Fetela kwa tshedimosetsong

Fetela go diteng

Polelelopele 6. Tiro ya go Rera mo Lefatsheng Lotlhe

Polelelopele 6. Tiro ya go Rera mo Lefatsheng Lotlhe

 Polelelopele 6. Tiro ya go Rera mo Lefatsheng Lotlhe

“Dikgang tse di molemo tseno tsa bogosi di tla rerwa mo lefatsheng lotlhe le le nang le banni.”—MATHAIO 24:14.

● Vaiatea o nna kwa go sengwe sa Ditlhaketlhake tsa Tuamotu se se kwa thoko mo Lewatleng la Pacific. Le fa Tuamotu e na le ditlhaketlhake di ka nna 80 tse di anameng mo lefelong la bogolo jo bo fetang disekwerekilometara di le 802 900, e na le banni ba ka nna 16 000 fela. Le fa go ntse jalo, Basupi ba ga Jehofa ba ile ba etela Vaiatea le banni ba bangwe ba koo. Ka ntlha yang? Ka gonne Basupi ba batla go bolelela batho botlhe dikgang tse di molemo tsa Bogosi jwa Modimo—go sa kgathalesege gore ba nna kae.

DITIRAGALO DI BONTSHA ENG? Molaetsa wa Bogosi o fitlha kwa dintlheng tsotlhe tsa lefatshe. Ka 2010 fela, Basupi ba ga Jehofa ba ne ba dirisa diura di feta dibilione di le 1,6 ba bolela dikgang tse di molemo mo dinageng di le 236. Seo se kaya gore ka kakaretso Mosupi mongwe le mongwe o ne a dira tiro ya go rera metsotso e le 30 letsatsi le letsatsi. Mo dingwageng tse di lesome tse di fetileng, ba gatisitse ba bo ba anamisa dikgatiso tsa go ithuta Baebele di feta dibilione di le 20.

GANTSI BATHO BA GANETSA BA RENG? Molaetsa wa Baebele e sale o ntse o rerwa ka diketekete tsa dingwaga.

A GO A UTLWALA GO BO BA GANETSA JALO? Ke boammaaruri gore batho ba le bantsi ba kile ba rera sengwe ka molaetsa wa Baebele. Le fa go ntse jalo, bontsi jwa bone ba ne ba rera ka nako e khutshwane fela le mo lefelong le lennye. Mme Basupi ba ga Jehofa bone ba dira tiro ya go rera e e rulagantsweng sentle mo lefatsheng lotlhe mme e fitlhelela batho ba le dimilione di le makgolokgolo. Basupi ba ile ba tswelela ka tiro ya bone ya go rera le fa ba ne ba ganediwa mo go botlhoko ke mekgatlho mengwe e e nang le thata e bile e le setlhogo go gaisa yotlhe mo hisitoring ya batho. * (Mareko 13:13) Mo godimo ga moo, Basupi ba ga Jehofa ga ba duelelwe go rera. Go na le moo, ba dirisa nako ya bone, mme ba tsamaisa dikgatiso tsa bone ba sa duedise batho. Tiro ya bone e tshegediwa fela ka meneelo e e ntshiwang ka go rata.

O AKANYANG? A ‘dikgang tse di molemo tsa bogosi’ di rerwa mo lefatsheng lotlhe? A go diragadiwa ga polelelopele eno go ka tswa go bontsha gore go ise go ye kae go tla tloga go direga dilo tse di molemo?

[Ntlha e e kwa tlase]

^ ser. 6 Fa o batla tshedimosetso e e oketsegileng, bona dibidio tse tharo tsa “Faithful Under Trials,” “Purple Triangles” le “Jehovah’s Witnesses Stand Firm Against Nazi Assault,” tse di anamisiwang ke Basupi ba ga Jehofa.

[Mafoko a a mo go tsebe 9]

“Fa fela Jehofa a sa ntse a letla, re tla tswelela re rera dikgang tse di molemo tsa Bogosi ka tlhoafalo, re dirisa tsela nngwe le nngwe e re ka e kgonang go buisana le batho.”—2010 YEARBOOK OF JEHOVAH’S WITNESSES.