Fetela kwa tshedimosetsong

Fetela go diteng

A Diabolo ke Motho wa Mmatota?

A Diabolo ke Motho wa Mmatota?

 Babadi ba a Botsa

A Diabolo ke Motho wa Mmatota?

Ee, Baebele e ruta gore Satane Diabolo ke motho wa mmatota. Le fa go ntse jalo, batshwayadiphoso ba Baebele ba ganetsa kgang ya gore Diabolo ke motho wa mmatota. Ba re Satane ke maikutlo fela a a bosula a a mo teng ga batho.

A re tshwanetse go gakgamadiwa ke go bo batho ba sa tlhaloganye gore tota Satane ke mang? Nnyaa le e seng. Ka sekai: Sekebekwa se ka phimola dikgatiso tsa sone tsa menwana mo lefelong le se sentseng mo go lone gore se timetse motlhala wa sone le gore se tswelele pele se senya se sa tshwarwe. Ka tsela e e tshwanang, Satane ke sekebekwa, rramatlhajana yo o itumelelang go senya boitshwaro jwa batho a sa lemogiwe. Jesu o ne a tlhalosa gore Satane ke ene a bakang boikepo jo bo mo lefatsheng. Jesu o ne a re Satane ke “mmusi wa lefatshe leno.”—Johane 12:31.

Diabolo o tswa kae? Kwa tshimologong o ile a bopiwa e le sebopiwa se se itekanetseng sa semoya kwa legodimong, moengele yono wa motsuolodi o ne a itira Diabolo ka go eletsa thata gore batho ba obamele ene go na le Modimo. Baebele e na le pego ya puisano fa gare ga ga Satane le Jesu e mo go yone Diabolo a senolang keletso ya gagwe ya bopelotshetlha. Satane o ne a leka go dira gore Jesu a ‘wele fa fatshe mme a mo obamele.’—Mathaio 4:8, 9.

Ka tsela e e tshwanang, Satane o ne a senola maitlhomo a gagwe fa a ne a buisana le Modimo jaaka go begilwe mo bukeng ya Jobe. A ka dira sotlhe se a se kgonang go tlhotlheletsa batho gore ba itatole Modimo.—Jobe 1:13-19; 2:7, 8.

Akanya ka seno: Fa Satane a ile a kgona go bua le Jehofa Modimo le Jesu Keresete, a go ka kgonega gore Satane e bo e le maikutlo fela a a bosula a a nnang mo teng ga batho? Ga go na boikepo bope mo Modimong kgotsa mo go Morwawe! Go bonala sentle gore Satane ke motho wa mmatota—sebopiwa sa moya se se boikepo se se sa tlotleng Jehofa kgotsa Jesu.

Dilo tse di sa siamang tse batho ba di dirang di bontsha gore Diabolo o teng le gore ke motho wa mmatota. Mebuso ya lefatshe leno e tlogela dijo tse dintsi di senyega fa batho ba ba ba busang bone ba bolawa ke tlala. Ditšhaba di boloka dibetsa tse di ka bolayang batho ba le bantsi. Di kgotlela lefatshe. Le fa go ntse jalo, batho ga ba itse gore ke eng se se bakang letlhoo le le kana kana le mekgwa eno e e bakang tshenyo. Ke ka ntlha yang fa go le jalo?

Baebele e senola gore Satane ‘o foufaditse megopolo ya ba ba sa dumeleng.’ (2 Bakorintha 4:4) Satane o tsietsa batho ka go dirisa mokgatlho o o sa bonaleng. Ke “mmusi wa madimona.” (Mathaio 12:24) Fela jaaka moeteledipele wa dikebekwa a ka dirisa setlhopha sa dikebekwa a sa ikitsise mo go tsone tsotlhe, Satane le ene o dirisa mokgatlho wa gagwe o o sa bonaleng wa baengele ba ba boikepo gore a laole ditlhopha tsa batho ba ba sa lemogeng gore ba tlhotlhelediwa ke ene.

A bo re leboga jang ne gore Baebele e senola Diabolo le mokgatlho wa gagwe! Ka jalo go na le dilo tse re ka di dirang gore re se ka ra tlhotlhelediwa ke Diabolo. Baebele e re gakolola jaana: “Ipeyeng mo taolong ya Modimo; ganetsang Diabolo, mme o tla lo tshaba.”—Jakobe 4:7.