Fetela kwa tshedimosetsong

Fetela go diteng

Dikarabo Tsa Dipotso Tsa Baebele

Dikarabo Tsa Dipotso Tsa Baebele

A go a kgonega go tshelela ruri?

Ke thulaganyo efe e e ka dirang gore re gololwe mo losong?

Monna wa ntlha e bong Adame o tshetse makgolo a dingwaga. Mme kgabagare, o ne a tsofala mme a swa. Fa e sa le go tloga ka nako eo, batho ba lekile dilo di le dintsi go tila go tsofala. Le fa go ntse jalo, ga go na ope yo o kileng a kgona go falola loso. Ka ntlha yang? Adame o ne a tsofala mme a swa ka gonne o ne a leofetse Modimo ka go sa mo ikobele. Rona re a tsofala ka gonne re ruile boleo le ditlamorago tsa jone e leng loso go tloga mo go Adame.—Bala Genesise 5:5; Baroma 5:12.

E le gore re itumelele botshelo jo bo sa khutleng, re tlhoka motho yo o tla re duelelang thekololo. (Jobe 33:24, 25) Thekololo ke tlhwatlhwa e e duelwang go golola mongwe, mme rona re tlhoka go gololwa mo losong. (Ekesodo 21:29, 30) Jesu o ne a duela tlhwatlhwa eo fa a ne a re swela.—Bala Johane 3:16.

Re ka bona jang botshelo jo bo sa khutleng?

Ga se batho botlhe ba ba tla gololwang mo bolwetseng le mo botsofeng. Tota e bile, batho ba ba sa ikobeleng Modimo jaaka Adame a ile a dira, ba tla latlhegelwa ke tshiamelo ya botshelo. Ke batho ba ba itshwaretsweng maleo a bone fela ba ba tla itumelelang botshelo jo bosakhutleng.—Bala Isaia 33:24; 35:3-6.

E le gore re itshwarelwe, re tshwanetse go tsaya kgato. Re tlhoka go itse Modimo ka go ithuta Lefoko la gagwe e leng Baebele. E re ruta gore re ka itumelela botshelo jo bo botoka jang gape le gore re ka bona kamogelo ya Modimo le botshelo jo bosakhutleng jang.—Bala Johane 17:3; Ditiro 3:19.