Fetela kwa tshedimosetsong

Fetela go diteng

Bogosi Jwa Modimo bo Tla Busa Leng mo Lefatsheng?

Bogosi Jwa Modimo bo Tla Busa Leng mo Lefatsheng?

Balatedi bangwe ba ga Jesu ba ne ba batla go itse gore Bogosi Jwa Modimo bo ne bo tla simolola go busa leng. Jesu o ile a ba raya a re ga ba na go itse letsatsi le bo tla simololang go busa ka lone mo lefatsheng. (Ditiro 1:6, 7) Mme o ne a kile a ba bolelela gore fa ba bona dilo dingwe di diragala ka nako e le nngwe, ba tla ‘itse gore bogosi jwa Modimo bo gaufi’ le gore nako ya gore bo buse lefatshe e tlile.—Luke 21:31.

KE DILO DIFE TSE JESU A NENG A RE DI TLA DIRAGALA?

Jesu o ile a re: “Setšhaba se tla tsogologela setšhaba, le bogosi bo tsogologele bogosi; mme go tla nna le dithoromo tsa lefatshe tse dikgolo, mme mo mafelong ka go latelana malwetse a leroborobo le ditlhaelo tsa dijo.” (Luke 21:10, 11) Fela jaaka dikgadima di bontsha gore pula e tloga e na, ditiragalo tseno tsotlhe di bontsha sentle gore “bogosi jwa Modimo bo gaufi.” A ditiragalo tseno tsotlhe di setse di kile tsa diragala mo lefatsheng lotlhe ka nako e le nngwe? Akanya ka dintlha tseno.

1. DINTWA

Ka 1914, go ile ga nna le ntwa e kgolo go feta epe e e kileng ya nna teng mo lefatsheng! Borra hisitori ba re ka 1914 dilo di ile tsa fetoga ka gonne ntwa ya ntlha ya lefatshe e ile ya simologa ka ngwaga oo. Mo ntweng eo go ile ga dirisiwa dilo tse di kotsi thata tse di jaaka: dikoloi tsa masole tse di thuntsang kgotsa kanono, dibomo, ditlhobolo, digase tse di kotsi le dibetsa tse dingwe. Ntwa eo e ile ya dira gore go nne le ntwa ya bobedi ya lefatshe mme ka ntwa eo go ile ga dirisiwa dibetsa tse di kotsi le go feta. Fa e sa le ka 1914, go ntse go na le dintwa ka go latelana tse di bolaileng batho ba le bantsi tota.

2. DITHOROMO TSA LEFATSHE

Kgatiso ya Britannica Academic ya re ngwaga le ngwaga go nna le dithoromo tsa lefatshe di ka nna 100 mme dithoromo tseo di di kgolo thata jaana mo di bakang “tshenyo e e seng kana ka sepe.” Dipatlisiso tse di dirilweng kwa United States di a re: “Go ya ka direkoto tse di beilweng, (go tloga ka ngwaga wa bo1900) re ka solofela go nna le dithoromo tsa lefatshe tse dikgolo di ka nna 16 ka ngwaga.” Le fa batho ba bangwe ba re ga se gore dithoromo tsa lefatshe di dintsi gone jaanong, ba dumela gore go na le didirisiwa tse di thusang go itse gore go tla nna le dithoromo tsa lefatshe, le fa seo e ka tswa e le nnete kgotsa nnyaa, boammaaruri ke gore dithoromo tsa lefatshe di dira gore batho ba boge e bile ba swe.

3. DITLHAELO TSA DIJO

Go na le ditlhaelo tsa dijo mo lefatsheng tse gantsi di bakiwa ke dintwa, boferefere, maemo a ikonomi a a maswe, go sa tlhokomele temothuo sentle kgotsa go sa ipaakanyetse maemo a bosa a a maswe. Pego ya 2018 ya World Food Programme ya re: “Batho ba ka nna dimilione di le 821 mo lefatsheng ga ba na dijo tse di lekaneng mme ba ka nna dimilione di le 124 ba bolawa ke tlala.” Ngwaga le ngwaga bana ba ka nna dimilione di le 3,1 ba a swa ka gonne ga ba je dijo tse di nang le dikotla. Seo se ile sa dira gore ka ngwaga wa 2011, go tlhokafale bana ba ba ka tshwarang halofo ya palo eo mo lefatsheng lotlhe.

4. MALWETSE A LEROBOROBO

Kgatiso nngwe ya Mokgatlho wa Lefatshe Lotlhe wa Boitekanelo ya re: “Go tloga ka ngwaga wa 2001, go ne ga nna le malwetse a leroborobo a le mantsi. Malwetse a a sa bolong go nna gone a a jaaka, kholera le yellow fever, a boile mme go simologile a masha gape a a jaaka SARS [Severe acute respiratory syndrome], flu e e bolayang, MERS [Middle East respiratory syndrome], Ebola le Zika.” Le fa gone baitsesaense le dingaka ba itse go le gontsi ka malwetse, ga ba ise ba bone sepe se se ka fodisang malwetse otlhe.

5. TIRO YA GO RERA E E DIRWANG MO LEFATSHENG LOTLHE

Jesu o ile a bua ka sesupo se sengwe gape fa a ne a re: “Mme dikgang tse di molemo tseno tsa bogosi di tla rerwa mo lefatsheng lotlhe le le nang le banni gore e nne bosupi mo ditšhabeng tsotlhe; mme go tswa foo bokhutlo bo tla tla.” (Mathaio 24:14) Le fa go na le mathata a le mantsi mo lefatsheng, Basupi ba ga Jehofa ba ba fetang dimillione di le robedi, ba rera dikgang tse di molemo tsa Bogosi mo dinageng di le 240 ka dipuo di feta 1 000. Seno ga se ise se ko se diragale.

DITIRAGALO TSENO DI KAYA ENG?

Ditiragalo tsotlhe tse Jesu a buileng ka tsone di a diragala gompieno. Ke eng fa re tlhoka go itse dintlha tseno? Ka gonne Jesu o ne a re: “Fa lo bona dilo tseno di diragala, itseng gore bogosi jwa Modimo bo gaufi.”—Luke 21:31.

Go ise go ye kae Modimo o tla dirisa Bogosi jwa gagwe go diragatsa thato ya gagwe mo lefatsheng

Fa re sekaseka ditshupo tse Jesu a neng a bua ka tsone di diragala le tatelano ya ditiragalo tse di mo Baebeleng, re kgona go lemoga gore Modimo o tlhomile Bogosi jwa gagwe kwa legodimong ka ngwaga wa 1914. * Ka nako eo o ile a tlhoma Morwawe Jesu Keresete go nna Kgosi. (Pesalema 2:2, 4, 6-9) Go ise go ye kae Bogosi Jwa Modimo bo tla busa mo lefatsheng mme bo tla nyeletsa dipuso tsotlhe tse di mo lefatsheng bo bo bo dira lefatshe lotlhe paradaise gore batho ba tshelele ruri mo go lone.

Go ise go ye kae, mafoko ano a thapelo ya Morena a Jesu a re rutileng yone a tla diragadiwa, a a reng: “A bogosi jwa gago bo tle. A thato ya gago e diragale le mo lefatsheng, jaaka kwa legodimong.” (Mathaio 6:10) Mme gone, ke eng se Bogosi Jwa Modimo bo ntseng bo se dira kwa legodimong fa e sa le bo tlhomiwa ka 1914? Ke diphetogo dife tse re tla di bonang di diragala fa Bogosi Jwa Modimo bo busa mo lefatsheng?

^ ser. 17 Go bona dintlha tse di oketsegileng ka ngwaga wa 1914, bona ntlha e e kwa bofelong ya 22 e e mo bukeng ya Baebele e re Ruta Eng? e e gatisitsweng ke Basupi ba ga Jehofa.