Fetela kwa tshedimosetsong

Fetela go diteng

O ka Tlhopha go Nna le Isagwe e e Atlegileng—Jang?

O ka Tlhopha go Nna le Isagwe e e Atlegileng—Jang?

 O ka Tlhopha go Nna le Isagwe e e Atlegileng—Jang?

O KA bona jang botshelo jo bo atlegileng tota? Tsela e nngwe ke ka go dirisa bokgoni jo bo tlhomologileng jo o nang le jone jwa go lemoga diphelelo tse di nnelang ruri tsa ditshwetso tse o di dirang gone jaanong.

Gone ke boammaaruri gore o ka tswa o fitlhela go le thata go dira ditshwetso tse di tla go solegelang molemo botshelo jwa gago jotlhe. Ka ntlha yang? Ka gonne batho ba bantsi ba re tshelang le bone ba batla dilo tse ba di eletsang ka ponyo ka leitlho. Ka sekai, o ka lemoga gore go dirisa kgakololo ya Baebele go ka go thusa gore o nne le kamano e e molemo le ba lelapa. (Baefeso 5:22–6:4) Mme gore go nne jalo, o tshwanelwa ke go dirisa nako e ntsi o na le ba lelapa o bo o tile kgatelelo ya go fetsa nako e ntsi kwa tirong, mo boitlosobodutung kgotsa mo boitapolosong. Fela jaaka o ka dira mo dikarolong tse dingwe tsa botshelo, o tshwanetse go tlhopha gore a o batla go kgotsofatsa dikeletso tsa gago tsa nakwana kgotsa o batla go atlega mo botshelong jotlhe jwa gago. O ka dira jang gore o nne le bokgoni jo o bo tlhokang gore o dire ditshwetso tse di siameng? Dira dilo tseno tse nnè tse di latelang.

1 Akanya ka Diphelelo Tsa Ditshwetso Tsa Gago

Fa o dira tshwetso akanya ka diphelelo tse tota di ka nnang teng. Baebele e gakolola jaana: “Yo o botlhale ke yo o boneng masetlapelo a bo a iphitlha.” (Diane 22:3) Fa o akanya ka ditlamorago tse tota di ka nnang teng, o tla tlhotlheletsega go tila dilo tse di ka go tsenyang mo kotsing. Ka fa letlhakoreng le lengwe, fa o akanya ka melemo e e nnelang ruri ya go dira ditshwetso tse di botlhale, o ka nonotsha boikemisetso jwa gago jwa go dira ditshwetso tse di botlhale.

Ipotse jaana: ‘Tshwetso e ke e dirang gone jaanong e tla nna le diphelelo dife mo lobakeng lwa ngwaga kgotsa tota le e leng dingwaga di le 10 kgotsa di le 20 tse di tlang? E tla ama jang maikutlo le botsogo jwa me? Tshwetso e ke e dirang e tla ama jang ba lelapa la gaetsho le batho ba bangwe ba ke ba ratang?’ Sa botlhokwa le go feta ipotse jaana: ‘A tshwetso e ke e dirang e tla itumedisa Modimo? E tla ama jang kamano ya me le ene?’ E re ka Baebele e tlhotlheleditswe ke Modimo, e ka go thusa go lemoga se se mo itumedisang le go go tlhagisa ka dirai tse o ka tswang o di tlodisa matlho.—Diane 14:12; 2 Timotheo 3:16.

2 Itlhophele ka Bowena

Go na le gore batho ba itirele ditshwetso ka bobone, ba le bantsi ba etsa se batho ba ba tshelang le bone ba se dirang. Mme go dira dilo ka tsela e e rileng fela ka go bo di dirwa ke batho ba le bantsi, go ka se ka ga dira gore o atlege. Itlhophele ka bowena. Ka sekai, akanya ka se se diragaletseng Natalie. * A re: “Ke ne ke batla go nna le lenyalo le le itumetseng. Mme ke ne ke lemoga gore ke ne nka se nne le lone ka ntlha ya tsela e ke neng ke tshela ka yone. Ditsala tsa me tsotlhe tsa kwa kholetšheng e ne e le basha ba ba botlhale thata. Le fa go ntse jalo, ba ne ba nna ba dira ditshwetso tse di sa siamang mo botshelong jwa bone. Ba ne ba nnela go nna le makgarebe kgotsa makau ba bo ba a tlogela ba batla a mangwe. Fela jaaka bone, ke ne ka nna le makau a le mmalwa. Go tshela ka tsela eno go ne ga nkhutsafatsa fela thata.”

Natalie o ne a simolola go ithuta Baebele le Basupi ba ga Jehofa. A re: “Mo Basuping, ke ne ka bona basha ba ba itumetseng le banyalani ba ba itumetseng. Le fa go ne go se motlhofo, ka bonya ka bonya ke ne ka tlogela mekgwa ya me e e sa siamang le tsela e ke neng ke tshela ka yone.” Seo se ne sa felela ka  eng? Natalie a re: “Ke ne ke batla go nyalwa ke motho yo ke mo ratang tota. Fa nako e ntse e tsamaya, ke ne ka nyalwa ke monna yo o mo bodumeding jo ke leng mo go jone. Ke akanya gore Modimo o nneile botshelo jwa lelapa jo bo botoka go feta jo ke neng ke bo batla.”

3 Leba ka Kwa ga Ditshwetso Tse o di Dirang

Gore o se ka wa akanya ka se o se batlang gone jaanong fela, o tshwanetse go itse le gore tota o batla gore isagwe ya gago e nne jang o bo o batla ditsela tsa go e fitlhelela. (Diane 21:5) O se ka wa akanya fela ka dingwaga di le 70 kgotsa 80 tse motho a di tshelang. Go na le moo, akanya ka isagwe ya fa o tla bo o itumelela botshelo jo bo sa khutleng jo Baebele e buang ka jone.

Baebele ya re ka ntlha ya setlhabelo sa thekololo sa ga Keresete Jesu, Modimo o ne a dira gore batho ba kgone go bona botshelo jo bo sa khutleng. (Mathaio 20:28; Baroma 6:23) Modimo o solofetsa gore mo bogautshwaneng boikaelelo jwa gagwe jwa kwa tshimologong ka batho le lefatshe bo tla diragadiwa. Batho ba ba ratang Modimo ba tla itumelela botshelo ka bo sa khutleng mo lefatsheng le lentle le le tsosolositsweng. (Pesalema 37:11; Tshenolo 21:3-5) O ka nna le isagwe e e ntseng jalo fa o leba ka kwa ga ditshwetso tse o di dirang.

4 Dira ka Natla Gore o Fitlhelele Mekgele ya Gago

O ka dira eng gore o nne le isagwe eo e e solofeditsweng? Simolola ka go nna le kitso ka Modimo. (Johane 17:3) Kitso e e boammaaruri ya Baebele e tla dira gore o tshepe gore ditsholofetso tsa Modimo ka isagwe di tla diragadiwa. Go nna le tsholofelo e e ntseng jalo go tla go nonotsha gore o dire diphetogo dipe fela tse o ka tlhokang go di dira gore Modimo a go amogele.

Akanya ka se se neng sa diragalela Michael. A re: “Ke ne ka simolola go dirisa diokobatsi le go nwa bojalwa bobe fa ke ne ke le dingwaga di le 12. Ke ne ke le leloko la segopa mme go ne go lebega ke tla swa pele ke nna dingwaga di le 30. Tsela e ke neng ke galefa ka yone le e ke neng ke betwa ke pelo ka yone e ne ya dira gore ke leke go ipolaya ka makgetlho a le mantsi. Ke ne ke akanya gore go na le sengwe sa botlhokwa mo botshelong mme ke ne ke sa kgone go se bona.” Fa Michael a ne a le kwa sekolong se segolwane, leloko lengwe la segopa sa bone le ne la simolola go ithuta Baebele le Basupi ba ga Jehofa. Michael le ene o ne a dumela go ithuta.

Se Michael a neng a se ithuta mo Baebeleng se ne sa fetola tsela e a neng a leba isagwe ya gagwe ka yone. “Ke ne ka ithuta gore mo isagweng lefatshe le tla fetolwa go nna paradaise le gore batho ba tla tshela ka kagiso ba sa tlhobaele ka sepe. Ke ne ka simolola go leba seno e le isagwe ya me. Ke ne ka itlhomela mokgele wa go nna le kamano e e molemo le Jehofa. Le fa go ntse jalo, ke ne ke sa itumedise Jehofa ka metlha. Tota le fa ke sena go simolola go ithuta Baebele ke ne ka tagwa ka makgetlho a le mmalwa. E bile ke ne ka tlhakanela dikobo le mosetsana mongwe.”

Michael o thusitswe ke eng go tlogela go nna a boela kwa mekgweng ya gagwe e e sa siamang le gore a atlege go fetola tsela e a neng a tshela ka yone? A re: “Motho yo o neng a nthuta Baebele o ne a nkgothaletsa gore ke bale Baebele letsatsi le letsatsi le gore ke itsalanye le batho ba ba batlang go itumedisa Modimo. Ke ne ka lemoga gore maloko a segopa sa rona a ne a sa ntse a ntlhotlheletsa ka tsela e e sa siamang. Le fa ke ne ke atamalane thata le bone, ke ne ka kgaotsa go itsalanya le bone.”

Michael o ne a itlhomela mekgele ya nakwana le dilo tse di tshwanetseng go tla pele mo botshelong tse di neng tsa mo thusa go fitlhelela mokgele wa gagwe o mogolo wa go dumalanya botshelo jwa gagwe le melao ya Modimo. Le wena o ka dira se se tshwanang. Kwala mekgele e e nnelang ruri le dikgato tse o tla di tsayang tse di tla go thusang go e fitlhelela. Itsise batho ba ba ka go emang nokeng ka mekgele ya gago, mme o ba kope gore ba nne ba go botsa ka kgatelopele e o e dirang.

O se ka wa nna o busetsa morago go ithuta ka Modimo le go dirisa kaelo ya gagwe mo botshelong jwa gago. Gone jaanong dira dilo tse di tla dirang gore o rate Modimo le Lefoko la gagwe, Baebele. Fa Lefoko la Modimo le bua ka motho yo o dirisang melaometheo ya Baebele, la re: “Sengwe le sengwe se a se dirang se tla atlega.”—Pesalema 1:1-3.

[Ntlha e e kwa tlase]

^ ser. 8 Maina a a mo setlhogong seno a fetotswe.