Fetela kwa tshedimosetsong

Fetela go diteng

Pokano E e Sa Lebalesegeng

Pokano E e Sa Lebalesegeng

 Pokano E e Sa Lebalesegeng

“FA POKANO eno e fela, lo tla re, ‘Ruri eno e ne e le pokano ya ngwaga le ngwaga e e sa lebalesegeng mo hisitoring ya phuthego ya Modimo!’” Ka mafoko ao, Stephen Lett wa Setlhopha se se Laolang sa Basupi ba ga Jehofa o ne a oketsa boikutlo jwa go swegaswega pelo jo bareetsi ba bantsi ba neng ba na le jone. Ba ne ba tlile pokanong ya ngwaga le ngwaga ya bo126 ya Watch Tower Bible and Tract Society of Pennsylvania, e e neng e tshwerwe ka October 2, 2010, kwa Holong ya Dikopano ya Basupi ba ga Jehofa kwa Jersey City kwa New Jersey, U.S.A. Dingwe tsa dintlhakgolo tsa pokano eno e e sa lebalesegeng e ne e le dife?

Mokaulengwe Lett o ne a neela ka matlhagatlhaga puo e e bulang e e neng e bua ka koloi ya ga Jehofa ya selegodimo e e tlhalosiwang mo bukeng ya Baebele ya Esekiele. Koloi eno e kgolo e e galalelang e tshwantshetsa phuthego ya Modimo, e Jehofa a e laolang ka botlalo. Mokaulengwe Lett o ne a re, karolo ya phuthego ya kwa legodimong e e nang le dibopiwa tsa semoya e tsamaya ka lobelo lwa legadima—lobelo lwa dikakanyo tsa ga Jehofa. Karolo ya mo lefatsheng ya phuthego ya Jehofa Modimo le yone e tsamaya fela jalo. Mokaulengwe Lett o ne a umaka diphetogo di le mmalwa tse di itumedisang tse di nnileng gone mo karolong e e bonalang ya phuthego ya Modimo mo dingwageng tsa bosheng.

Ka sekai, makala a le mantsi a a kopanngwa, mme seno se tla dira gore bontsi jwa bakaulengwe ba ba neng ba direla kwa magaeng a Bethele mo dinageng tseo ba kgone go tlhoma mogopolo mo tirong ya go rera. Mokaulengwe Lett o ne a kgothaletsa bareetsi gore ba nne ba rapelele Setlhopha se se Laolang, se e leng moemedi wa setlhopha sa motlhanka gore se tswelele se ikanyega e bile se le botlhale.—Math. 24:45-47.

Dipego Tse di Kgothatsang le Dipotsolotso Tse di Itumedisang

Tab Honsberger, yo o direlang mo Komiting ya Lekala kwa Haiti, o ne a neela pego e e amang maikutlo ka ditlamorago tsa thoromo ya lefatshe e e diragetseng ka January 12, 2010, e e bolaileng batho ba ka nna 300 000 mo nageng eo. O ne a umaka gore baruti ba ne ba bolelela batho gore Modimo o otlhaile batho bao ka ntlha ya go tlhoka tumelo mme o sireletsa ba ba siameng. Le fa go ntse jalo, diketekete tsa dikebekwa tse di atlhotsweng di ne tsa gololesega fa dipota tsa kgolegelo di ne di phutlhama ka nako ya thoromo. Ka jalo, bontsi jwa batho ba kwa Haiti ba ba dipelo di ikanyegang ba gomodiwa ke go ithuta boammaaruri jwa gore ke ka ntlha yang fa metlha ya rona e aparetswe ke mathata jaana. Mokaulengwe Honsberger o ne a nopola mokaulengwe mongwe wa kwa Haiti yo o swetsweng ke mosadi mo masetlapelong ao yo a neng a re: “Ke sa ntse ke lela le gompieno. Ga ke itse gore ke tla tswelela ke hutsafetse go fitlha leng, mme gone ke itumelela lorato lo phuthego ya ga Jehofa e mpontshitseng lone. Ke na le tsholofelo mme ke ikemiseditse go bolelela ba bangwe ka yone.”

 Mark Sanderson yo jaanong e leng leloko la lelapa la Bethele ya kwa Brooklyn, o ne a neela pego ka Philippines. E re ka e ne e le leloko la Komiti ya Lekala la koo, o ne a itumetse fa a bolela ka ditlhora tse 32 tse di latelanang tse naga eo e nnileng le tsone tsa palo ya baboledi ba Bogosi le kafa palo ya dithuto tsa Baebele e fetang thata palo ya baboledi ka teng. O ne a bua ka mokaulengwe yo o bidiwang Miguel yo morwa wa morwawe a neng a bolawa. Miguel o ne a dira ka natla gore mmolai yoo a atlholwe mme a tsenngwe mo kgolegelong. Moragonyana, fa Miguel a ne a rera mo kgolegelong o ne a kopana le mmolai yoo. Le fa Miguel a ne a sa iketla mo maikutlong, o ne a bua le ene ka bonolo le ka bopelonomi. Kgabagare o ne a ithuta le monna yoo, yo o neng a gatela pele a bo a simolola go rata Jehofa. Gone jaanong o kolobeditswe. Miguel ke tsala ya gagwe e kgolo mme o leka go thusa mokaulengwe yono wa gagwe yo mosha gore a gololwe ka bonako kwa kgolegelong. *

Mo thulaganyong eo go ne ga latela puisano e e neng e dirwa ke Mark Noumair, yo e leng mokaedi kwa Lephateng la Dikolo Tsa Puso ya Modimo. O ne a botsolotsa banyalani ba le bararo e bong Alex le Sarah Reinmueller, David le Krista Schafer le Robert le Ketra Ciranko. Alex Reinmueller yo o thusang mo Komiting ya Kgatiso, o ne a bolela kafa a neng a dira boammaaruri gore e nne jwa gagwe ka teng fa e ne e le mmulatsela kwa Canada a le dingwaga di le 15 fela, gantsi a rera a le esi. Fa Mokaulengwe Reinmueller a ne a bodiwa gore ke mang yo o neng a mo tlhotlheletsa thata kwa Bethele, o ne a umaka banna ba le bararo ba ba ikanyegang a bontsha kafa mongwe le mongwe wa bone a ileng a mo thusa go gola semoyeng ka gone. Mosadi wa gagwe e bong Sarah, o ne a bolela ka botsala jwa gagwe le kgaitsadi mongwe yo o neng a itshoka ka masomesome a dingwaga a le kwa dikgolegelong tsa kwa China ka ntlha ya tumelo ya gagwe. Sarah o ne a re o ithutile go ikaega ka Jehofa ka thapelo.

David Schafer yo o thusang Komiti e e Rutang o ne a akgola mmaagwe ka ntlha ya tumelo ya gagwe e e nonofileng a bo a bolela ka bakaulengwe ba ba neng ba dira tiro ya go rema ditlhare mme ba mo thusa gore e nne mmulatsela yo o thusang fa a ne a sa ntse a le mosha. Mosadi wa gagwe e bong Krista, o ne a bua ka boitumelo kafa a ileng a tlhotlhelediwa ka gone ke maloko a a godileng a lelapa la Bethele a a neng a “ikanyega mo go se sebotlana,” fela jaaka Jesu a ne a laetse.—Luke 16:10.

Robert Ciranko, yo o thusang Komiti ya Bakwadi o ne a bolela ka batsadi ba batsadi ba gagwe botlhe ba le banè, ba e neng e le bafaladi ba ba tswang kwa Hungary e bile e le Bakeresete ba ba tloditsweng. Fa e ne e sa ntse e le mosimanyana, o ne a kgatlhiwa ke go nna gone kwa dikopanong tse dikgolo ka bo1950 mme a lemoga gore phuthego ya ga Jehofa e feta thata phuthego ya gaabo. Mosadi wa gagwe e bong Ketra, o ne a bolela kafa a ithutileng go ikanyega ka gone fa e ne e le mmulatsela kwa phuthegong e e neng e na le mathata a botlhanogi le mathata a mangwe. O ne  a itshoka mme kgabagare a romelwa go ya go nna mmulatsela yo o kgethegileng kwa phuthegong e kutlwano ya yone e neng ya mo ama pelo.

Go tswa foo Manfred Tonak, o ne a neela pego ka Ethiopia. Lefatshe leno le sa le le nna gone fa e sa le mo metlheng ya ditiragalo tsa Baebele, mme jaanong le segofaditswe ka baboledi ba dikgang tse di molemo ba ba fetang 9 000. Bontsi jwa bone ba nna mo motsemogolong e leng Addis Ababa kgotsa gaufi le one. Ka jalo, mafelo a a kwa kgakala a tlhoka go rerelwa dikgang tsa Bogosi. Gore seno se kgonege, Basupi ba Ba-Ethiopia ba ba nnang kwa dinageng tse dingwe ba ne ba kopiwa go eta e le gore ba ye go rera kwa dikarolong dingwe tse di kwa kgakala tsa naga eo. Ba le bantsi ba ne ba tla, ba kgothatsa Basupi ba koo, ba bo ba fitlhela batho ba ba neng ba ba reetsa.

Karolo e e neng e kgatlha thata ya thulaganyo e ne e le puo ya neeletsano e e neng e bua ka Basupi ba ga Jehofa ba kwa Russia le dikgetsi tsa bone tsa semolao. Aulis Bergdahl wa Komiti ya Lekala ya kwa Russia o ne a bua ka hisitori ya go bogisiwa ga Basupi ba kwa Russia, segolobogolo kwa Moscow. Philip Brumley wa Lephata la Semolao kwa lekaleng la United States o ne a bua ka diphetogo tse di kgatlhang tse di neng tsa nna gone mo dikgweding tsa bosheng fa Kgotlatshekelo ya Yuropa ya Ditshwanelo Tsa Batho (European Court of Human Rights [ECHR]) e ne e reetsa ditatofatso di le robonngwe tse Basupi ba neng ba latofadiwa ka tsone. Kgotlatshekelo e ne ya dumalana ka gore mo ditatofatsong tseo di le robongwe, ga go epe ya tsone e e neng e na le bosupi jo bo e tshegetsang, mo dikgetsing di le mmalwa kgotlatshekelo e ne ya bo ya tsaya matsapa a go tlhalosa lebaka la go bo ditatofatso tseo di le phoso. Le fa re sa ntse re emetse diphelelo tsa kgetsi eo, Mokaulengwe Brumley o ne a bua a na le tsholofelo kafa tshwetso ya Kgotlatshekelo eo e ka amang dikgetsi tse dingwe mo mafatsheng a mangwe ka teng.

Morago ga dikgang tseno tse di itumedisang, Mokaulengwe Lett o ne a itsise gore ECHR e dumetse go sekaseka kgetsi e e amanang le lekgetho e e sa bolong go sekwa e e amang puso ya kwa Fora le Basupi ba ga Jehofa. Kgotlatshekelo eno e e tlotliwang thata e dumela dikgetsi di le mmalwa fela tse e kopiwang go di sekaseka. Go tla go fitlha jaanong, ECHR e sekasekile dikgetsi di le 39 tse di amang Basupi ba ga Jehofa, mme re fentse di le 37 tsa tsone. Mokaulengwe Lett o ne a kgothaletsa batho botlhe ba Modimo go isa kgang eo kwa go Jehofa Modimo ka thapelo.

Pego ya bofelo e ne ya dirwa ke Richard Morlan, mokaedi wa Sekolo sa Bagolwane ba Phuthego. O ne a bua ka boitumelo ka sekolo seo le kafa bagolwane ba ba neng ba le teng kwa go sone ba ileng ba bontsha kanaanelo ka gone.

Dipuo Tse Dingwe ka Maloko a Setlhopha se se Laolang

Guy Pierce wa Setlhopha se se Laolang o ne a neela puo e e amang maikutlo e e neng e bua ka  temana ya ngwaga ya 2011, e e reng, “Tshabela mo leineng la ga Jehofa.” (Sefa. 3:12) O ne a tlhalosa gore le fa nako eno e le e e itumediseng ka ditsela di le dintsi mo bathong ba ga Jehofa, gape ke nako e e masisi. Letsatsi le legolo la ga Jehofa le gaufi; le fa go ntse jalo, batho ba tswelela go batla botshabelo mo bodumeding jwa maaka, mo mekgatlong ya dipolotiki, mo dikhumong, le mo go itlhokomoloseng boammaaruri jwa maemo a ba tshelang mo go one le dilo tse dingwe tse di ntseng jalo. Gore re bone botshabelo jwa mmatota re tshwanetse go bitsa leina la ga Jehofa, mme seo se akaretsa go itse Mong wa leina leo, go mo tlotla thata le go mo ikanya, re mo rate ka sengwe le sengwe se re nang le sone.

Go tswa foo, David Splane wa Setlhopha se se Laolang o ne a neela puo e e maatla, e e neng e dira gore motho a akanye, ya setlhogo se se reng, “A o Tsene mo Boikhutsong Jwa Modimo?” O ne a bolela gore boikhutso jwa Modimo ga bo reye go nna o sa dire sepe, e re ka Jehofa le Morwawe ba ‘ntse ba dira’ mo nakong eno yotlhe ya letsatsi la boikhutso la tshwantshetso, gore kwa bokhutlong boikaelelo jwa Modimo ka dilo tse a di bopetseng lefatshe bo diragadiwe. (Joh. 5:17) Ka jalo, re ka tsena jang mo boikhutsong jwa Modimo? Go tlogela go dira boleo le go tlogela go ipeela mabaka ke karolo fela ya karabo ya potso eo. Re tshwanetse go nna le tumelo re bo re nne re akantse ka boikaelelo jwa Modimo, re dira sengwe le sengwe fela se re ka se kgonang go bo ema nokeng. Ka dinako dingwe seo e ka nna kgwetlho e kgolo mme re tshwanetse go amogela kgakololo le go dirisana le kaelo e e tswang mo phuthegong ya ga Jehofa. Mokaulengwe Splane o ne a kopa bareetsi ka tlhoafalo gore ba dire sengwe le sengwe se ba ka se kgonang go tsena mo boikhutsong jwa Modimo.

Puo ya bofelo e e neng ya neelwa ke Anthony Morris wa Setlhopha se se Laolang e ne e na le setlhogo se se reng “Re Letetse Eng?” Mokaulengwe Morris o ne a bontsha boikutlo jwa go potlaka le go bontsha lorato lwa borre fa a gakolola bareetsi ka boporofeti jo bo sa ntseng bo tla diragadiwa e leng ditiragalo tse botlhe ba ba ikanyegang ba letetseng ka tlhoafalo go bona di diragadiwa. Ditiragalo tseno di akaretsa go goa “Kagiso le polokesego!” le go fedisiwa ga bodumedi jwa maaka. (1 Bathes. 5:2, 3; Tshen. 17:15-17) Mokaulengwe Morris o ne a tlhagisa bareetsi gore ba se ka ba itlhaganelela go re, “Haramagedona e tshwanetse ya bo e fitlhile” fa ba bona ditiragalo tse di sa diragatseng boporofeti tse di begiwang mo dikgannyeng. O ne a kgothaletsa boikutlo jo bo umakilweng mo go Mika 7:7 jwa go leta ka boipelo le ka bopelotelele. Le fa go ntse jalo, o ne gape a kgothaletsa botlhe go atamalana le Setlhopha se se Laolang fela jaaka masole a a tsenang mo ntweng e e matlho mahibidu a dira. O ne a re: “E kete pelo ya lona e ka nonofa, lona lotlhe ba lo letileng Jehofa.”—Pes. 31:24.

Kwa bokhutlong jwa pokano eo, go ne ga nna le dikitsiso tse di itumedisang le tse di sa lebalesegeng. Geoffrey Jackson wa Setlhopha se se Laolang o ne a itsise ka thulaganyo ya go lekeletsa makasine o o ithutiwang wa Tora ya Tebelo ka Seesemane se se tlhofofaditsweng, go thusa ba ba sa kgoneng go bala Seesemane sentle. Go tswa foo, Stephen Lett o ne a itsise gore Setlhopha se se Laolang se tla rulaganya gore go nne le maeto a bodisa a a direlwang balebedi ba kgaolo le basadi ba bone kwa United States. Gape o ne a itsise gore Sekolo sa Thapiso sa Bodiredi se tla bidiwa Sekolo sa Baebele sa Bakaulengwe Ba ba Sa Nyalang. Mme o ne a itsise gore go tla nna le sekolo se sesha se se bidiwang Sekolo sa Baebele sa Banyalani ba Bakeresete. Sekolo seno se tla naya banyalani thapiso e e oketsegileng gore phuthego ya ga Jehofa e kgone go ba dirisa ka tsela e kgolwane. Mokaulengwe Lett gape o ne a itsise gore go tla nna le ditlelase tse pedi tsa Sekolo sa Balebedi ba ba Etang le Basadi ba Bone le Sekolo sa Maloko a Komiti ya Lekala le Basadi ba Bone ngwaga le ngwaga kwa Patterson, mme ba ba kileng ba nna gone mo ditlelaseng tseo ba tla nna le tshiamelo ya go boela lekgetlo la bobedi.

Thulaganyo eo e ne ya konelwa ka tsela e e amang pelo, fa John E. Barr yo o nang le dingwaga di le 97, yo o sa bolong go nna leloko la Setlhopha se se Laolang, a ne a rapela thapelo e e boikobo le e e tswang pelong. * Mongwe le mongwe o ne a tsamaya a tlhatswegile pelo gore ruri leno e ne e le letsatsi le le sa lebalesegeng.

[Dintlha tse di kwa tlase]

^ ser. 7 Bona 2011 Yearbook of Jehovah’s Witnesses, tsebe 62-63.

^ ser. 20 Mokaulengwe Barr o ne a wetsa botshelo jwa gagwe jwa mo lefatsheng ka December 4, 2010.

[Mafoko a a mo go tsebe 19]

Botlhe ba ba neng ba le gone ba ne ba itumelela dipotsolotso

[Mafoko a a mo go tsebe 20]

Jehofa o segofaditse tiro ya go rera kwa Ethiopia