Fetela kwa tshedimosetsong

Fetela go diteng

E Bua ka Ditiragalo Tsa Mmatota e Seng Mainane

E Bua ka Ditiragalo Tsa Mmatota e Seng Mainane

 E Bua ka Ditiragalo Tsa Mmatota e Seng Mainane

“Ke latedisitse dilo tsotlhe ka tlhomamo go tswa kwa tshimologong.”—LUKE 1:3.

KAFA BAEBELE E FAROLOGANANG KA GONE: Ditlhamane le mainane di na le dipolelo tse di seng boammaaruri mme ga di bue sepe ka maina a mafelo, batho ba go buiwang ka bone le ka matlha a ditiragalo tseo di diregang ka one. Go farologana le tsone, Baebele e bega ka botlalo dintlha di le dintsi tsa ditiragalo tsa bogologolo tse di tlhomamisetsang babadi gore ‘dipolelwana tsa yone di boammaaruri ka tsela e e tlhomologileng.’—Pesalema 119:160, The Psalms for Today ka R. K. Harrison.

SEKAI: Pego ya Baebele ya re: “Nebukadenesare kgosi ya Babelona . . . a isa Jehoiakine [Kgosi ya Juda] botshwarwa kwa Babelona.” Mme morago ga foo, ‘Efile-merodake kgosi ya Babelona, mo ngwageng wa gagwe wa go nna kgosi, a tsholetsa tlhogo ya ga Jehoiakine kgosi ya Juda go tswa mo ntlong ya kgolegelo.’ Mo godimo moo, Jehoiakine “o ne a newa kabelo ka metlha e tswa kwa kgosing, letsatsi le letsatsi e le tshwanelo, malatsi otlhe a botshelo jwa gagwe.”—2 Dikgosi 24:11, 15; 25:27-30.

SE BAITHUTAMAROPE BA SE RIBOLOTSENG: Mo maropeng a Babelona wa bogologolo, baithutamarope ba ribolotse ditlankana tsa botsamaisi jwa puso tse di neng tsa kwalwa ka nako ya puso ya ga Nebukadenesare II. Ditlankana tseno di na le lenaane la dijo tse di neng di newa bagolegwa le batho ba bangwe ba ba neng ba tlhokometswe ke ntlo ya segosi. Gape mo go tsone go tlhagelela “Yaukin [Jehoiakine],” yo e neng e le “kgosi ya naga ya Yahud (Juda),” le ba lelapa la gagwe. Mme go tweng ka go nna gone ga Efile-merodake yo o neng a tlhatlhama Nebukadenesare? Mokwalo o o kwadilweng mo nkgwaneng e e bonweng gaufi le motse wa Susa o balega jaana: “Ntlo ya segosi ya ga Amil-Marduk [Efile-merodake], Kgosi ya Babelona, morwa Nebukadenesara, Kgosi ya Babelona.”

O AKANYANG? A go na le buka epe e nngwe ya bogologolo ya bodumedi e e buang dintlha tsa hisitori ka tsela e e maleba le ka nepo? Kgotsa a Baebele e tlhomologile?

[Mafoko a a mo go tsebe 5]

“Tshedimosetso ya Baebele ya tatelano ya ditiragalo le mafelo a di diragetseng kwa go one e boammaaruri e bile e ka ikanngwa go feta setlankana sepe fela sa bogologolo.”—A SCIENTIFIC INVESTIGATION OF THE OLD TESTAMENT, KA ROBERT D. WILSON

[Setshwantsho mo go tsebe 5]

Setlankana sa Babelona se se umakang Kgosi Jehoiakine wa Juda

[Motswedi wa Setshwantsho]

© bpk, Berlin/Vorderasiatisches Museum, SMB/Olaf M. Tessmer/Art Resource, NY