ʻoku fakaʻatā ai kitautolu ke tau ʻofa kiate ia ʻaki hotau “lotó kotoa”​—koeʻuhí ʻoku tau loto ki ai.​—Mātiu 22:37.

ʻIkai ko e ʻOtuá ʻokú ne puleʻi ʻa e meʻa kotoa pē?

 ʻOku akoʻi ʻi he Tohi Tapú ko e ʻOtuá ko e Māfimafi-Aoniu, ko hono mālohí ʻoku ʻikai ke fakangatangata ia ʻe ha toe taha. (Siope 37:23; ʻAisea 40:26) Kae kehe, ʻoku ʻikai te ne ngāueʻaki hono mālohí ke puleʻi ʻa e meʻa kotoa pē. Ko e fakatātaá, ʻoku pehē ʻe he Tohi Tapú ko e ʻOtuá naʻá ne “taʻotaʻofi” ia mei Pāpilone ʻo e kuonga muʻá, ko e fili hono kakaí. (ʻAisea 42:14) ʻI he tuʻunga meimei tatau, ʻi he taimi ní, ʻokú ne fili ke makātakiʻi ʻa e faʻahinga ʻokú nau ngāuehalaʻaki ʻenau tauʻatāina ke filí ke uesia ʻa e niʻihi kehé. Ka heʻikai ke fai pehē ai pē ʻa e ʻOtuá ʻo taʻengata.​—Saame 37:10, 11.