Fetela kwa tshedimosetsong

Fetela go diteng

Go Tlhalosiwa ga Buka ya Daniele!

Go Tlhalosiwa ga Buka ya Daniele!

 Go Tlhalosiwa ga Buka ya Daniele!

BATLAKOPANONG ba ne ba lebeletse pele go bona dikhopi tsa bone tsa buka ya ditsebe di le 320 e e sa tswang go gololwa ya, Ela Tlhoko Boporofeti Jwa ga Daniele! Ba ne ba ikutlwa jang ka buka eno? Akanya ka se bangwe ba ileng ba se bolela.

“Jaaka basha ba le bantsi ba dingwaga tsa bolesome, go thata gore ke ipelele go ithuta ka hisitori ya bogologolo. Ka jalo, fa ke amogela khopi ya me ya buka e ntšha ya Ela Tlhoko Boporofeti Jwa ga Daniele!, ke ne ke sa kgatlhegele go e bala go le kalo mme ke ne ka e leka. Banna, a bo ke ne ke na le boikutlo jo bo phoso jang ne! Buka eno ke nngwe ya tse di molemolemo tse nkileng ka di bala. E kgatlha tota! Ga ke tlhole ke akanya gore ke bala ka pego e e diragetseng diketekete tsa dingwaga tse di fetileng. Ke lekgetlo la ntlha ke ikutlwa gore nka kgona go ipaya mo boemong jwa ga Daniele. Ke kgona go bona ka matlho a mogopolo gore go ka nna jang go tsewa mo go ba lelapa la gago, o bo o romelwa kwa nageng e sele mme bothokgami jwa gago bo nna bo ntse bo lekiwa gangwe le gape. Ke leboga thata go bo ke na le buka eno.”—Anya.

“Se se nthusang thata ke molaetsa o o tlhomameng wa gore Jehofa ke ene fela yo o laolang dikgang tse di amang batho ba gagwe. Ka diponatshegelo le ditoro tsa ga Daniele le tsa ba bangwe tse a neng a di tlhalosa, go phepafetse gore Modimo wa rona o tla tlhomamisa gore ditiragalo di diragala fela jaaka a ne a ikaeletse. Seno se nonotsha tsholofelo e re nang nayo ka ditshwantshetso tsa boporofeti tse di mo Baebeleng malebana le lefatshe le lesha le a tla le tlisang.”—Chester.

“Ke rata tsela e lo ileng lwa dira gore Daniele a nne le botshelo ka teng. Ke ne ka ikutlwa ke mo itse botoka ka ntlha ya tsela e lo ileng lwa tlhalosa ditlalelo le ditlhodiego tsa gagwe ka teng. Ke ne ka kgona go tlhaloganya botoka lebaka la go bo Jehofa a ile a mo kgatlhegela jaana. Ka nako ya diteko le dipogisego tsa gagwe tsotlhe, o ne a sa amege ka ene ka boene. Se a neng a amegile thata ka sone e ne e le Jehofa le leina la Gagwe le lentle. Ke a lo leboga go bo lo ile lwa dira gore dintlha tseno di tlhomologe.”—Joy.

“Se ke sone se re ntseng re se letetse! Ga re ise re ko re bontshiwe kafa buka ya ga Daniele e amang mongwe le mongwe wa rona ka teng. Fa ke sena go bala bontsi jwa buka e ntšha eno mo bosigong jwa fa ke sena go e amogela, ke ne ka patelesega go ema ke bo ke leboga Jehofa ka thapelo.”—Mark.

“Selo se re neng re sa se lebelela ke tlhotlheletso e e neng e tla nna le yone mo baneng ba rona. Ba na le dingwaga tse tlhano le tse tharo. . . . Le fa gone dikgang tsa ga Daniele, Hanania, Mishaele le Asaria e ne e le tse ba neng ba di rata thata mo bukeng ya Buka ya Me ya Dipolelo tsa Bibela, tlhaloso e e leng mo bukeng ya Boporofeti Jwa ga Daniele e ba amile ka tsela e re neng re sa e lebelela. Tota le fa ba le babotlana jaana, go bonala fa ba kgona go tlhaloganya makawana a a siameng ano. A bo e le dikao tse di molemo jang ne mo baneng ba rona! A bo lo re file sedirisiwa se se molemo jang ne! Re lo leboga go menagane!”—Bethel.

“Ke ne ke ikutlwa e kete ke mmogo le makawana ao a Bahebera fa tumelo ya bone e ntse e lekiwa; mme go ile ga nkgothatsa gore le nna ke tlhatlhobe tumelo ya me. Lebokoso la poeletso le le nang le setlhogo se se reng “O Lemogile Eng?” le gatelela se se mo kgaolong eo mo pelong. Ke lo leboga gape ka ntlha ya letlotlo le lengwe gape.”—Lydia.