Seterese ke tsela e mmele wa motho o tsibogang ka yone fa o lebana le diphetogo. Boboko jwa gago bo romela tshedimosetso e ntsi mo dikarolong tsotlhe tsa mmele. Seno se dira gore pelo ya gago e iteele ka bonako, haebolate ya gago e ye kwa godimo, o se ka wa kgona go hema sentle le gore mesifa ya gago e nne botlhoko. Le fa wena o ise o itse gore go diragalang ka nako eo, mmele wa gago o a bo o setse o ipaakanyeditse go tsiboga. Fa o emisa go tshwenyega, pelo, haebolate, makgwafo le mesifa ya gago, di simolola go bereka sentle.

Seterese se go thusa go tsiboga fa o lebana le maemo a a kotsi. Fa o simolola go tshwenyega, boboko jwa gago ke jone jwa ntlha go tsiboga. Seterese se ka go thusa gore fa o lebana le maemo mangwe, o tsiboge ka bonako. Gape se ka go thusa go fitlhelela mekgele ya gago kgotsa go dira sentle ka nako ya ditlhatlhobo kwa sekolong le ka nako ya dipotsolotso tsa fa o batla tiro.

Mme gone go tshwenyega thata go ka nna kotsi. Fa o nna o na le seterese o ka simolola go lwala, go nna o galefile, go nna fela o hutsafetse, go lebala dilo tse dintsi le go dira dilo o sa akanye sentle. Tsela e o itshwarang ka yone, le e o tshwarang ba bangwe ka yone e ka fetoga. Seterese se ka dira gore motho a feleletse a nwa bojalwa thata, a dirisa diokobatsi, a goga motsoko le go dira dilo tse di sa siamang. Gape se ka dira gore motho a gatelelwe mo maikutlong, a nne le letsapa le le tseneletseng kgotsa a batle go ipolaya.

Le fa gone seterese se ka se re ame ka tsela e e tshwanang, se ka re bakela malwetse a le mantsi. Tota e bile, se ka tlhakatlhakanya mmele otlhe wa gago.