Fetela kwa tshedimosetsong

Fetela go diteng

A o Tla Ikanya Modimo?

A o Tla Ikanya Modimo?

AKANYA o na le tsala e o e ratang thata mme e dira sengwe se o sa se tlhaloganyeng. Batho ba bangwe ba mo tshwaya diphoso e bile ba belaela maitlhomo a gagwe, ba re o setlhogo. A o ka itlhaganelela go dumalana le bone kgotsa a o tla leta go utlwa gore tsala ya gago yone ya reng? Fa a ne a seyo go tlhalosa gore go diragetse eng, a o tla nna pelotelele mme o sa mo akanyetse bosula?

Pele ga o araba, gongwe o ka batla go itse mo go oketsegileng. O ka nna wa ipotsa gore, ‘Ke itse tsala eno sentle go le kana kang, mme ke eng se se dirang gore ke mo rate?’ Seo se a utlwala. Mme ela tlhoko: A re ka se dirise melaometheo e e tshwanang fa re botsa potso ya gore a Modimo o setlhogo?

O ka fitlhela go le thata go tlhaloganya dilo dingwe tse Modimo a di dirileng kgotsa o ka gakgamadiwa ke dilo tse a di letleletseng. Go na le batho ba le bantsi ba ba tla go bolelelang gore Modimo o setlhogo le ba ba tla go tlhotlheletsang gore o belaele maitlhomo a gagwe jaaka bone. A o tla leta go fitlhela o itse mo go oketsegileng? Karabo e ka ikaega ka gore o itse Modimo sentle go le kana kang. Ipotse, ‘Modimo o nnile tsala e ntseng jang mo go nna?’

Fa e le gore o ile wa nna le mathata mo botshelong, o ka nna wa raelesega go bolela gore Modimo ga a ise a ko a nne tsala ya gago. Mme a o ko o akanye go se kae. A Modimo ke ene a go baketseng mathata mo botshelong—kgotsa a o go tliseditse masego? Jaaka re bone, Satane ke “mmusi wa lefatshe leno,” e seng Jehofa. (Johane 12:31) Ka jalo, Satane ke ene a bakang bohutsana le tshiamololo mo lefatsheng leno. A ga se boammaaruri gore bosaitekanelang jwa rona le maemo a a sa lebelelwang ke one a bakang bontsi jwa mathata a rona?

A Modimo ke ene a go baketseng mathata mo botshelong—kgotsa o go tliseditse masego?

Ka fa letlhakoreng le lengwe, Modimo o dirile eng? Ela tlhoko gore Baebele ya re, Modimo ke “Modiri wa legodimo le lefatshe”; gore ditiro tsa gagwe di akaretsa mebele ya rona, e e ‘dirilweng ka tsela e e gakgamatsang’; le gore Jehofa ke “Modimo yo mohemo wa gago o leng mo seatleng sa gagwe.” (Pesalema 124:8; 139:14; Daniele 5:23) Seo sotlhe se kaya eng?

Seo se kaya gore mohemo wa rona o tswa go Mmopi wa rona e bile re gone ka ntlha ya gagwe. (Ditiro 17:28) Go raya gore mpho ya botshelo, dilo tse dintle tse di mo lefatsheng, go itumelela lorato le botsala, go ipelela tatso, go ama, medumo le monko—dilo tsotlhe tseno ke dimpho tse di tswang kwa Modimong. (Jakobe 1:17) A ga o dumalane gore masego ao a dira gore e nne Tsala e e tshwanelwang ke tlotlo le go ikanngwa?

Gone ke boammaaruri gore o ka fitlhela go le thata go ikanya Modimo. Gongwe o akanya gore ga o ise o mo itse sentle gore o ka mo ikanya. Mme seo se a utlwala. Mo ditlhogong tseno tse dikhutshwane, re ka se kgone go sekaseka mabaka otlhe a go bo batho bangwe ba akanya gore Modimo o setlhogo. Mme a go ka se nne molemo go itse Modimo botoka? * Re solofela gore fa o ntse o dira jalo, o tla itse boammaaruri ka Modimo. A o setlhogo? Le e seng: “Modimo ke lorato.”—1 Johane 4:8.

^ ser. 8 Ka sekai, bona tshedimosetso e e oketsegileng malebana le gore ke ka ntlha yang fa Modimo a letlelela boikepo mo go kgaolo 11 ya buka ya Totatota Baebele e Ruta Eng? e e gatisitsweng ke Basupi ba ga Jehofa.