Fetela kwa tshedimosetsong

Fetela go diteng

“Modimo wa Kgomotso Yotlhe”

“Modimo wa Kgomotso Yotlhe”

 Atamalana le Modimo

“Modimo wa Kgomotso Yotlhe”

2 Bakorintha 1:3, 4

DILO tse dintsi tse di re diragalelang mo botshelong—go boga, go swabisiwa, go jewa ke bodutu—di ka dira gore re utlwe botlhoko re bo re tlalelwe. Mo dinakong tseo, o ka nna wa ipotsa gore, ‘Tota nka bona kae thuso?’ Mafoko a ga moaposetoloi Paulo a a mo go 2 Bakorintha 1:3, 4 a bontsha gore go na le motswedi mongwe o o nnetseng ruri wa kgomotso—Jehofa Modimo.

Mo temaneng ya 3, Modimo o bidiwa “Rara wa mautlwelobotlhoko a manana.” Seo se kaya eng? Lefoko la Segerika le le ranolwang e le “mautlwelobotlhoko a manana” le ka kaya go utlwisiwa botlhoko ke go bona ba bangwe ba boga. * Buka nngwe e e tlhalosang mafoko a Baebele ya re lefoko leno le ka ranolwa ka gore, “go tlhomoga pelo” kgotsa “go amega thata ka ba bangwe.” “Mautlwelobotlhoko a manana” a Modimo a mo tlhotlheletsa go dira sengwe. Eleruri go itse karolo eno ya botho jwa Modimo go dira gore re batle go atamalana le ene.

Gape Paulo a re Jehofa ke “Modimo wa kgomotso yotlhe.” Mono Paulo o dirisa lefoko le go tweng le akaretsa “kgopolo ya go gomotsa mongwe yo o mo mathateng kgotsa yo o mo khutsafalong le ya go thusa mongwe ka sengwe kgotsa go mo kgothatsa.” The Interpreter’s Bible e tlhalosa jaana: “Re gomotsa motho yo o bogang fa re mo thusa gore a nne le bopelokgale jwa go itshokela botlhoko jo a leng mo go jone.”

O ka nna wa botsa jaana, ‘Modimo o re gomotsa jang le go re naya bopelokgale jwa go itshokela kutlobotlhoko?’ O dira seo segolobogolo ka Lefoko la gagwe Baebele, le ka mpho e a re neileng yone ya thapelo. Paulo o re bolelela gore Modimo o re naya Lefoko la Gagwe ka lorato gore “ka kgomotso ya Dikwalo re nne le tsholofelo.” Mo godimo ga moo, fa re rapela ka tlhoafalo re tla nna le “kagiso ya Modimo e e gaisang kakanyo yotlhe.”—Baroma 15:4; Bafilipi 4:7.

Jehofa o gomotsa batho ba gagwe go le kana kang? Paulo a re Modimo ‘o re gomotsa mo pitlaganong yotlhe ya rona.’ (2 Bakorintha 1:4) Go sa kgathalesege kgatelelo, tlalelo kgotsa pogo e re ka lebanang le yone, Modimo a ka re naya bopelokgale jo re bo tlhokang le nonofo ya go itshoka. Ruri seo se a kgothatsa.

Kgomotso e Modimo a e nayang ga e felele fela mo mothong yo o e amogelang. Paulo o tswelela ka gore Modimo o re gomotsa gore “re kgone go gomotsa ba ba leng mo mofuteng ofe fela wa pitlagano ka kgomotso e rona ka borona re gomodiwang ka yone ke Modimo.” Fa re setse re gomoditswe mo pitlaganong ya rona, re thusiwa gore le rona re utlwele ba bangwe botlhoko mme re tlhotlheletsege go thusa ba ba tlhokang thuso.

Le fa Jehofa e le “Modimo wa kgomotso yotlhe,” seo ga se reye gore o dira gore mathata a rona kana kutlobotlhoko e re leng mo go yone e nyelele. Le fa go ntse jalo, re ka tlhomamisega gore fa re ikaega ka ene gore a re gomotse, a ka re nonotsha gore re kgone go itshokela kutlobotlhoko kana bothata le fa e ka nna bofe jo re ka lebanang le jone mo botshelong. Eleruri Modimo yo o pelotlhomogi jalo o tlhoka gore re mo obamele re bo re mmake.

[Ntlha e e kwa tlase]

^ ser. 2 Modimo o bidiwa “Rara [kgotsa motswedi] wa mautlwelobotlhoko a manana” ka gonne kutlwelobotlhoko e simologa mo go ene mme ke botho jwa gagwe.