Fetela kwa tshedimosetsong

Fetela go diteng

A o A Gakologelwa?

A o A Gakologelwa?

 A o A Gakologelwa?

A o ile wa itumelela go bala dimakasine tsa bosheng tsa Tora ya Tebelo? Fa go ntse jalo, bona gore a o ka kgona go araba dipotso tse di latelang:

Ke eng se Mokeresete a ka se dirang fa a ikutlwa a na le letsapa mo maikutlong le semoyeng?

Re tshwanetse ra leka go bona gore ke eng se se re bakelang letsapa. Go ka thusa go sekaseka dilo tsotlhe tse re di dirang le tse re nang le tsone, mme re tlose bokete bongwe le bongwe jo bo sa tlhokegeng. Re ka nna ra ipeela mekgele e re ka kgonang go e fitlhelela go ya kafa maemo a rona a re letlang ka teng. Go botlhokwa go tlhokomela boitekanelo jwa rona jwa semoya, mme seno se tshwanetse go akaretsa go rapela ka metlha le go tlhatlhanya.—8/15, tsebe 23-6.

Ke ka ntlha yang fa Basupi ba ga Jehofa ba tsaya palo ya 144 000 e le palo ya mmatota?

Fa moaposetoloi Johane a sena go bolelelwa ka 144-000, o ne a bona “boidiidi jo bogolo, jo go seng motho ope yo o neng a kgona go bo bala.” (Tshenolo 7:4, 9) Fa palo eno ya 144 000 e ne e le ya tshwantshetso, pharologanyo mo gare ga ditlhopha tse pedi tseno e ne e se kitla e bonala sentle. Jesu o ne a bitsa ba ba tla busang mmogo le ene a re ke “letsomanyane.” (Luke 12:32)—9/1, tsebe 30.

Ke ka ntlha yang fa Moiseraele a ne a letleletswe go rekisetsa motswakwa phologolo e e suleng e e sa tshololwang madi?

Motswakwa kgotsa moagi wa moeng yo o sa sokologang o ne a se kafa tlase ga Molao. Ka gone Moiseraele o ne a letleletswe go mo naya kgotsa go mo rekisetsa phologolo e e ntseng jalo. (Duteronome 14:21) Mme yo o sokologileng ene o ne a tlamilwe ke Molao mme ka gone o ne a sa tshwanela go ja madi a phologolo eo. (Lefitiko 17:10)—9/15, tsebe 26.

Ke dikai dife tse di bontshang kafa batho ba ratang go dira dilo ba tsaya malebela mo dilong tsa tlholego, mme ke ka ntlha yang fa Bakeresete ba tshwanetse go kgatlhegela seno?

E ne ya re fa moenjenere mongwe wa kwa Switzerland a sena go bona bojang jo bo ngaparelang jo bosesane jo bo mitlwanyana mo diaparong tsa gagwe le mo boboeng jwa ntša ya gagwe, o ne a tlhama nnale e e logang e e bopegileng jaaka bojang joo. BooraWright le bone ba ne ba tlhama sefofane fa ba sena go ithuta ka dinonyane dingwe tse dikgolo tse di neng di fofa mo loaping. Mokgwa ono wa go tsaya malebela mo dilong tsa tlhago o tshwanetse go tlhotlheletsa Bakeresete go naya Mmopi kgalalelo.—10/1, tsebe 9.

Ke mang yo go buiwang ka ene mo go 2 Bakorintha 12:2-4 go twe o ne a phamolelwa kwa paradaiseng?

Temana eno e tla morago fela ga ditemana tse mo go tsone Paulo a neng a buelela go nna moaposetoloi ga gagwe. E re ka Baebele e sa re bolelele ka motho ope yo mongwe yo o neng a diragalelwa ke selo se se tshwanang le seno mme gape e re ka e le Paulo yo o re bolelelang ka yone, go ka direga gore Paulo ke ene yo o neng a bona ponatshegelo eno.—10/15, tsebe 8.

Dinonofo dingwe tse Jesu a nang le tsone tse di dirang gore a bo a tshwanelega go nna Moeteledipele yo o tlhophilweng ke Modimo ke dife?

Jesu o ne a ikanyega ka botlalo, a le boammaaruri e bile a thokgame. O ne a ineetse ka botlalo mo Modimong. Jesu o ne a amega thata ka batho mme o ne a iketleeditse go bereka.—11/1, tsebe 6-7.

Madimona a tla bo a le kae ka nako ya Puso ya Dingwaga Tse di Sekete?

Go a utlwala go swetsa ka gore ka nako ya Puso ya Dingwaga Tse di Sekete ya ga Keresete ba tla tswalelwa mo moleteng mmogo le Satane. (Tshenolo 20:1-3) Genesise 3:15 e ne ya bolelela pele ka go gobatswa ga noga mo tlhogong, mo go akaretsang go tsenngwa ga gagwe mo moleteng ka nako ya Puso ya Dingwaga Tse di Sekete. Losika lwa gagwe lo akaretsa baengele ba ba boikepo, kgotsa madimona. Lebaka la go bo ba ile ba bontsha go tshaba go ya moleteng le bontsha gore ba a itse gore ba tlile go tswalelwa. (Luke 8:31)—11/15, tsebe 30-1.

Ke ka ntlha yang fa motho a tshwanetse go nna kelotlhoko ka go nwa dino tse di tagang, tota le fa a sa nwe go fitlhela a bonala gore o tagilwe?

Batho bangwe ga ba bonale gore ba tagilwe tota le morago ga go nwa digalase di le mmalwa. Le fa go ntse jalo, motho a ka feleletsa a tshwakgotswe thata ke bojalwa a ba a feleletsa a fetogile ‘motlhanka wa beine e ntsi.’ (Tito 2:3) Jesu o ne a tlhagisa ka ga go “imelwa ke go ja mo go feteletseng le ke go nwa bobe.” (Luke 21:34, 35) Ga go tlhokege gore o bo o ye go tagwa gore go twe bojalwa bo go dirile boroko le setshwakga—mo mmeleng le mo moyeng.—12/1, tsebe 19-21.