Fetela kwa tshedimosetsong

Fetela go diteng

Dikgang Tse di Molemo Tsa Bogosi Ke Eng?

Dikgang Tse di Molemo Tsa Bogosi Ke Eng?

 Dikgang Tse di Molemo Tsa Bogosi Ke Eng?

Mo ngwageng o o fetileng, batho ba le 6 035 564 ba bannye le ba bagolo mo dinageng tse 235, ba ne ba dirisa diura di le 1 171 270 425 ba buisana le batho ka tsone mo lefatsheng lotlhe. Mo godimo ga go di bua ka molomo, ba ne ba tsamaisetsa batho dikgatiso tse di fetang dimilione di le 700 tse di itsiseng ka tsone e bile di di tlhalosa. Gape ba ile ba di phasalatsa ka go aba dikhasete le dibidio di le diketekete. Ke eng “tsone” tseno?

KE DIKGANG tse di molemo tsa Bogosi jwa Modimo. Ruri ga go ise go ke go direge mo hisitoring ya batho gore “dikgang tse di molemo tseno tsa bogosi” di rerwe ka selekanyo se re se bonang gompieno.—Mathaio 24:14.

Botlhe ba ba dirang tiro eno ya go rera le go ruta mo lefatsheng lotlhe ke baithaopi. Go ya ka pono ya batho ba lefatshe, ba ka nna ba lebega ba sa tshwanelege go dira tiro eno. Le fa go ntse jalo, ke eng se se dirang gore ba nne pelokgale jaana le go atlega? Lebaka la konokono ke gore dikgang tse di molemo tsa Bogosi di na le maatla, gonne ke dikgang tse di buang ka masego a a tla tlelang batho. Ano ke masego a batho botlhe ba a eletsang—boitumelo, go gololesega mo mathateng a ikonomi, puso e e molemo, kagiso le polokesego le selo se sengwe gape se batho ba le bantsi ba se keng ba akanya ka sone—botshelo jo bo sa khutleng! Ruri seno ke dikgang tse di molemo mo bathong ba ba batlanang le bokao le boikaelelo jwa botshelo. Ee, o ka bona masego ano otlhe le a mangwe fa o arabela ka tsela e e siameng fa o bolelelwa dikgang tse di molemo tsa Bogosi.

Bogosi ke Eng?

Le fa go ntse jalo, Bogosi jono jo go bolelwang ka jone ke eng? Ke Bogosi jo dimilione di rutilweng go bo rapelela ka mafoko ano a a tlwaelegileng: “Rraarona yo o kwa magodimong, a leina la gago le itshepisiwe. A bogosi jwa gago bo tle. A thato ya gago e diragale le mo lefatsheng, jaaka kwa legodimong.”—Mathaio 6:9, 10.

Ke Bogosi jo moporofeti wa Mohebera e bong Daniele a neng a bua ka jone makgolo a a fetang 25 a dingwaga a a fetileng fa a ne a kwala jaana: “Modimo wa legodimo o tla tlhoma bogosi jo bo se kitlang bo senngwa le ka motlha. Mme bogosi joo ga bo kitla bo fetisediwa mo bathong bape ba bangwe. Bo tla thubaganya bo fedisa magosi ano otlhe, mme bo tla ema ka bosakhutleng.”—Daniele 2:44.

Ka jalo, dikgang tse di molemo di kaga Bogosi, kgotsa puso ya Modimo e e tla fedisang boikepo jotlhe e bo e busa lefatshe lotlhe ka kagiso. E tla diragatsa maikaelelo a ntlhantlha a Mmopi ka batho le lefatshe.—Genesise 1:28.

 “Bogosi Jwa Magodimo bo Atametse”

Mo e ka nnang dingwaga di le 2 000 tse di fetileng, dikgang tse di molemo tsa Bogosi di ne tsa bolelwa phatlalatsa la ntlha ke monna yo o ineetseng yo ponalo ya gagwe le mokgwa wa gagwe di neng di gapa tlhokomelo ya batho. Monna yoo e ne e le Johane Mokolobetsi, morwa moperesiti wa Mojuda e bong Sekarea le mosadi wa gagwe, Elisabetha. Johane o ne a apara seaparo sa boboa jwa kamela, ka moitlamo wa letlalo mo lothekeng, ka mokgwa o o tshwanang le wa ga moporofeti Elija yo a neng a mo tshwantshetsa. Mme molaetsa wa gagwe ke one o o neng o gapa tlhokomelo ya ba le bantsi. O ne a bolela jaana: “Ikwatlhayeng, gonne bogosi jwa magodimo bo atametse.”—Mathaio 3:1-6.

Bareetsi ba ga Johane e ne e le Bajuda ba ba neng ba ipolela gore ba obamela Modimo wa boammaaruri, e bong Jehofa. Jaaka setšhaba, ba ne ba amogetse kgolagano ya Molao ka Moshe dingwaga di ka nna 1 500 pelenyana. Kwa Jerusalema, tempele e ntle e ditlhabelo di neng di ntshediwa kwa go yone tumalanong le Molao e ne e sa ntse e le teng. Bajuda ba ne ba ikutlwa ba tlhomamisegile gore kobamelo ya bone e ne e siame mo matlhong a Modimo.

Fa batho bangwe ba reetsa Johane, ba ne ba simolola go lemoga gore bodumedi jwa bone bo ne bo se ka tsela e ba neng ba akanya gore bo tshwanetse go nna ka yone. Dingwao tsa Segerika le filosofi di ne di tshwaeditse dithuto tsa bodumedi tsa Bajuda. Molao o o neng o amogetswe ka Moshe go tswa kwa Modimong o ne o leswafaditswe le go koafadiwa ke ditumelo tsa batho le dingwao tsa bone. (Mathaio 15:6) Ba le bantsi ba ne ba sa tlhole ba obamela Modimo ka tsela e e amogelesegang ka ntlha ya go timediwa ke baeteledipele ba bone ba bodumedi ba ba dipelo di thata le ba ba seng kutlwelobotlhoko. (Jakobe 1:27) Ba ne ba tshwanetse gore ba ikwatlhaele maleo a bone a ba a diretseng Modimo le kgolagano ya Molao.

Ka nako eo, Bajuda ba le bantsi ba ne ba lebeletse go tla ga ga Mesia yo o solofeditsweng, kgotsa Keresete, mme bangwe ba ne ba ipotsa jaana ka Johane: “A e ka tswa gongwe e le Keresete?” Le fa go ntse jalo, Johane o ne a latola seo mme go na le moo, a ba kaela kwa go mongwe o sele yo a neng a bua jaana ka ene: “Yo kgole ya bompaatšhane ba gagwe ke sa lekanang go e funolola.” (Luke 3:15, 16) Johane o ne a bolela jaana fa a ne a itsise barutwa ba gagwe Jesu: “Bonang, Kwana ya Modimo e e tlosang boleo jwa lefatshe!”—Johane 1:29.

Ruri seo e ne e le dikgang tse di molemo, ka gonne tota Johane o ne a bontsha batho botlhe tsela e e isang botshelong le boitumelong—Jesu, ene yo o “tlosang boleo jwa lefatshe.” E re ka batho botlhe e le ditlogolwana tsa ga Adame le Efa, ba tsholwa ba le kafa tlase ga taolo ya boleo le loso. Baroma 5:19 e tlhalosa jaana: “Fela jaaka ba le bantsi ba ne ba dirwa baleofi ka botlhokakutlo jwa motho a le mongwe [Adame], ka tsela e e tshwanang ba le bantsi ba tla dirwa ba ba siameng ka go utlwa ga motho a le mongwe [Jesu].” Jesu, jaaka kwana e e ntshiwang setlhabelo, o ne a tshwanetse go ‘tlosa boleo’ le go fetola maemo a a hutsafatsang a batho. Baebele e tlhalosa jaana: “Dituelo tse boleo bo di duelang ke loso, mme mpho e Modimo a e nayang ke botshelo jo bo sa khutleng ka Keresete Jesu Morena wa rona.”—Baroma 6:23.

 Jaaka motho yo o itekanetseng—tota e bile, motho yo mogolo go gaisa botlhe ba ba kileng ba tshela—Jesu o ne a rera dikgang tse di molemo. Pego ya Baebele mo go Mareko 1:14, 15 e re bolelela jaana: “Jaanong ya re Johane a sena go tshwarwa, Jesu a tsena mo Galalea, a rera dikgang tse di molemo tsa Modimo a re: ‘Nako e e tlhomilweng e diragaditswe, mme bogosi jwa Modimo bo atametse. Ikwatlhayeng, mme lo nne le tumelo mo dikgannyeng tse di molemo.’”

Ba ba neng ba arabela molaetsa wa ga Jesu ba bo ba dumela dikgang tse di molemo ba ne ba segofadiwa fela thata. John 1:12 e bolela jaana: “Botlhe fela ba ba neng ba amogela [Jesu], o ne a ba naya taolo ya go nna bana ba Modimo, ka gonne ba ne ba bontsha tumelo mo leineng la gagwe.” E re ka ba ne ba le bana, kgotsa barwa ba Modimo, ba ne ba siametse go bona tuelo ya botshelo jo bo sa khutleng.—1 Johane 2:25.

Mme tshiamelo ya go amogela masego a Bogosi e ne e se ya batho ba lekgolo la ntlha la dingwaga fela. Jaaka go umakilwe pelenyana, gompieno dikgang tse di molemo tsa Bogosi jwa Modimo di bolelwa le go rutwa mo lefatsheng lotlhe le le nang le banni. Ka jalo masego a Bogosi a sa ntse a ka bonwa. O tshwanetse go dira eng gore o bone masego a a ntseng jalo? Setlhogo se se latelang se tla tlhalosa.