Fetela kwa tshedimosetsong

Fetela go diteng

 Ithute mo Lefokong la Modimo

A o Ka Tshelela Ruri?

A o Ka Tshelela Ruri?

Setlhogo seno se botsa dipotso tse o ka tswang o kile wa di botsa se bo se bontsha gore o ka bona dikarabo tsa tsone kae mo Baebeleng ya gago. Basupi ba ga Jehofa ba ka itumelela go tlotla ka dikarabo tseno le wena.

1. Ke ka ntlha yang fa botshelo bo lebega bo le bokhutshwane?

Dikhudu dingwe di tshela dingwaga di le 150 mme ditlhare dingwe di tshela dingwaga di le 3 000. Fa o bapisa lobaka lo di tshelang ka lone le lo batho ba lo tshelang, batho ba tshela lobaka lo lokhutshwane. Le fa go ntse jalo, botshelo jwa rona bo ka nna le bokao jo bogolo go gaisa jwa khudu kgotsa jwa setlhare. Jehofa Modimo o bopile batho gore ba kgone go itumelela mmino, metshameko, go ja, go ithuta, go tsaya maeto le go kopana le batho. Modimo o tsentse keletso ya go tshelela ruri mo dipelong tsa rona.—Bala Moreri 3:11.

2. A tota re ka tshelela ruri?

Jehofa o tshelela ruri. Ga a swe. Ke Motswedi wa botshelo, ka jalo a ka kgona go dira gore batho ba bangwe ba tshelele ruri. (Pesalema 36:9; Habakuke 1:12) Mo godimo ga moo, o solofeditse gore o tla naya batho ba ba mo ikobelang botshelo jo bo sa khutleng. O tla fedisa botsofe.—Bala Jobe 33:24, 25; Isaia 25:8; 33:24.

Ditiro tse di maatla tse Jesu a neng a di dira di ne di bontsha gore re ka ikanya tsholofetso ya Modimo ya go tshelela ruri re na le botsogo jo bo itekanetseng. Jesu o ne a fodisa malwetse a le mantsi a bo a tsosa batho ba ba neng ba sule.—Bala Luke 7:11-15, 18, 19, 22.

 3. Tsholofetso ya go tshelela ruri e tla diragala leng?

Modimo o batla gore re tshelele ruri mo lefatsheng la paradaise e seng mo lefatsheng le le tletseng kgatelelo le thubakanyo. O batla gore re ikutlwe re sireletsegile. (Pesalema 37:9, 29; Isaia 65:21, 22) Fa lefatshe le ntse le tsosolosiwa go nna Paradaise, batho ba le dimilione ba ba suleng ba tla tshela gape. Batho ba ba tsositsweng ba ba tlhophang go obamela Modimo le go mo ikobela ba tla tshelela ruri.—Bala Luke 23:42, 43; Johane 5:28, 29.

4. Re ka bona jang botshelo jo bo sa khutleng?

Go itse Modimo ga se matsapa a bophiri

Modimo ke ene fela a ka re nayang botshelo jo bo sa khutleng. Ka jalo, re tla bo re dira sentle fa re atamalana le ene ka go mo itse. Baebele e tshwantsha go ithuta ka Modimo le go ja dijo. (Mathaio 4:4) Go ja dijo go monate mme go di bona le go di apaya go tlhoka maiteko. Ka tsela e e tshwanang, go ja dijo tsa semoya go tlhoka maiteko. Ga go sepe se se molemo go gaisa go atamalana le Modimo le go bona botshelo jo bo sa khutleng.—Bala Luke 13:23, 24; Johane 6:27; 17:3.