Skip to content

Skip to table of contents

Kau Fakamo‘oni ‘a Sihova

Fili ‘a e lea Faka-Tonga

Talanoa 22: Na‘e Tuku Pilīsone ‘a Siosifa

Talanoa 22: Na‘e Tuku Pilīsone ‘a Siosifa

NA‘E ta‘u 17 pē ‘a Siosifa ‘i hono ‘ave ia ki ‘Isipité. Na‘e fakatau atu ia ‘i ai ki he tangata na‘e hingoa ko Pōtifa. Na‘e ngāue ‘a Pōtifa ki he tu‘i ‘o ‘Isipite, ‘a ia na‘e hingoa ko Felo.

Siosifa ‘i he pilīsoné

Na‘e ngāue mālohi ‘aupito ‘a Siosifa ki hono pule ko Pōtifá. Ko ia ‘i he tupu ‘a Siosifa ‘o motu‘a angé, na‘e fokotu‘u ia ‘e Pōtifa ke pule ki hono falé kotoa. Ko ia ai, ko e hā ‘a e ‘uhinga ‘oku tuku pilīsone ai heni ‘a Siosifá? Ko hono ‘uhingá ko e uaifi ‘o Pōtifá.

Na‘e tupu hake ‘a Siosifa ko e tangata matamata-lelei, pea na‘e fiema‘u ‘e he uaifi ‘o Pōtifá ke ne mohe mo ia. Ka na‘e ‘ilo ‘e Siosifa ko e me‘a ia ‘oku hala, pea na‘e ‘ikai te ne fai ia ‘e ia. Na‘e ‘ita ‘aupito ‘a e uaifi ‘o Pōtifá. Ko ia ‘i he foki mai ‘a hono husepānití ki hona ‘apí, na‘á ne loi ange ki ai ‘o pehē: ‘ ‘Oku kovi ‘aupito ‘a Siosifa he na‘á ne feinga ke mohe mo au!’ Na‘e tui ‘a Pōtifa ki hono uaifí, pea na‘á ne ‘ita ‘aupito kia Siosifa. Ko ia na‘á ne ‘ai ke lī ia ki he pilīsoné.

Na‘e vave ‘a e ‘ilo ‘e he tangata ‘okú ne tauhi ‘a e pilīsoné ko ha tangata lelei ‘a Siosifa. Ko ia na‘á ne tuku ‘a Siosifa ke ne tokanga‘i ‘a e kau pōpula kehé hono kotoa. Ki mui mai na‘e ‘ita ‘a Felo ‘i he‘ene tangata tauhi ipú mo ‘ene tangata ta‘o mā, pea na‘á ne tuku pilīsone mo kinaua. ‘I he pō ‘e taha na‘á na mohe ‘o na taki taha ha misi makehe, ka na‘e ‘ikai te na ‘ilo hono ‘uhinga ‘o ‘ena misí. ‘I he ‘aho hono hokó na‘e pehē ‘e Siosifa: ‘Fakahā mai ho‘omo misí.’ Pea ‘i he‘ena fakahā angé, na‘e fakamatala ‘e Siosifa ‘i he tokoni ‘a e ‘Otuá ki he ‘uhinga ‘o ‘ena misí.

Na‘e pehē ‘e Siosifa ki he tangata tauhi ipú: ‘ ‘I he ‘aho hono tolu mei heni ‘e faka‘atā koe mei he pilīsoné, pea te ke toe hoko pē ko e tangata tauhi ipu ‘a Felo.’ Ko ia na‘e toe hoko atu ‘e Siosifa: ‘ ‘I he taimi te ke ‘atā aí, tala kia Felo ‘o fekau‘aki mo au, pea tokoni‘i au ke u ‘atā mei he feitu‘ú ni.’ Ka na‘e pehē ‘e Siosifa ki he tangata ta‘o mā: ‘ ‘I he ‘aho ‘e tolu mei heni ‘e tu‘usi ‘e Felo ho ‘ulú.’

‘I he ‘aho hono tolú na‘e hoko ‘o hangē ko e fakamatala ‘a Siosifá. Na‘e ‘ai ‘e Felo ke tu‘usi ‘a e ‘ulu ‘o e tangata ta‘o mā. Ka na‘e tuku ange ‘a e tangata tauhi ipú, pea toe kamata ngāue pē ki he tu‘í. Ka na‘e ngalo kotoa ‘a e me‘a ‘o fekau‘aki mo Siosifá ‘i he tangata tauhi ipú! Na‘e ‘ikai te ne tala kia Felo ‘o fekau‘aki mo ia, pea na‘e kei nofo pilīsone ai pē ‘a Siosifa.

Sēnesi 39:1-23; 40:1-23.



Fehu‘i

  • Na‘e ta‘u fiha ‘a Siosifa ‘i hono ‘ave ia ki ‘Isipité, pea ko e hā na‘e hoko ‘i he‘ene a‘u ki aí?
  • Na‘e anga-fēfē ‘a e iku ‘a Siosifa ki he pilīsoné?
  • Ko e hā ‘a e fatongia na‘e ‘oange kia Siosifa ‘i he pilīsoné?
  • Ko e hā na‘e fai ‘e Siosifa ‘i he pilīsoné ma‘á e tangata tauhi ipu mo e tangata ta‘o mā ‘a Feló?
  • Ko e hā na‘e hokó ‘i he hili hono tuku ange ‘a e tangata tauhi ipú mei he pilīsoné?

Ngaahi fehu‘i fakalahi

  • Lau ‘a e Sēnesi 39:1-23.

    Koe‘uhi na‘e ‘ikai ha lao na‘e hiki mei he ‘Otuá na‘e fakahalaia‘i ai ‘a e tonó ‘i he ‘aho ‘o Siosifá, ko e hā na‘á ne ue‘i ia ke ne hola mei he uaifi ‘o Pōtifá? (Sēn. 2:24; 20:3; 39:9)

  • Lau ‘a e Sēnesi 40:1-23.

    Fakamatala‘i nounou ‘a e misi ‘a e tangata tauhi ipú pea mo e faka‘uhinga na‘e ‘oange ‘e Sihova kia Siosifá. (Sēn. 40:9-13)

    Ko e hā ‘a e misi ‘a e tangata ta‘o maá, pea ko e hā hono ‘uhingá? (Sēn. 40:16-19)

    ‘Oku anga-fēfē ‘a e fa‘ifa‘itaki ‘a e kalasi tamaio‘eiki anga-tonu mo potó ‘i he ‘ahó ni ki he fakakaukau ‘a Siosifá? (Sēn. 40:8; Sāme 36:9; Sione 17:17; Ng. 17:2, 3)

    ‘Oku anga-fēfē ‘a e fakamaama ‘e he Sēnesi 40:20 ‘a e vakai ‘a e Kalisitiané ki he ngaahi kātoanga fai‘ahó? (Koh. 7:1; Mk. 6:21-28)