Fetela kwa tshedimosetsong

Fetela go diteng

Moganetsakeresete ke Mang?

Moganetsakeresete ke Mang?

Filimi ya bosheng e e tshosang e bidiwa Antichrist (Moganetsakeresete).

Setlhopha sengwe se se itsegeng sa mmino se bitsa alebamo ya sone Antichrist Superstar (Mogaka wa Moganetsakeresete).

Friedrich Nietzsche, rafilosofi wa lekgolo la bo19 la dingwaga o bitsa nngwe ya dibuka tsa gagwe The Antichrist (Moganetsakeresete).

Dikgosi le babusibagolo ba Metlha ya Bogare gantsi ba bitsa batho ba ba kgatlhanong le bone ba re ke baganetsakeresete.

Martin Luther, moeteledipele wa Phetogo e Kgolo wa Mojeremane o ne a re bomopapa ba Kereke ya Katoliki ke baganetsakeresete.

E RE ka lefoko “moganetsakeresete” le sa bolo go dirisiwa ke dikgosi le mo difiliming, go tlwaelegile go botsa jaana: Moganetsakeresete ke mang? A lefoko leno le a re ama gompieno? Fa re batla go itse gore moganetsakeresete ke mang, re ka sekaseka Baebele ka gonne lefoko leno le tlhaga ka makgetlo a le matlhano mo go yone.

MOGANETSAKERESETE O A SENOLWA

Lefoko “moganetsakeresete” le dirisitswe ke mokwadi a le mongwe fela wa Baebele e bong moaposetoloi Johane. O ne a tlhalosa moganetsakeresete jang? Bona mafoko ano a a mo bukeng e e bidiwang ka leina la gagwe: “Bana ba babotlana, ke nako ya bofelo, mme, fela jaaka lo utlwile gore moganetsakeresete o e tla, le jaanong go setse go na le baganetsakeresete ba le bantsi; e leng ntlha e re nnang le kitso ka yone ya gore ke nako ya bofelo. Ba ne ba tswa mo go rona, mme e ne e se ba mofuta wa rona . . . Moaki ke mang fa e se yo o latolang gore Jesu ke Keresete? Yono ke moganetsakeresete, yo o latolang Rara le Morwa.”—1 Johane 2:18, 19, 22.

Moaposetoloi Johane o ne a itse gore moganetsakeresete ke mongwe le mongwe yo o anamisang dithuto tsa maaka tsa bodumedi ka ga Jesu Keresete le dithuto tsa gagwe

Re ithuta eng mo mafokong ao? Johane o umaka “baganetsakeresete ba le bantsi,” e leng se se bontshang gore ga se motho a le mongwe mme ke setlhopha sa batho. Batho kgotsa mekgatlho e e bopang moganetsakeresete ba anamisa maaka, ga ba dumele gore Jesu ke Keresete kgotsa Mesia e bile ba leka go sokamisa boammaaruri malebana le gore Modimo le Morwawe e bong Jesu Keresete ba amana jang. Ba ipitsa Keresete kgotsa balatedi ba gagwe, mme e re ka “ba tswa mo go rona,” ba fapogile mo dithutong tse di boammaaruri tsa Baebele. Mo godimo ga moo, setlhopha seno se ne se le gone fa Johane a ne a kwala lekwalo la gagwe ka “nako ya bofelo,” gongwe kwa bowelong jwa motlha wa baaposetoloi.

Johane o ne a reng gape ka moganetsakeresete? Fa a ne a tlhagisa ka baporofeti ba maaka o ne a re: “Polelwana nngwe le nngwe e e tlhotlheleditsweng e e ipolelang fa Jesu Keresete e le yo o tlileng mo nameng e tswa mo Modimong, mme polelwana nngwe le nngwe e e tlhotlheleditsweng e e sa ipoleleng Jesu ga e tswe mo Modimong. Mo godimo ga moo, eno ke polelwana e e tlhotlheleditsweng ya moganetsakeresete yo lo utlwileng gore o a tla, mme jaanong o setse a le mo lefatsheng.” (1 Johane 4:2, 3) Go tswa foo, Johane o ne a gatelela ntlha eno jaana mo lekwalong la gagwe la bobedi: “Batsietsi ba le bantsi ba tswetse mo lefatsheng, batho ba ba sa boleleng fa ba dumela gore Jesu Keresete o tla a le mo nameng. Yono ke motsietsi le moganetsakeresete.” (2 Johane 7) Johane o ne a tlhaloganya sentle gore moganetsakeresete ke mongwe le mongwe yo o anamisang dithuto tsa maaka tsa bodumedi ka ga Jesu Keresete le dithuto tsa ga Jesu.

‘BAPOROFETI BA MAAKA’ LE “MONNA YO O SE NANG MOLAO”

Jesu o ne a tlhagisa ka baporofeti ba maaka ba ba neng ba tla tla jaaka ‘diphiri tse di garolakang tse di apereng diaparo tsa nku’

Dingwaga di le dintsi pele Johane a kwala ka batsietsi bao ba bodumedi, Jesu Keresete o ne a gakolola balatedi ba gagwe jaana: “Itiseng mo baporofeting ba maaka ba ba tlang mo go lona ba le mo diaparong tsa dinku, mme mo teng e le diphiri tse di garolakang.” (Mathaio 7:15) Moaposetoloi Paulo le ene o ne a tlhagisa Bakeresete ba kwa Thesalonika jaana: “A ope a se ka a lo faposa ka mokgwa ope, ka gonne [letsatsi la ga Jehofa] ga le na go tla fa botlhanogi bo sa tle pele le monna yo o se nang molao a senolwa, morwa tshenyego.”—2 Bathesalonika 2:3.

Ka jalo, mo lekgolong la ntlha la dingwaga, baporofeti ba maaka le batlhanogi ba ne ba setse ba tsietsa batho ka boikaelelo jwa go koafatsa phuthego ya Bokeresete. Botlhe ba ba anamisang dithuto tsa maaka tsa bodumedi ka ga Jesu Keresete le dithuto tsa gagwe le bone ba akarediwa mo lefokong “moganetsakeresete,” le Johane a le dirisitseng. Fa Moaposetoloi Paulo a ne a ba bitsa “bomorwa tshenyego,” o ne a senola tsela e Jehofa a ba lebang ka yone.

IKELE TLHOKO MO DITIRONG TSA MOGANETSAKERESETE

Go tweng gompieno? Batho le mekgatlho e e bopang moganetsakeresete ba sa ntse ba ganetsa Keresete le dithuto tsa gagwe. Ba anamisa maaka le go tsietsa batho gore ba se ka ba lemoga gore tota Rara e bong Jehofa Modimo le Morwawe e bong Jesu Keresete ke bomang. Re tshwanetse go ikela tlhoko gore re se ka ra tsiediwa ke maaka ao a bodumedi. Mma re sekaseke dikai tse pedi.

Dikereke di ne tsa anamisa thuto ya gore Rara, Morwa le moya o o boitshepo ke Modimo a le mongwe. Ka go dira jalo, moganetsakeresete o dira gore batho ba se ka ba itse Jehofa Modimo le Jesu Keresete. Seno se dira gore batho ba ba siameng ba se ka ba etsa Jesu Keresete le go atamalana le Modimo jaaka Baebele e ba kgothaletsa go dira jalo.—1 Bakorintha 11:1; Jakobe 4:8.

Dikereke di timetsa batho le go feta ka go dirisa dithanolo tsa Baebele tse di se nang leina la Modimo, Jehofa. Ba dira jalo le fa leina Jehofa le tlhaga ka makgetlo a ka nna 7 000 mo mokwalong wa ntlhantlha wa Baebele. Seo se nnile le diphelelo dife? Se dira gore batho ba se ka ba itse Modimo.

Ka fa letlhakoreng le lengwe, go itse leina la Modimo, Jehofa, go thusitse batho ba bantsi ba ba mo obamelang gore ba atamalane le ene. Mongwe wa bone ke Richard yo o gopolang motlotlo wa gagwe le Basupi ba ga Jehofa ba babedi. Richard a re: “Ba ne ba mpontsha go tswa mo Baebeleng gore leina la Modimo wa boammaaruri ke Jehofa. Ke ne ke itumeletse go itse gore Modimo o na le leina, e leng se ke neng ke ise ke tsamaye ke se utlwe.” Go tloga ka nako eo, Richard o ne a tshela ka melao ya Baebele le go itumedisa Jehofa. “Go itse leina la Modimo go nthusitse gore ke atamalane thata le ene.”

Go setse go fetile dingwaga di le dintsi moganetsakeresete a dira gore batho ba se ka ba itse boammaaruri. Mme fa re ithuta Lefoko la Modimo, Baebele, re ka kgona go lemoga moganetsakeresete le go tswa mo maakeng le mo tsietsong ya gagwe ya bodumedi.—Johane 17:17.