Fetela kwa tshedimosetsong

Fetela go diteng

A o Ka Ikanya Bodumedi Malebana le Madi?

A o Ka Ikanya Bodumedi Malebana le Madi?

Estelle * yo o neng a na le bana ba le mmalwa o ne a ya kerekeng ka metlha. A re: “Ke ne ka bolelela moruti wa me gore ke batla go ithuta Baebele.” Mme ga a ka a ithaopa go mo ruta. Kgabagare o ne a tlogela go ya kerekeng. O tswelela ka gore: “Baeteledipele ba kereke ba ne ba nkwalela lekwalo mme ba mpolelela gore fa e le gore ga ke kgone go nna teng, nka nna ka romela madi fela. Ke ne ka lemoga gore, ‘Ga ba kgathale gore a ke teng; ba batla madi a me fela.’”

Angelina, yo o sa bolong go rata bodumedi, o ne a re: “Kwa kerekeng ya rona, ba fetisa seroto ka makgetlho a le mararo ka nako ya tirelo ya kereke mme go lebeletswe gore nako le nako fa se feta re ntshe madi. Ba ne ba kopa madi ka metlha. Ke ne ka lemoga gore, ‘Batho bano ga ba na moya wa Modimo.’”

A madumedi a a mo lefelong la lona a dirisa mekgwa e e farologaneng go pateletsa batho go ntsha madi? A seo se tsamaisana le se Baebele e se rutang?

BAEBELE E RUTA ENG?

Jesu, mosimolodi wa Bokeresete o ne a re: “Lo amogetse mahala, nayang mahala.” (Mathaio 10:8) Molaetsa wa Baebele ga o a tshwanelwa go duelelwa mme o tshwanetse go newa mongwe le mongwe yo o o batlang.

Bakeresete ba bogologolo ba ne ba duelela jang ditshenyegelo tsa phuthego?

Mongwe le mongwe o ne a ntsha “fela jaaka a sweditse mo pelong ya gagwe, e seng ka go ikgoga ka go patelelwa, gonne Modimo o rata yo o nayang ka boitumelo.” (2 Bakorintha 9:7) Moaposetoloi Paulo o ne a re: ‘E ne e le ka go dira bosigo le motshegare, re neng ra lo rerela dikgang tse di molemo, gore re se ka ra rwesa ope wa lona mokgweleo wa ditshenyegelo tse dintsi.’ (1 Bathesalonika 2:9) Paulo o ne a dira megope go itlamela mo bodireding jwa gagwe.—Ditiro 18:2, 3.

BASUPI BA GA JEHOFA BA DIRA JANG MO NTLHENG ENO?

Gantsi Basupi ba ga Jehofa ba kopanela mo meagong e e seng maphatsiphatsi e e bidiwang Diholo Tsa Bogosi. Ditshenyegelo di duelelwa jang? Le ka motlha ga ba ke ba fetisa dipoleite tsa koleke, e bile ga ba romele dienfelopo go kopa meneelo. Go na le moo, mongwe le mongwe fela yo o anaanelang thulaganyo ya semoya a ka tsenya moneelo mo lebokosong la meneelo kwa Holong ya Bogosi.

Bodumedi bo tshwanetse go tshegediwa jang ka madi?

Ga go pelaelo gore go gatisiwa ga makasine ono le go o romela go ja madi a mantsi. Le fa go ntse jalo, o ka se ka wa bona dipapatso kgotsa dikopo tsa madi mo go one. O bua thata ka go anamisiwa ga boammaaruri jwa Baebele.

O akanya eng: A dithulaganyo tsa go duelela ditshenyegelo di tsamaisana le mafoko a ga Jesu le sekao sa Bakeresete ba bogologolo?

^ ser. 2 Maina mangwe mo motseletseleng ono wa ditlhogo a fetotswe.