Fetela kwa tshedimosetsong

Fetela go diteng

O Itse Eng ka Basupi ba ga Jehofa?

O Itse Eng ka Basupi ba ga Jehofa?

O re bona re bua le batho phatlalatsa ka molaetsa wa Baebele. O ka tswa o utlwetse ka rona mo dikgannyeng kgotsa mo bathong bangwe. Mme tota o itse Basupi ba ga Jehofa go le kae?

TLHATLHOBA KITSO YA GAGO

Tshwaya gore a polelwana nngwe le nngwe ke nnete kgotsa maaka.

NNETE MAAKA

  1. Basupi ba ga Jehofa ke Bakeresete.

  2. Basupi ba ga Jehofa ba dumela gore dilo tsotlhe di bopilwe ka malatsi a le marataro a diura di le 24.

  3. Basupi ba ga Jehofa ga ba amogele kalafi.

  4. Basupi ba ga Jehofa ba dumela sengwe le sengwe se se mo Baebeleng.

  5. Basupi ba ga Jehofa ba dirisa Baebele ya bone fela.

  6. Basupi ba ga Jehofa ba fetotse Baebele gore e dumalane le se ba se dumelang.

  7. Basupi ba ga Jehofa ga ba tshegetse ditiro tse di dirwang mo motseng.

  8. Basupi ba ga Jehofa ga ba amogele madumedi a mangwe.

Bona dikarabo mo ditsebeng tse di latelang.

  1. 1 NNETE. Re leka ka bojotlhe go latela dithuto le boitshwaro jwa ga Jesu Keresete. (1 Petere 2:21) Le fa go ntse jalo, re farologana ka ditsela di le mmalwa le madumedi a mangwe a a ipitsang a Bokeresete. Ka sekai, re dumela gore Baebele e ruta gore Jesu ke Morwa Modimo, e seng gore ke karolo ya Tharonngwe. (Mareko 12:29) Re dumela gore moya o a swa kgotsa gore ga go na gope mo Baebele e rutang gore Modimo o bogisa batho ka go ba fisa ka bosakhutleng mo diheleng. E bile ga re dumele gore ba ba etelelang pele mo ditirong tsa bodumedi ba tshwanetse go newa direto tse di ba tlotlomatsang go feta batho ba bangwe.—Moreri 9:5; Esekiele 18:4; Mathaio 23:8-10.

  2. 2 MAAKA. Re dumela gore Modimo o bopile sengwe le sengwe. Mme gone ga re dumalane le batho ba ba reng dilo tsotlhe di bopilwe ka malatsi a le marataro a diura di le 24. Ka ntlha yang? Ka gonne dikgopolo tse dintsi tsa bone ga di dumalane le Baebele. Ka sekai, batho bangwe ba re dilo tsotlhe di bopilwe ka malatsi a le marataro a diura di le 24. Mme mo Baebeleng, lefoko “letsatsi” le ka kaya lobaka lo loleele lwa nako. (Genesise 2:4; Pesalema 90:4) Gape bangwe ba bone ba ruta gore lefatshe le na le dingwaga di le dikete di le mmalwa fela le le teng. Mme Baebele ya re lefatshe le lobopo di ne di ntse di le teng pele ga malatsi a marataro a popo a simologa. 1Genesise 1:1.

  3. 3 MAAKA. Re amogela kalafi. Tota e bile, bangwe ba rona ke dingaka fela jaaka Mokeresete wa lekgolo la ntlha la dingwaga e bong Luke. (Bakolosa 4:14) Le fa go ntse jalo, re gana kalafi epe fela e e kgatlhanong le melaometheo ya Baebele. Ka sekai, ga re dumele go tshelwa madi ka gonne Baebele ya re re se ka ra tsenya madi mo mebeleng ya rona ka tsela epe fela.—Ditiro 15:20, 28, 29.

    Le fa go ntse jalo, re batlela rona le ba malapa a rona kalafi e e molemo. Tota e bile, kalafi e e neng e diretswe Basupi ba ba lwalang ya go thibela gore madi a se ka a dutla thata fa ba alafiwa, e dirisiwa go thusa batho botlhe. Gompieno mo dinageng di le dintsi molwetse mongwe le mongwe a ka itlhophela go tila dikotsi tsa go tshelwa madi, tse di jaaka malwetse a a fetisiwang ka madi, go sa dire sentle ga thulaganyo ya mmele ya go lwantsha malwetse le diphoso tse di dirwang ke batho.

  4. 4 NNETE. Re dumela gore Baebele yotlhe e ‘tlhotlheleditswe ke Modimo e bile e tswela mosola.’ (2 Timotheo 3:16) Seo se akaretsa Dikwalo tse di itsegeng e le Tesetamente e Kgologolo le Tesetamente e Ntšha. Gantsi re bitsa dikarolo tseno tsa Baebele re re ke Dikwalo Tsa Sehebera le Dikwalo Tsa Bokeresete Tsa Segerika. Ka go dira jalo, re tila go naya batho kgopolo ya gore dikarolo dingwe tsa Baebele di siilwe ke nako kgotsa ga di botlhokwa.

  5. 5 MAAKA. Re dirisa dithanolo tse dintsi tse di farologaneng fa re ithuta Baebele. Mme fa Thanolo ya Lefatshe le Lesha ya Dikwalo Tse di Boitshepo e le teng ka dipuo dingwe, re rata go dirisa yone thata ka gonne e na le leina la Modimo, e nepile e bile e a utlwala. Akanya ka go dirisiwa ga leina la Modimo e bong Jehofa. Mo ketapeleng ya Baebele nngwe, go na le lenaane la maina a batho ba le 79 ba ka tsela nngwe ba nnileng le seabe mo go e ranoleng. Le fa go ntse jalo, yone Baebele eno ga e na leina la Mokwadi wa yone—Jehofa Modimo! Thanolo ya Lefatshe le Lesha yone e buseditse leina la Modimo mo le neng le tlhaga gone ka makgetlo a le dikete mo mekwalong ya yone ya ntlha. 2

  6. 6 MAAKA. Fa re sena go lemoga gore dilo tse re di dumelang di ne di sa dumalane le Baebele, re ne ra fetola tsela e re tlhaloganyang dilo ka yone. Pele re gatisa Thanolo ya Lefatshe le Lesha ya Dikwalo Tse di Boitshepo ka 1950, re ne re dirisa dithanolo tse di neng di le teng le go dira gore ditumelo tsa rona di dumalane le se se mo Baebeleng.

  7. 7 MAAKA. Bodiredi jwa rona bo solegela batho ba le bantsi molemo. Re thusitse batho ba le bantsi go fenya mekgwa e e maswe, jaaka go dirisa diokobatsi le bojalwa ka tsela e e sa siamang. Re tshwara ditlelase tsa go ithuta go bala le go kwala mo lefatsheng lotlhe, mme di solegela batho ba le bantsi molemo. Gape re nna le seabe mo tirong ya go namola Basupi le batho ba e seng Basupi ka nako ya masetlapelo. Ka nako eo re leka ka natla go gomotsa batho ba ba wetsweng ke masetlapelo. 3

  8. 8 MAAKA. Re latela kgakololo ya Baebele ya gore re ‘tlotle batho botlhe’—go sa kgathalesege gore ke ba bodumedi bofe. (1 Petere 2:17, Baebele e e Boitshepo) Ka sekai, mo dinageng dingwe go na le Basupi ba ga Jehofa ba le diketekete. Le fa go ntse jalo, ga re leke go pateletsa baeteledipele ba dipolotiki kgotsa batho ba ba tlhomang molao gore ba kgoreletse kgotsa ba thibele tiro ya madumedi a mangwe. E bile ga re tswe letsholo go tlhotlheletsa dipuso go tlhoma melao e e pateletsang batho ba bangwe go tshela ka melao ya rona ya boitsholo le ka ditumelo tsa rona. Go na le moo, re amogela batho ba madumedi a mangwe ka tsela e re batlang ba re amogele ka yone.—Mathaio 7:12.

Setlhogo seno se na le tshedimosetso e e tserweng mo website ya rona ya jw.org/tn. Fa o batla go ithuta mo go oketsegileng, tsena mo KA GA RONA > DIPOTSO TSE GANTSI DI BODIWANG.

^ 1. Go farologana le batho ba ba dumelang gore dilo tsotlhe di bopilwe ka malatsi a le marataro a diura di le 24, ga re na lebaka la go ganetsa dipatlisiso tsa gore lefatshe le ka tswa le na le dingwaga di le dibilione le le teng.

^ 2. Thanolo ya Lefatshe le Lesha e na le sengwe se e tlhomologileng ka sone: Ga e rekisiwe. Seno se dira gore batho ba le dimilione ba kgone go bala Baebele ka puo ya bone. Thanolo ya Lefatshe le Lesha e gone ka dipuo di le 130. Gape o ka e bala mo website ya www.jw.org/tn.

^ 3. Gape re dirisa meneelo go thusa batho ba ba amilweng ke dikotsi tsa masetlapelo. (Ditiro 11:27-30) E re ka tiro eno e dirwa ke baithaopi ba ba sa duelweng, meneelo e e ntshitsweng e dirisediwa tiro ya namolo, e seng go ba duela.