Fetela kwa tshedimosetsong

Fetela go diteng

 BABADI BA BOTSA JAANA . . .

A Ista e Simologile mo Bokereseteng?

A Ista e Simologile mo Bokereseteng?

Buka ya tshedimosetso ya Encyclopædia Britannica ya re “Ista ke moletlo o mogolo o mo go one Bakeresete ba ketekang Tsogo ya ga Jesu Keresete.” Le fa go ntse jalo, a tota o simologile mo Bokereseteng?

Gore re lemoge gore selo ke sa mmatota, re tshwanetse go se sekaseka ka kelotlhoko. Ka jalo, gore le rona re lemoge gore a Ista ke moletlo o o simologileng mo Bokereseteng, re tshwanetse go sekaseka dintlha dingwe tse di amanang le one.

Sa ntlha, Jesu o ne a laela balatedi ba gagwe go gopola loso lwa gagwe e seng tsogo ya gagwe. Moaposetoloi Paulo o ne a re tiragalo eno ke “dijo tsa maitseboa tsa Morena.”—1 Bakorintha 11:20; Luke 22:19, 20.

Buka ya tshedimosetso ya Britannica ya re ditlwaelo tse dintsi tsa Ista “ga di amane ka gope” le tsogo ya ga Jesu “go na le moo di tserwe mo dingwaong tsa batho.” Ka sekai, fa The Encyclopedia of Religion e bua ka mae le mmutla o o dirisiwang ka Ista ya re: “Mae a emela botshelo jo bo tswang mo go se go tweng ke loso, kgapetla (e e thata) ya lee.” E oketsa ka go re: “Mmutla o itsege e le sebopiwa se se tsalang thata ka jalo o tshwantshetsa go tla ga dikgakologo.”

Porofesa wa dibuka tsa bogologolo e bong Philippe Walter o tlhalosa gore dingwao tseo di ne tsa simolola go dirisiwa mo meletlong ya Ista. O ne a re “fa dikereke tsa boheitane di sokololelwa mo Bokereseteng,” go ne ga nna motlhofo gore moletlo wa boheitane wa “go keteka go fela ga mariga le go tsena ga dikgakologo” o amanngwe le tsogo ya ga Jesu. Walter o tswelela ka gore seno se ne sa dira gore “meletlo ya Bokeresete” e tsenngwe mo khalendareng ya boheitane le gore e ketekiwe ke batho ba bantsi.

Mokgwa ono wa go kopanya “Boheitane le Bokeresete” ga o a ka wa direga fa baaposetoloi ba sa ntse ba tshela ka gonne ba ne ba ‘thibela’ boheitane. (2 Bathesalonika 2:7) Moaposetoloi Paulo o ne a tlhagisa gore fa a sena “go tsamaya” go ne go tla ‘tsoga banna ba ba neng ba tla bua dilo tse di sokameng gore ba gogele barutwa kwa go bone.’ (Ditiro 20:29, 30) Mme kwa bowelong jwa lekgolo la ntlha la dingwaga, moaposetoloi Johane o ne a kwala gore banna bangwe ba ne ba setse ba tsietsa Bakeresete. (1 Johane 2:18, 26) Dingwao tsa boheitane di ne di setse di dirisiwa.

“Lo se ka lwa pataganela jokwe le ba ba sa dumeleng e le mo go sa lekalekaneng.”—2 Bakorintha 6:14

Bangwe ba ne ba ka akanya gore go letlelela dingwe tsa dingwao tsa Ista go ne go se phoso—gore di ne di tla thusa “baheitane” go tlhaloganya gore tsogo ya ga Jesu e kayang. Le fa go ntse jalo, Paulo o ne a ka se dumalane le seo. Le fa a ne a bona dingwao tse dintsi tsa boheitane di dirwa fa a ntse a tsamaya mo Mmusomogolong wa Roma, ga a ka a di dira ka maitlhomo a go thusa batho go itse Jesu botoka. Go na le moo, o ne a tlhagisa Bakeresete jaana: “Lo se ka lwa pataganela jokwe le ba ba sa dumeleng e le mo go sa lekalekaneng. Gonne tshiamo le go tlhoka molao di na le bolekane bofe? Kgotsa lesedi le na le kabalano efe le lefifi? ‘Jalo tswang mo gare ga bone, lo bo lo itomolole,’ go bua Jehofa, ‘mme lo tlogele go ama selo se se seng phepa.’”—2 Bakorintha 6:14, 17.

Fa re sena go sekaseka dintlha ka bokhutshwane, re ka re re lemogileng? Go bonala sentle gore Ista ga se moletlo o o simologileng mo Bokereseteng.