Fetela kwa tshedimosetsong

Fetela go diteng

A Modimo o Amogela Madumedi Otlhe?

A Modimo o Amogela Madumedi Otlhe?

 A Modimo o Amogela Madumedi Otlhe?

Dikarabo tse di tlwaelegileng:

“Madumedi otlhe ke ditsela tse di yang kwa Modimong.”

“Ga go re sepe gore o dumela eng fa fela o ikanyega.”

Jesu o ne a reng?

“Tsenang ka kgoro e tshesane; ka gonne tsela e e isang tshenyegong e atlhame e bile e bulegile, mme ba ba tsenang ka yone ba bantsi; fa kgoro e e isang botshelong yone e le tshesane le tsela e pitlagane, mme ba ba e bonang ba le mmalwa.” (Mathaio 7:13, 14) Jesu o ne a sa dumele gore madumedi otlhe ke ditsela tse di yang kwa Modimong.

“Ba le bantsi ba tla nthaya mo letsatsing leo ba re, ‘Morena, Morena, a re ne ra se ka ra porofeta ka leina la gago, ra ba ra leleka madimona ka leina la gago, ra ba ra dira ditiro di le dintsi tse di maatla ka leina la gago?’ Mme le fa go ntse jalo foo ke tla ba bolelela ke re: Ga ke ise nke ke lo itse! Tlogang fa go nna, lona ba lo dirang ka go tlhoka molao.” (Mathaio 7:22, 23) Jesu ga a amogele batho botlhe ba ba reng ba a mo latela.

BATHO ba le bantsi ba bodumedi ba ngaparetse ditumelo le meetlo ya bone. Mme go tweng fa dithuto tseno di sa dumalane le se se fitlhelwang mo Lefokong la Modimo e leng Baebele? Jesu o ne a bontsha kotsi ya go latela dingwao tsa batho fa a ne a bolelela baeteledipele ba bodumedi ba motlha wa gagwe a re: “Lo dirile lefoko la Modimo lefela ka ntlha ya ngwao ya lona.” Mme o ne a tswelela go nopola mafoko ano a Modimo: “Batho bano ba ntlotla ka dipounama tsa bone, le fa go ntse jalo pelo ya bone e katogetse kgakala le nna. Ba nna ba nkobamelela lefela, ka gonne ba ruta ditaelo tsa batho ba re ke dithuto tsa motheo.”—Mathaio 15:1-9; Isaia 29:13.

Ga se dilo tse re di dumelang fela tse di leng botlhokwa mme le boitsholo jwa rona le jone bo botlhokwa. Baebele e bua jaana ka batho ba ba iphakang gore ba obamela Modimo: “Ba bolela phatlalatsa gore ba itse Modimo, mme ba mo itatola ka ditiro tsa bone.” (Tito 1:16) Tota e bile, Baebele e bua jaana ka batho ba ba tshelang mo motlheng wa rona: “Ba tla rata menate go na le go rata Modimo. Tota le fa ba ka nna le sesupo sa gore ke badumedi, bodumedi jwa bone e ka se nne jwa mmatota. O se ka wa itsalanya le batho ba ba ntseng jalo.”—2 Timotheo 3:4, 5, Contemporary English Version.

Go na le mo gontsi mo go tlhokegang go na le go ikanyega fela. Ka ntlha yang? Ka gonne motho a ka ikanyega ka tsela e e sa siamang. Ka jalo go nna le kitso ya boammaaruri ka Modimo go botlhokwa. (Baroma 10:2, 3) Go nna le kitso eno le go dira tumalanong le se Baebele e se buang go tla dira gore re itumedise Modimo. (Mathaio 7:21) Ka jalo, bodumedi jo bo siameng bo akaretsa boikutlo jo bo siameng, tumelo ya boammaaruri le ditiro tse di siameng. Mme ditiro tse di siameng di kaya go dira thato ya Modimo letsatsi le letsatsi!—1 Johane 2:17.

Fa o rata go itse mo go oketsegileng ka se Baebele e se buang ka Modimo, ikgolaganye le Basupi ba ga Jehofa malebana le thuto ya legae ya Baebele ya mahala.

[Mafoko a a mo go tsebe 9]

Bodumedi jo bo siameng bo akaretsa boikutlo jo bo siameng, tumelo ya boammaaruri le ditiro tse di siameng