Fetela kwa tshedimosetsong

Fetela go diteng

Mary_Ukraine/stock.adobe.com

NNANG LO DISITSE!

Batho ga ba Tlhole ba Tshepa Baeteledipele ba Dipolotiki—Baebele e a Reng ka Kgang Eno?

Batho ga ba Tlhole ba Tshepa Baeteledipele ba Dipolotiki—Baebele e a Reng ka Kgang Eno?

 Mo ngwageng ono wa 2024, dinaga di le dintsi go ralala lefatshe di tla bo di ya ditlhophong. Ga go ise go ke go direge gore dinaga di le dintsi jalo di ye ditlhophong mo ngwageng o le mongwe. Le fa go ntse jalo, batho ba le bantsi ga ba tlhole ba tshepa baeteledipele ba dipolotiki.

  •    Bontsi jwa batho ba ba ileng ba botsolodiwa kwa Amerika ba tlhalosa gore “baeteledipele ba dipolotiki ba le bantsi ba tlhotlhelediwa ke bopelotshetlha” go na le go tlhotlhelediwa ke go batla go thusa batho. a—Pew Research Center, September 19, 2023.

 Basha ba le bantsi le bone ga ba tlhole ba tshepa baeteledipele ba dipolotiki.

  •    “Gompieno, gantsi basha ba tshwenyegile thata ka go batla tharabololo ya mathata a ba nang le one, mme fa ba botsolodiwa ba tlhalosa gore baeteledipele ba dipolotiki ga ba bone tharabololo eo.”—The New York Times, January 29, 2024.

  •    “Go ya ka potsolotso nngwe, basha ba tshepa batho ba ba tsenyang dibidio mo social media e bile ba latelwa ke batho ba le bantsi. Ba tshepa batho bao thata go feta tsela e ba tshepang baeteledipele ba dipoloitiki ka yone.”—The Korea Times, January 22, 2024.

 A re ka tshepa gore baeteledipele ba dipoloitiki ba tla tlisa bokamoso jo bo botoka? Ke mang yo re ka mo tshepang?

Nna kelotlhoko gore o tshepa mang

 Go molemo go bo batho ba le kelotlhoko gore ba tshepa mang. Baebele e a re “motho yo o se nang maitemogelo o dumela lefoko lengwe le lengwe, mme yo o botlhale o akanyetsa kgato nngwe le nngwe e a e tsayang.”—Diane 14:15.

  •    Fa o batla go bona dikakantsho tse di ka go thusang go sekaseka gore a tshedimosetso e o e amogelang e boammaaruri kgotsa ke maaka, bala setlhogo se se reng “Protect Yourself From Misinformation.”

 Mo godimo ga moo, tota le baeteledipele ba dipolotiki ba ba ikanyegang e bile ba na le maitlhomo a a siameng, ba ka se kgone go dira sengwe le sengwe se ba batlang go se dira. Ke gone ka moo Baebele e re tlhagisang jaana:

  •    “O se ka wa ikanya baeteledipele ba batho; ga go na motho ope yo o ka go bolokang.”—Pesalema 146:3, Good News Translation.

Moeteledipele yo o ka mo tshepang

 Baebele e tlhalosa gore Modimo o tlhomile moeteledipele yo o nang le bokgoni le yo re ka mo tshepang. Moeteledipele yoo ke Jesu Keresete. (Luke 1:32, 33) Jesu ke Kgosi ya Bogosi Jwa Modimo, e leng puso e e busang e le kwa legodimong.—Mathaio 6:10.

a Pew Research Center, “Americans’ Dismal Views of the Nation’s Politics,” September 2023.