Fetela kwa tshedimosetsong

Fetela go diteng

 ATAMALANA LE MODIMO

“Modimo o Rata yo o Nayang ka Boitumelo”

“Modimo o Rata yo o Nayang ka Boitumelo”

Ke mpho e e ntseng jang e o neng o ka e anaanela thata? Ga go pelaelo gore bontsi jwa rona re ka itumela fa re amogela mpho go tswa mo mothong yo o abang ka ntlha ya lorato go na le yo o e abang ka go patelelwa. Fa go tliwa mo kgannyeng ya go aba, maitlhomo a motho a botlhokwa. Maitlhomo a botlhokwa mo go rona. Mme se se botlhokwa le go feta, a botlhokwa mo Modimong. Ela tlhoko mafoko a a tlhotlheleditsweng a ga moaposetoloi Paulo a a mo go 2 Bakorintha 9:7.

Ke ka ntlha yang fa Paulo a ne a kwala mafoko ao? O ne a batla go rotloetsa Bakeresete ba kwa Korintha gore ba tshegetse tiro ya namolo e e neng e direlwa badumedi ka bone ba ba tlhokang ba kwa Judea. A o ne a leka go pateletsa Bakorintha go aba? Le e seng, o ne a kwala jaana: “A mongwe le mongwe a dire fela jaaka a sweditse mo pelong ya gagwe, e seng ka go ikgoga fela kgotsa ka go patelelwa, gonne Modimo o rata yo o nayang ka boitumelo.” Mma re sekaseke kgothatso eo ka kelotlhoko.

“Fela jaaka a sweditse mo pelong ya gagwe.” Paulo a re, Mokeresete wa boammaaruri o aba ka go bo a sweditse go dira jalo “mo pelong ya gagwe.” Mme gape, Mokeresete o akanyetsa ka kelotlhoko dilo tse moobamedi ka ene a di tlhokang. Mokanoki mongwe a re, lefoko la puo ya ntlhantlha le le ranotsweng e le “sweditse” “le na le kgopolo ya go akanyetsa dilo e sa le gale.” Ka jalo, Mokeresete o akanya ka dilo tse modumedi ka ene a di tlhokang mme a bo a ipotsa gore a ka dira eng go mo thusa.—1 Johane 3:17.

“E seng ka go ikgoga fela kgotsa ka go patelelwa.” Paulo o bua ka ditsela tse pedi tsa go aba tse Mokeresete wa boammaaruri a tshwanetseng go di tila—ka go ikgoga fela kgotsa ka go okaoka. Polelwana ya Segerika e e ranotsweng e le “ka go ikgoga fela” fa e tsewa fela jaaka e ntse e kaya “ka go hutsafala (kgotsa ka kutlobotlhoko).” Buka nngwe e tlhalosa gore motho yo o abang ka go ikgoga fela kgotsa ka go okaoka o aba “ka pelo e e hutsafaditsweng ke go akanya ka go latlhegelwa ke madi.” Motho yo o abang ka go patelelwa o aba ka go bo a ikutlwa a patelesega go dira jalo. Tota ke mang mo go rona yo o batlang go amogela mpho e e tswang mo mothong yo o abang ka go okaoka kgotsa ka go patelelwa?

Modimo o rata yo o nayang ka boitumelo.” Paulo a re, fa Mokeresete a swetsa ka gore a abe, o tshwanetse go dira jalo ka boitumelo kgotsa ka boipelo. Ee, motho o itumedisiwa ke go bo a aba ka maitlhomo a a siameng. (Ditiro 20:35) Motho yo o abang ka boitumelo ga a kgone go fitlha tsela e a ikutlwang ka yone. Tota e bile, lefoko “boitumelo” le ka tlhalosa sentle kafa motho a ikutlwang ka teng le kafa a lebegang ka teng. Motho yo o abang ka boitumelo o dira gore re itumele. Gape o itumedisa pelo ya Modimo. Thanolo e nngwe ya re: “Modimo o rata batho ba ba ratang go aba.”—Contemporary English Version.

“Modimo o rata batho ba ba ratang go aba”

Mafoko a a tlhotlheleditsweng a ga moaposetoloi Paulo ke molaomotheo o o ka kaelang Bakeresete kafa ba tshwanetseng go aba ka teng. E ka tswa re aba nako ya rona, maatla kgotsa dithoto, mma re dire jalo ka go rata le ka go bo ruri re itumelela go nna pelotshweu mo bathong ba bangwe, segolobogolo ba ba tlhokang. Go aba go go ntseng jalo go ka se dire fela gore re itumele mme gape go tla dira gore Modimo a re rate, ka gonne o “rata yo o nayang ka boitumelo.”

Dikgaolo tsa Baebele tse di ka balwang ka September

Bakorintha wa ntlha le wa bobedi