Tali ʻa e Tohi Tapú

 ʻOku ʻikai ke lave fakahangatonu ʻa e Tohi Tapú ki he ʻata fakalieliá, fehokotaki fakasino faka-ʻinitanetí, pe ngaahi tōʻonga meimei tatau mo iá. Kae kehe, ʻoku fakahaaʻi māʻalaʻala ʻe he Tohi Tapú ʻa e anga ʻo e ongoʻi ʻa e ʻOtuá fekauʻaki mo e ngaahi tōʻonga ʻokú ne pouaki ʻa e fehokotaki fakasino ʻi tuʻa ʻi he nofo malí pe vakai hala fekauʻaki mo e fehokotaki fakasinó. Fakakaukau angé ki he ngaahi veesi Tohi Tapu ko ení:

•   “Ko ia ai, mou ʻai ke mate ʻa e ngaahi kupu ʻo homou sinó ʻa ia ʻoku ʻi he māmaní ʻi he fekauʻaki mo e fehokotaki fakasino taʻetāú, taʻemaʻá, holi taʻemapuleʻi fakaefehokotaki fakasinó.” (Kolose 3:5) Ko e sio ʻi he ʻata fakalieliá ʻokú ne fakaʻaiʻai ʻa e ngaahi holi fehālaakí. ʻOkú ne ʻai ha taha ke ne hoko ʻo taʻemaʻa pe taʻetaau ʻi he vakai ʻa e ʻOtuá.

•   “Ko e tokotaha kotoa ʻoku hanganaki sio ki ha fefine ke tafunaki ki ai ʻene holí kuó ne ʻosi tonoʻi ia ʻi hono lotó.” (Mātiu 5:​28) Ko e ngaahi ʻata ʻo e tōʻonga fakaefehokotaki fakasino taʻetāú ʻokú ne tafunaki ʻa e ngaahi fakakaukau halá ʻa ia ʻoku taki atu ki he ngaahi tōʻonga halá.

•   “Ko e fehokotaki fakasino taʻetāú mo e faʻahinga kotoa pē ʻo e taʻemaʻá pe mānumanú, tuku ke ʻoua naʻa fai ha talanoa ki ai ʻi homou lotolotongá.” (ʻEfesō 5:3) ʻOku ʻikai totonu ke tau fiefia ʻi he talanoa naʻa mo e lave ki he fehokotaki fakasino taʻetāú.

•   “Ko e ngaahi ngāue ʻa e kakanó kuo hā mahino ia, ʻa ia ko e fehokotaki fakasino taʻetaau, taʻemaʻa, . . . mo e ngaahi meʻa hangē ko ʻení. ʻOku ou tomuʻa fakatokanga atu kiate kimoutolu ʻo fekauʻaki mo e ngaahi meʻá ni, hangē pē ko ia naʻá ku ʻosi fakatokanga atu ai kiate kimoutolú, ko e faʻahinga ʻoku nau tōʻongaʻaki ʻa e ngaahi meʻa peheé ʻe ʻikai te nau maʻu tofiʻa ʻi he Puleʻanga ʻo e ʻOtuá.” (Kalētia 5:​19-​21) ʻOku vakai ʻa e ʻOtuá ki he faʻahinga ʻoku nau ngāueʻaki ʻa e ʻata fakalieliá pe kau ʻi he fehokotaki fakasino faka-ʻinitanetí, telefoni fakalieliá, pe feʻaveʻaki pōpoaki fakalielia ʻi he telefoní, ʻoku nau taʻemaʻa, pea fakameleʻi fakaeʻulungaanga. Kapau te tau fai ʻa e ngaahi meʻa ko ení, ʻe mole fakaʻaufuli meiate kitautolu ʻa e hōifua ʻa e ʻOtuá.