Fetela kwa tshedimosetsong

Fetela go diteng

A Batho Botlhe ba ba Siameng Ba ya Kwa Legodimong?

A Batho Botlhe ba ba Siameng Ba ya Kwa Legodimong?

 A Batho Botlhe ba ba Siameng Ba ya Kwa Legodimong?

FA Jesu a sena go ja dijo tsa bofelo le baaposetoloi ba gagwe pele a bolawa, o ne a ba solofetsa gore o tla ba naya lefelo kwa legodimong. O ne a re: “Mo ntlong ya ga Rre go na le manno a le mantsi. Go seng jalo, ke ka bo ke lo boleletse, ka gonne ke a tsamaya go ya go lo baakanyetsa lefelo.” (Johane 14:2) Ke eng fa Jesu a ne a tla ba naya lefelo kwa legodimong? Ba tla dirang koo?

Jesu o ne a akantse ka tiro e e kgethegileng e barutwa ba gagwe ba neng ba tla e dira. Mo go jone bosigo joo, o ne a re: “Ke lona ba lo ileng lwa ngaparagana le nna mo ditekong tsa me; mme ke dira kgolagano le lona, fela jaaka Rre a dirile kgolagano le nna, ya bogosi.” (Luke 22:28, 29) Modimo o ne a solofeditse Jesu gore o tla nna Kgosi e e neng e tla naya batho sengwe sa dilo tse ba di tlhokang thata—puso e e molemo. Jesu o tla golola batho mo pogong mme o tla fedisa ba ba ba tsietsang. Le fa batho ba Jesu a tla ba busang ba tla bo ba nna “go ya kwa mafelelong a lefatshe,” setulo sa gagwe sa Bogosi se tla bo se le kwa legodimong.—Pesalema 72:4, 8; Daniele 7:13, 14.

Le fa go ntse jalo, Jesu ga a kitla a busa a le nosi. Ke ka lebaka leo a ileng a solofetsa baaposetoloi ba gagwe lefelo kwa legodimong. E ne e le bone ba ntlha go tlhophiwa go “busa lefatshe e le dikgosi.”—Tshenolo 5:10.

Ke batho ba le kae ba ba yang kwa legodimong? Fela jaaka mo pusong, babusi mo Bogosing jwa Modimo jo bo kwa legodimong ba mmalwa fa ba bapisiwa le batho ba ba busiwang ke jone. Jesu o ne a bolelela batho ba ba tla busang le ene jaana: “Se boifeng, letsomanyane, ka gonne Rraalona o amogetse go lo naya bogosi.” (Luke 12:32) Kgabagare palo ya “letsomanyane” leo e tla nna 144 000. (Tshenolo 14:1) Palo eo e nnye thata fa e bapisiwa le dimilionemilione tsa batho ba ba tla itumelelang go tshela ka bosakhutleng mo lefatsheng e le babusiwa ba ba ikanyegang ba Bogosi.—Tshenolo 21:4.

Ka jalo, ga se batho botlhe ba ba siameng ba ba yang kwa legodimong. Moaposetoloi Petere o ne a bua jaana ka Kgosi e e molemo Dafide: “Dafide o ne a se ka a tlhatlogela kwa magodimong.” (Ditiro 2:34) Johane Mokolobetsi e ne e le motho yo o siameng. Le fa go ntse jalo, Jesu o ne a re ga a kitla a ya go busa e le kgosi kwa legodimong. Jesu o ne a re: “Mo go ba ba tsetsweng ke basadi ga go ise go tsosiwe yo mogolo go feta Johane Mokolobetsi; mme motho yo mmotlanyana mo bogosing jwa magodimo o mogolo go mo feta.”—Mathaio 11:11.

A o Tla Amogela Mpho ya Batho ba ba Siameng?

Motho o tshwanetse go dirang gore a amogele mpho ya go tshelela ruri mo lefatsheng? Jesu o ne a re: “Modimo o ratile lefatshe mo go kalo mo a bileng a ntsha Morwawe yo o tsetsweng a le esi, gore mongwe le mongwe yo o dumelang mo go ene a se ka a senngwa mme a nne le botshelo jo bo sa khutleng.” (Johane 3:16) Ela tlhoko gore tsela e Modimo a ratang batho ka yone e mo tlhotlheletsa gore a ba neye botshelo jo bo sa khutleng, mme bo bonwa fela ke ba ba “dumelang” mo go ene.

Tumelo e tshwanetse go ikaega ka kitso ya boammaaruri. (Johane 17:3) O ka bontsha gore o motho yo o siameng ka go ithuta go le gontsi ka boikaelelo jwa ga Jehofa ka batho. Dira gore tumelo e go tlhotlheletse go tsaya kgato. Mme tlhomamisega gore o bulegetswe ke tshono ya go bona botshelo jo bo sa khutleng.

 [Lebokoso mo go tsebe 7]

Baebele ya Reng?

Potso:

Go diragalang ka batho ba ba siameng fa ba swa?

Karabo:

“Fa e le baswi bone, ga ba itse sepe gotlhelele.” MORERI 9:5.

Potso:

Batho ba ba siameng ba na le tsholofelo efe ka isagwe?

Karabo:

“Nako e etla e mo go yone botlhe ba ba mo mabitleng a kgakologelo ba tla utlwang lentswe la gagwe [Jesu] ka yone mme ba tla tswa.”JOHANE 5:28, 29.

Potso:

Bontsi jwa batho ba ba siameng bo tla tshela kae?

Karabo:

“Basiami ba tla rua lefatshe, mme ba tla aga mo go lone ka bosakhutleng.”PESALEMA 37:29.